ପାରାଦୀପ,୧୧ା୭(ସ୍ବ.ପ୍ର.): ବିଶ୍ୱର କ୍ରମ ବର୍ଦ୍ଧିଷ୍ଣୁ ଜନସଂଖ୍ୟାକୁ ନେଇ ଏବେ ସବୁ ଦେଶରେ ଉଦ୍ବେଗ ପ୍ରକାଶ ପାଉଛି। ଏପରି କି ଜନସଂଖ୍ୟା ନିୟନ୍ତ୍ରଣ ପାଇଁ କେତେକ ଦେଶରେ କଡ଼ାକଡି ଆଇନ ପାଳନ କରାଯାଉଛି। ଆମ ଦେଶରେ ଜନସଂଖ୍ୟା ନିୟନ୍ତ୍ରଣ ପାଇଁ ସରକାରୀସ୍ତରରେ ସଚେତନତା ସୃଷ୍ଟି କରାଯାଉଛି। ତେବେ ଉଲ୍ଲେଖନୀୟ କଥା ହେଲା ଆମ ଦେଶର ପ୍ରତ୍ୟେକ ଅଞ୍ଚଳରେ ଜନସଂଖ୍ୟା ବଢୁଥିବାବେଳେ ପାରାଦୀପରେ ତାହାର ବ୍ୟତିକ୍ରମ ଦେଖାଯାଉଛି। ଅର୍ଥାତ୍ ପାରାଦୀପରେ ୨୦୦୧ରୁ କ୍ରମାଗତ ଭାବେ ଜନସଂଖ୍ୟା ହ୍ରାସ ପାଉଛି। ୨୦୦୧ ସରକାରୀ ଜନଗଣନା ଅନୁସାରେ ପାରାଦୀପ ପୌରାଞ୍ଚଳର ଜନସଂଖ୍ୟା ଥିଲା ୭୩,୬୨୫। କିନ୍ତୁ ୨୦୧୧ ଜନଗଣନା ବେଳେ ଏହି ସଂଖ୍ୟା ହ୍ରାସ ପାଇ ୬୮,୩୧୦ରେ ପହଞ୍ଚତ୍ଥିଲା। ସେଥିରେ ପୁରୁଷ ୩୭,୧୪୬ ଓ ମହିଳା ୩୧୧୬୪ ଥିଲେ। ଅର୍ଥାତ୍ ୧୦ ବର୍ଷରେ ୫୩୧୫ ହ୍ରାସ ପାଇଥିଲା। ଏବେ ପୁଣି ୨୦୨୧ ଜନଗଣନା ପାଇଁ ସରକାରୀ ଭାବେ ପ୍ରସ୍ତୁତି ଆରମ୍ଭ ହେଲାଣି। ଏଥିରେ ଆଉ କିଛି ଜନସଂଖ୍ୟା କମିବାର ସମ୍ଭାବନା ଥିବା କୁହାଯାଉଛି। ଏହାର ମୁଖ୍ୟ କାରଣ ହେଉଛି ଘରୋଇକରଣ ଓ ଯାନ୍ତ୍ରିକୀକରଣ। ୨୦୦୧ରେ ପାରାଦୀପ ବନ୍ଦର କର୍ମଚାରୀ ସଂଖ୍ୟା ୭୫୦୦ ଓ ଶ୍ରମିକଙ୍କ ସଂଖ୍ୟା ୧୦ହଜାରରୁ ଊର୍ଦ୍ଧ୍ୱ ଥିଲା। ସମୟ କ୍ରମେ ଏହି ସଂଖ୍ୟା କମିବାରେ ଲାଗିଲା। ୨୦୧୯ ମାର୍ଚ୍ଚ ୩୧ ସୁଦ୍ଧା ବନ୍ଦର କର୍ମଚାରୀଙ୍କ ସଂଖ୍ୟା ୭୦୦ ମଧ୍ୟରେ ରହିଛି। ସେହିପରି ଶତାଧିକ ଶ୍ରମିକଙ୍କ କାମ ଏବେ ମାତ୍ର ଗୋଟିଏ ମେଶିନ କରୁଛି। ନୂତନ ନିଯୁକ୍ତି ମଧ୍ୟ ନାହିଁ କହିଲେ ଚଳେ। ପାରାଦୀପରେ ଅନେକ ସଂସ୍ଥା ବନ୍ଦ ହୋଇଗଲାଣି। ଶିଳ୍ପ ସଂସ୍ଥାରେ ଯେଉଁମାନେ କାମ କରୁଛନ୍ତି, ସେମାନେ ଠିକା ଶ୍ରମିକ। ଠିକା ସଂସ୍ଥାର କାମ ସରିଲେ ଶ୍ରମିକଙ୍କ ଚାକିରି ଶେଷ। ଏଥିପାଇଁ ଇନ୍ଦିରା ପାର୍କ, ଘନଗଳିଆ, ସାନପଡ଼ିଆ, ପତ୍ରିକା ମହଲ, ନେହେରୁ ବଙ୍ଗଳା ସିଆଇଏସ୍ଏଫ୍ କମ୍ପ୍ଲେକ୍ସ, ୟୁଗୋସ୍ଲୋଭାକିଆ କଲୋନୀ ପାରାଦୀପ ମାନଚିତ୍ରରୁ ଲିଭିଗଲାଣି। ଏବେ ସେଠାରେ ମେଶିନ ଓ ପଣ୍ୟ ସାମଗ୍ରୀ ଦେଖିବାକୁ ମିଳୁଛି। ଜନସଂଖ୍ୟା ହ୍ରାସ ପାଇବା ଦ୍ୱାରା ପୌର ପାଳିକା ପ୍ରତି ବିପଦ ସୃଷ୍ଟି ହୋଇଛି। ୫୦ହଜାରରୁ ଅଧିକ ଜନସଂଖ୍ୟା ଥିଲେ ପୌର ପାଳିକା ଓ କମ୍ ଥିଲେ ବିଜ୍ଞାପିତ ଅଞ୍ଚଳ ହେବ ବୋଲି ନିୟମ ରହିଛି। ୨୦୨୧ ଜନଗଣନାରେ ଯଦି ଜନସଂଖ୍ୟା ହ୍ରାସ ପାଏ, ତେବେ ପାରାଦୀପ ପୁଣି ବିଜ୍ଞାପିତ ଅଞ୍ଚଳ(ଏନ୍ଏସି) ହୋଇପାରେ। ୧୯୭୯ରେ ପାରାଦୀପକୁ ଏନଏସି ମାନ୍ୟତା ମିଳିଥିଲା। ୨୦୦୨ରେ ପୌର ପାଳିକା ମାନ୍ୟତା ମିଳିଲା। ୨ବର୍ଷ ହେଲା ପୌର ପାଳିକାକୁ ବିସ୍ତାର କରିବାକୁ ଉଦ୍ୟମ ଚାଲିଛି। ଇଫ୍କୋ, ତୈଳ ବିଶୋଧନାଗାର, ମୂଷାଡିଆ, ବିଜୟଚନ୍ଦ୍ରପୁର, ଉଦୟ ବିହାର, ଗଡ଼ ପଞ୍ଚାୟତ ଅଞ୍ଚଳକୁ ସାମିଲ କରାଯିବ ବୋଲି ପୌରାଧ୍ୟକ୍ଷ ବସନ୍ତ ବିଶ୍ୱାଳ କହୁଛନ୍ତି। ଏହା ହେଲେ ଜନସଂଖ୍ୟା ବଢିଯିବ। ନଚେତ ମ୍ୟୁନିସିପାଲିଟିରୁ ଏନ୍ଏସି ହେବାକୁ ଏଡାଇ ଦିଆଯାଇ ନ ପାରେ। ଏ ସମ୍ପର୍କରେ ନିର୍ବାହୀ ଅଧିକାରୀ ଦିଲୀପ କୁମାର ମହାନ୍ତି କହିଛନ୍ତି ଯେ, ବନ୍ଦରାଞ୍ଚଳ ସୀମା ଭିତରେ ପୌର ପରିଷଦର ସୀମା। ବନ୍ଦର କର୍ମଚାରୀ ହ୍ରାସ ପାଇବାରୁ ସେମାନେ ଗଁାକୁ ପଳାଉଛନ୍ତି। ତେଣୁ ଜନସଂଖ୍ୟା ହ୍ରାସ ପାଉଛି।
