ନୂଆଦିଲ୍ଲୀ,୧୪।୨:ଦିଲ୍ଲୀ ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ ଭାଜପା ଓ କଂଗ୍ରେସ ନେତାଙ୍କ ଚେତା ପଶିଛି। ଭାଜପା ନେତାମାନଙ୍କ ବିବାଦୀୟ ମନ୍ତବ୍ୟ ହିଁ ଦଳ ପାଇଁ ବିପର୍ଯ୍ୟୟ ଆଣିଦେଇଥିବା ଗୁରୁବାର ଖୋଦ୍ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ମାନିଛନ୍ତି। ସେହିପରି କଂଗ୍ରେସର ପରାଜୟକୁ ନେଇ ମଧ୍ୟ ମାନସମନ୍ଥନ ଚାଲିଛି। ବରିଷ୍ଠ ନେତା ଜୟରାମ ରମେଶ ଏହାକୁ କରୋନା ଭାଇରସ୍ ସହ ତୁଳନା କରିଥିବାବେଳେ ଦଳକୁ ନୂଆ ବିଚାରଧାରା ଓ କାର୍ଯ୍ୟ ପ୍ରଣାଳୀର ଆବଶ୍ୟକତା ରହିଥିବା ସାଧାରଣ ସମ୍ପାଦକ ଜ୍ୟୋତିରାଦିତ୍ୟ ସିନ୍ଧିଆ ମତ ଦେଇଛନ୍ତି।
ଗତ ୮ ତାରିଖରେ ଦିଲ୍ଲୀ ବିଧାନସଭା ନିର୍ବାଚନ ହୋଇଥିଲା। ଭୋଟଗ୍ରହଣ ଯାଏ ଏପରି କି ୧୧ ତାରିଖରେ ଫଳାଫଳ ଆସିବା ପର୍ଯ୍ୟନ୍ତ ତିନି ପ୍ରମୁଖ ଦଳ ଆମ୍ ଆଦ୍ମୀ ପାର୍ଟି (ଏଏପି), ଭାଜପା ଓ କଂଗ୍ରେସର ନେତାମାନେ ପରସ୍ପରକୁ କାଦୁଅ ଫିଙ୍ଗି ମତଦାତାଙ୍କୁ ଆକର୍ଷିତ କରିବାରେ ଲାଗିଥିଲେ। ହେଲେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏଥର ଟିକେ ଚାଲାକ ହୋଇ ସଂଯମ ରହିଥିବା ଦେଖାଯାଇଥିଲା। ଏଏପି ୬୩ ଆସନରେ ବିଜୟୀ ହୋଇ ପୁନଃ ସରକାର ଗଠନ କରିବାକୁ ଯାଉଥିବାବେଳେ ଭାଜପା ଏବଂ କଂଗ୍ରେସ ଶିବିରରେ ନୈରାଶ୍ୟ ଲାଗିରହିଛି। ଏହାକୁ ନେଇ ପ୍ରଥମଥର ପାଇଁ ମୁହଁ ଖୋଲିଛନ୍ତି ସ୍ବରାଷ୍ଟ୍ରମନ୍ତ୍ରୀ। ଏକ ଟିଭି କାର୍ଯ୍ୟକ୍ରମରେ ଗୁରୁବାର ଶାହା କହିଛନ୍ତି, ନିର୍ବାଚନ ପ୍ରଚାର ବେଳେ ଭାଜପା ନେତାମାନେ ‘ଗୁଳି କର’ ଓ ‘ଭାରତ-ପାକିସ୍ତାନ ମ୍ୟାଚ୍’ ଭଳି ମନ୍ତବ୍ୟ ଦେବା ଉଚିତ ନ ଥିଲା। ସମ୍ଭବତଃ ଏଭଳି ମନ୍ତବ୍ୟ ଯୋଗୁ ଭାଜପାକୁ ବହୁମୂଲ୍ୟ ଦେବାକୁ ପଡ଼ିଛି। ବିବାଦୀୟ ମନ୍ତବ୍ୟର ଖରାପ ପ୍ରଭାବ ଆମ ପ୍ରଦର୍ଶନ ଉପରେ ପଡ଼ିଛି ବୋଲି ଶାହା ସ୍ବୀକାର କରିଛନ୍ତି।
ଅନ୍ୟପକ୍ଷରେ ବରିଷ୍ଠ କଂଗ୍ରେସ ନେତା ଜୟରାମ ରମେଶ ଏକ ନ୍ୟୁଜ୍ ଏଜେନ୍ସିକୁ ସାକ୍ଷାତ୍କାର ଦେଇ କହିଛନ୍ତି, ଦିଲ୍ଲୀ ନିର୍ବାଚନରେ ଦଳର ପରାଜୟ କରୋନା ଭାଇରସ୍ ଭଳି ଏକ ବୃହତ୍ ବିପର୍ଯ୍ୟୟ। ଭୋଟ ଧ୍ରୁବୀକରଣ ପାଇଁ ଭାଜପା ଶାହିନବାଗର ସିଏଏ ବିରୋଧୀ ବିକ୍ଷୋଭକୁ ବ୍ୟବହାର କରିଥିଲା। ଭାଜପା ନିର୍ବାଚନ ଜିତିପାରି ନାହିଁ। କିନ୍ତୁ ଏହି ଫଳାଫଳ କଂଗ୍ରେସ ପାଇଁ ବିପର୍ଯ୍ୟୟ ଆଣିଦେଇଛି। ଏହା କରୋନା ଭାଇରସ୍ ଭଳି। ତେଣୁ କଂଗ୍ରେସକୁ ଲୋକଙ୍କ ନିକଟରେ ପ୍ରାସଙ୍ଗିକ ହେବାକୁ ହେଲେ ଆମତ୍ସମୀକ୍ଷା କରିବାକୁ ପଡ଼ିବ। ଆମକୁ ଅହଂକାର ଛାଡ଼ିବାକୁ ପଡ଼ିବ। ୬ ବର୍ଷ ଧରି କ୍ଷମତାରୁ ଦୂରରେ ଥାଇ ସୁଦ୍ଧା କେତେଜଣ ନେତା ଏପରି ବ୍ୟବହାର କରୁଛନ୍ତି ସତେଯେମିତି ସେମାନେ ଏବେ ମଧ୍ୟ ମନ୍ତ୍ରୀ ଅଛନ୍ତି। ସେହିପରି ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି, ଦିଲ୍ଲୀ ଫଳାଫଳ ଆମ ଦଳ ପାଇଁ ଅତ୍ୟନ୍ତ ନୈରାଶ୍ୟଜନକ। କଂଗ୍ରେସରେ ନୂଆ ବିଚାରଧାରା ଓ କାର୍ଯ୍ୟ ପ୍ରଣାଳୀର ଆବଶ୍ୟକତା ରହିଛି। ଦେଶ ବଦଳୁଛି। ତେଣୁ ଆମକୁ ମଧ୍ୟ ଏକ ନୂଆ ଚିନ୍ତାଧାରା ଆପଣାଇ ଦେଶବାସୀଙ୍କ ସହ ଯୋଡ଼ିହେବାକୁ ପଡ଼ିବ ବୋଲି ସିନ୍ଧିଆ ମତବ୍ୟକ୍ତ କରିଛନ୍ତି।
