ପୁରୀ ଅଫିସ, ୧୭ା୭: ଭାରତୀୟ ରେଳ ମନ୍ତ୍ରଣାଳୟର ପାସେଞ୍ଜର ସର୍ଭିସ କମିଟି(ପିଏସ୍ସି) ୫ଦିନ ଓଡ଼ିଶା ଗସ୍ତରେ ଆସିଛନ୍ତି। ବୁଧବାର ପୂର୍ବାହ୍ନରେ ଏହି ଟିମ୍ ଭୁବନେଶ୍ୱର, ଖୋର୍ଦ୍ଧାରୋଡ଼ ଏବଂ ଅପରାହ୍ନରେ ପୁରୀ ଷ୍ଟେଶନ ଅନୁଧ୍ୟାନ କରିଛନ୍ତି। କମିଟି ଚେୟାରମ୍ୟାନ ରମେଶ କୁମାର ରନତ୍ଙ୍କ ନେତୃତ୍ୱରେ ପଞ୍ଚାନନ ରାଉତ, ସତ୍ୟବ୍ରତ ଦତ୍ତ, ଭେଙ୍କଟରମଣୀ, ରାଜୀବ କୁମାର ଶର୍ମା ପ୍ରମୁଖ ୫ଜଣିଆ ଟିମ୍ ଅପରାହ୍ନ ୫ଟାରେ ପୁରୀ ଷ୍ଟେଶନରେ ପହଞ୍ଚିଥିଲେ। ପ୍ରଥମେ ସେମାନେ ଷ୍ଟେଶନ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ପରେ ଷ୍ଟେଶନ ପରିସର ବୁଲି ଦେଖିବା ସହ ପ୍ଲାଟଫର୍ମରେ ସ୍ବଚ୍ଛତା ଓ ୨୪ଘଣ୍ଟିଆ ପାନୀୟଜଳ ବ୍ୟବସ୍ଥା ଉପରେ ଗୁରୁତ୍ୱ ଦେଇଥିଲେ। ଯାତ୍ରୀମାନଙ୍କୁ ବିଭିନ୍ନ ସେବା ସମ୍ପର୍କରେ ପଚାରି ବୁଝିଥିଲେ। ଟିକେଟ କାଉଣ୍ଟର, ଇନକ୍ବାରୀ, ପ୍ରତୀକ୍ଷା କକ୍ଷ ଏବଂ ଆଇସିଟିସି ଦ୍ୱାରା ପରିଚାଳିତ ଫୁଡ ପ୍ଲାଜା ରୋଷେଇ ଘର ଅନୁଧ୍ୟାନ କରିଥିଲେ। ଫୁଡ୍ ପ୍ଲାଜା ଦ୍ୱାରା ଦିଆଯାଉଥିବା ଜନତା ମିଲ୍ରେ ଏକ୍ସପାଏରୀ ତାରିଖ ଏବଂ ମୂଲ୍ୟ ଦର୍ଶାଯାଇ ନ ଥିବାରୁ କର୍ତ୍ତୃପକ୍ଷଙ୍କୁ ୧୦ହଜାର ଟଙ୍କା ଏବଂ ଦ୍ୱିତୀୟ ଶ୍ରେଣୀ ମହିଳା ପ୍ରତୀକ୍ଷା ଗୃହ ଓ ଶୌଚାଳୟ ନିୟମିତ ସଫେଇ କରାଯାଉ ନ ଥିବାରୁ ସମ୍ପୃକ୍ତ ଠିକାଦାରଙ୍କୁ ୨୫ହଜାର ଟଙ୍କା ଜରିମାନା ଲାଗି ନିର୍ଦ୍ଦେଶ ଦେଇଛନ୍ତି। ଏଥିସହ ୩ଦିନ ମଧ୍ୟରେ ପ୍ଲାଟଫର୍ମର ଖାଲଢିପ ମରାମତି କରିବାକୁ କହିଛନ୍ତି।
ଏହି ଅବସରରେ ବିଭିନ୍ନ ସଙ୍ଗଠନ ପକ୍ଷରୁ ଉକ୍ତ ଟିମ୍କୁ ଦାବିପତ୍ର ପ୍ରଦାନ କରାଯାଇଥିଲା। ପୁରୀ ଜିଲା ଭାଜପା ସଭାପତି ପ୍ରଭଞ୍ଜନ ମହାପାତ୍ରଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଏହି ଟିମ୍କୁ ଭେଟି ଷ୍ଟେଶନର ବିିଭିନ୍ନ ସମସ୍ୟା ସମ୍ପର୍କରେ ଜଣାଇବା ସହ ସିଦ୍ଧ ମହାବୀର ରେଲଓ୍ବେ ଫାଟକ ନିକଟରେ ଓଭରବ୍ରିଜ ନିର୍ମାଣ ପାଇଁ ଦାବି କରିଥିଲେ। ଧର୍ମରକ୍ଷା ଫାଉଣ୍ଡେଶନ ଆବାହକ ଶରତ ଜୟସିଂ ସିଦ୍ଧ ମହାବୀର ଫ୍ଲାଏ ଓଭରବ୍ରିଜ, ଯାତ୍ରୀନିବାସ, ମେଡିକାଲ ସୁବିଧା ଏବଂ କୋଣାର୍କକୁ ରେଳପଥ ସହିତ ସଂଯୋଗ କରିବାକୁ ଦାବି ଜଣାଇଥିଲେ। ସେହିପରି ଶ୍ରୀକ୍ଷେତ୍ର ଜର୍ଣ୍ଣାଲିଷ୍ଟ ଫୋରମ୍ ପକ୍ଷରୁ ୧୦ଦଫା ସମ୍ବଳିତ ଦାବିପତ୍ର ଦିଆଯାଇଥିଲା। ଷ୍ଟେଶନ ପରିସରରେ ଆମ୍ବୁଲାନ୍ସ, ଫୁଟ ଓଭରବ୍ରିଜ ନିର୍ମାଣ, ଫ୍ଲାଟଫର୍ମକୁ ଉଚ୍ଚ କରିବା, ଛାତ ନିର୍ମାଣ, ଜିଆର୍ପି ଥାନା ପ୍ରତିଷ୍ଠା, ପାର୍କିଂ ସ୍ଥାନ, ପାନୀୟଜଳ ବ୍ୟବସ୍ଥା, ଶିଶୁଙ୍କ ସୁରକ୍ଷା ଓ ଥଇଥାନ ପାଇଁ ଦାବି ଉପସ୍ଥାପନ ହୋଇଛି। କମିଟି ଚେୟାରମ୍ୟାନ ରନତ୍ କହିଥିଲେ, ଆମ ଟିମ୍ ପୁରୀ ଷ୍ଟେଶନ ଅନୁଧ୍ୟାନ କରିଛି। ଏ ସଂକ୍ରାନ୍ତ ରିପୋର୍ଟ ରେଳ ମନ୍ତ୍ରଣାଳୟକୁ ପ୍ରଦାନ କରାଯିବ। ବିଭିନ୍ନ ସଂସ୍ଥା ସିଦ୍ଧ ମହାବୀର ଫ୍ଲାଏ ଓଭରବ୍ରିଜ ନିର୍ମାଣ ଲାଗି ଦାବି କରିଛନ୍ତି। ଏଥିସହ ବିଭିନ୍ନ ସମସ୍ୟା ସମ୍ପର୍କରେ ମଧ୍ୟ ଦୃଷ୍ଟି ଆକର୍ଷଣ କରାଯାଇଛି। ଏହା ଉପରେ ତଜମା କରାଯିବ। ଯାତ୍ରୀଙ୍କ ସୁବିଧା ପ୍ରତି ରେଳ ବିଭାଗ ଗୁରୁତ୍ୱ ଦେଉଛି। କେନ୍ଦ୍ର ସରକାର ଯାତ୍ରୀଙ୍କ ସୁରକ୍ଷା, ସମସ୍ତ ସୁବିଧା ପ୍ରଦାନ ଲାଗି ପ୍ରତିଶ୍ରୁତିବଦ୍ଧ। ଏଠାରେ ରହିଥିବା ସମସ୍ୟା ସମ୍ପର୍କରେ କମିଟି ପକ୍ଷରୁ କେନ୍ଦ୍ର ସରକାରଙ୍କୁ ଅବଗତ କରାଯାଇ ଆବଶ୍ୟକ ପଦକ୍ଷେପ ନିଆଯିବାକୁ ସୁପାରିଶ କରାଯିବ।
