କୋରାପୁଟ,୧।୫(ସ୍ବ.ପ୍ର.): ସୋମବାର ଅପରାହ୍ନରେ କାଳବୈଶାଖୀର ୫୦ ମିନିଟ କୋରାପୁଟ ସହରକୁ ଏକପ୍ରକାର ଛିନଛତ୍ର କରିଦେଇଛି। ୧୮ ଘଣ୍ଟା ପରେ ସହରରେ ବିଦ୍ୟୁତ ସେବା ସ୍ବାଭାବିକ ହୋଇଛି। ବିଦ୍ୟୁତ ବିଭାଗ କର୍ମଚାରୀ ସୋମବାର ରାତିରେ ଲାଇଟ ଲଗାଇ ଯୁଦ୍ଧକାଳୀନ ଭିତ୍ତିରେ ମରାମତି କରିବା ଦ୍ୱାରା ମଙ୍ଗଳବାର ସକାଳ ୮ଟାରେ ସହରବାସୀ ସ୍ବାଭିବକ ବିଦ୍ୟୁତ ସେବା ପାଇଛନ୍ତି। ଅନ୍ୟ କେତେକ ଅଞ୍ଚଳରେ ସେବା ସ୍ବାଭାବିକ କରିବା ପାଇଁ ଲାଗିଛି ବିଦ୍ୟୁତ ବିଭାଗ। କାଳବୈଶାଖୀ ଯୋଗୁ ସହରର ଅମଲାକୁଟିର ରାସ୍ତାରେ ୧୯୯୦ରୁ ସ୍ଥାପିତ ତଥା ସର୍ବପୁରାତନ ଜିମ୍ନାସିୟମ ଟିଣ ଉଡ଼ିଯାଇଛି। ପ୍ରତିଦିନ ଏଠାକୁ ଆସୁଥିବା ୩ଶହରୁ ଊର୍ଦ୍ଧ୍ୱ ଯୁବକ ମଙ୍ଗଳବାର ସକାଳେ ଜିମ୍ନାସିୟମର ଏପରି ଅବସ୍ଥା ଦେଖି ମର୍ମାହତ ହୋଇଛନ୍ତି। ୩୦ ବର୍ଷତଳେ ଯୁବକମାନଙ୍କ ନିଜସ୍ବ ଉଦ୍ୟମ ସହ ଜିଲା ପ୍ରଶାସନର ସହଯୋଗରେ ଲକ୍ଷାଧିକ ଟଙ୍କା ବ୍ୟୟରେ ଏହା ଆରମ୍ଭ ହୋଇଥିଲା। ପରେ କୋରାପୁଟ ବିଧାୟକ ପାଣ୍ଠିରୁ ଦେଢଲକ୍ଷ ଟଙ୍କା ଖର୍ଚ୍ଚ କରାଯାଇ ମଲଟିଜିମ ସ୍ଥାପନ କରାଯାଇଥିଲା। ଏହା ଏବେ ଏକପ୍ରକାର ଖାଁ ଖାଁ ଲାଗୁଛି। ଜିମ୍ନାସିୟମର ଏପରି ଅବସ୍ଥା ନେଇ ସହରର ବହୁ ଯୁବକ କୋରାପୁଟ ମ୍ୟୁନସିପାଲଟି ନିର୍ବାହୀ ଅଧିକାରୀ ଗୌରଚନ୍ଦ୍ର ପଟ୍ଟନାୟକଙ୍କ ଦ୍ୱାରସ୍ଥ ହୋଇଛନ୍ତି। ମେ ୨୩ ପରେ ନିର୍ବାଚନ ଆଚରଣ ବିଧି ଉଠିବା ପରେ ଏହାର ମରାମତି କରାଯିବ ବୋଲି ନିର୍ବାହୀ ଅଧିକାରୀ ଯୁବକମାନଙ୍କୁ ପ୍ରତିଶ୍ରୁତି ଦେଇଛନ୍ତି।
