ପୁରୀ ଅଫିସ, ୧୮।୧୨:ବିଭିନ୍ନ କାରଣକୁ ନେଇ ବିବାଦରେ ରହୁଥିବା ପୁରୀ ଜିଲା ମୁଖ୍ୟ ଚିକିତ୍ସାଳୟର ଅବସ୍ଥା ସୁଧୁରିବାର ନାଁ ଧରୁନି। ପୁଣି ଏକ ସାଂଘାତିକ ଅବ୍ୟବସ୍ଥା ସାମ୍ନାକୁ ଆସିଛି। ଡାକ୍ତରଙ୍କ ଅନୁପସ୍ଥିତିରେ ଡ୍ୟୁଟିରେ ଥିବା କେତେଜଣ ଷ୍ଟାଫ ନର୍ସ ଏକ ପ୍ରସବ କରାଇଥିଲେ। ମାତ୍ର ଚିକିତ୍ସାରେ ଅବହେଳାରୁ ଶିଶୁଟି ଜନ୍ମହେବା ପରେ ତା’ର ଦୁଇ ଗୋଡ ଭାଙ୍ଗିଯାଇଥିବା ପରିବାର ଲୋକେ ମଙ୍ଗଳବାର ଅଭିଯୋଗ କରିଛନ୍ତି। ଏହା ସହ ସମ୍ପୃକ୍ତ ଷ୍ଟାଫ ନର୍ସମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିକରି ସିଡିଏମ୍ଓଙ୍କ କାର୍ଯ୍ୟାଳୟ ଘେରାଉ କରି ଦାବିପତ୍ର ପ୍ରଦାନ କରିଥିଲେ। ଏନେଇ ସିଡିଏମ୍ଓ ନୀଳକଣ୍ଠ ମିଶ୍ର କୁହନ୍ତି, ଏହି ଘଟଣାକୁ ଗୁରୁତର ସହିତ ନିଆଯାଇଛି। ଅଭିଯୋଗ ପାଇବାରେ ଘଟଣାର ତଦନ୍ତ ଲାଗି ୪ଜଣ ଡାକ୍ତରଙ୍କୁ ନେଇ ଏକ ଟିମ୍ ଗଠନ କରାଯାଇଛି। ଏହି ଟିମ୍କୁ ୩ଦିନ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛି। କଟକ ବଡ଼ ମେଡିକାଲରେ ଶିଶୁର ଚିକିତ୍ସା ଲାଗି କର୍ତ୍ତୃପକ୍ଷଙ୍କ ସହ ଆଲୋଚନା କରାଯାଇଛି। ଶିଶୁର ଚିକିତ୍ସାରେ ସମସ୍ତ ସହଯୋଗ କରାଯିବ। ପ୍ରାଥମିକ ତଦନ୍ତ ସ୍ବରୂପ ସେହିଦିନ ଡ୍ୟୁଟିରେ ଥିବା ନର୍ସ ଓ ଡାକ୍ତରଙ୍କୁ ନୋଟିସ ଜାରି କରାଯିବ। ମାତ୍ର ଶିଶୁପୁତ୍ର ଜନ୍ମ ସମୟରେ ଡାକ୍ତରଙ୍କ ଅନୁପସ୍ଥିତି ଅଭିଯୋଗକୁ ସିଡିଏମ୍ଓ ଖଣ୍ଡନ କରିଛନ୍ତି। ପ୍ରସବ ରୁମ୍ରେ ଡାକ୍ତରଙ୍କ ୨୪ ଘଣ୍ଟିଆ ଡ୍ୟୁଟି ରହିଥାଏ। ଦୈନିକ ୧୦ରୁ ୧୫ ପ୍ରସବ ହୋଇଥାଏ। ତଦନ୍ତ ପରେ ଦୋଷୀମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
ପ୍ରକାଶ ଯେ, କଣାସ ଥାନା ଅନ୍ତର୍ଗତ ବାଦଲପୁର ଗ୍ରାମର ହେମନ୍ତ ବେହେରାଙ୍କ ସ୍ତ୍ରୀ ସୁକୁମାରୀଙ୍କ ଗର୍ଭ ଯନ୍ତ୍ରଣା ହେବାରୁ ଡିସେମ୍ବର ୮ତାରିଖରେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେହିଦିନ ସେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ଜନ୍ମ ହେବା ପରେ ଶିଶୁ ନିରନ୍ତର ଭାବେ କାନ୍ଦିବାକୁ ଲାଗିଥିଲା। କାନ୍ଦ ବନ୍ଦ ନ ହେବାରୁ ହେମନ୍ତ ଡାକ୍ତରଙ୍କ ସହିତ ଯୋଗାଯୋଗ କରିଥିଲେ। ମାତ୍ର ଡାକ୍ତର ଏଥିପ୍ରତି ଗୁରୁତ୍ୱ ନ ଦେଇ ଡିସେମ୍ବର ୧୧ତାରିଖରେ ଡିସ୍ଚାର୍ଜ କରିଦେଇଥିଲେ। ଘରକୁ ଫେରିବା ପରେ ଶିଶୁର କାନ୍ଦ ବନ୍ଦ ହୋଇ ନ ଥିଲା। ପରିବାର ଲୋକେ ବ୍ୟତିବ୍ୟସ୍ତ ହୋଇ ପୁଣି ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ଡାକ୍ତର ତାଙ୍କୁ କଟକ ନେଇ ଯିବାକୁ କହିଥିଲେ। ତେବେ ହେମନ୍ତ ପୁରୀର ଏକ ଘରୋଇ ଚିକିତ୍ସାଳୟରେ ଚିକିତ୍ସା କରିଥିଲେ। ସେଠାରେ ଶିଶୁର ଏକ୍ସ-ରେ କରାଯିବାରୁ ଦୁଇ ଗୋଡ଼ ଭାଙ୍ଗିଯାଇଥିବା ଜଣାପଡିଥିଲା। ପ୍ରସବ ଦିନ ଅପରେଶନ ଗୃହରେ କୌଣସି ଡାକ୍ତର ଉପସ୍ଥିତ ନ ଥିବାରୁ କେତେଜଣ ଷ୍ଟାଫ ନର୍ସ ତାଙ୍କ ପ୍ରସବ କରାଇଥିଲେ। ପ୍ରସବ ପରେ ଶିଶୁ ତାଙ୍କ ହାତରୁ ଖସି ତଳେ ପଡ଼ିଯାଇଥିଲା। ଫଳରେ ଶିଶୁର ଏଭଳି ଅବସ୍ଥା ହୋଇଥିବା ହେମନ୍ତ ଗଣମାଧ୍ୟମକୁ କହିଛନ୍ତି।
