କଟକ ଅଫିସ,୧୦ା୨- ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ୨୩ବର୍ଷରୁ କମ୍ ସିକେ ନାଇଡୁ ଟ୍ରଫିର ଏକ ଲିଗ ମ୍ୟାଚ୍ରେ ଓଡ଼ିଶା ୬୭ରନରେ ପଣ୍ଡିଚେରୀଠାରୁ ହାରିଛି। ଦ୍ୱିତୀୟ ଇନିଂସରେ ଓଡ଼ିଶା ସମ୍ମୁଖରେ ୧୭୨ରନର ବିଜୟ ଲକ୍ଷ୍ୟ ଥିବା ବେଳେ ଦଳ ୧୦୫ରନରେ ଅଲଆଉଟ ହୋଇଥିଲା।
ପ୍ରଥମେ ବ୍ୟାଟିଂ କରିଥିବା ପଣ୍ଡିଚେରୀ ୧୧୫ରନରେ ଅଲଆଉଟ ହୋଇଥିଲା। ଓଡ଼ିଶା ପକ୍ଷରୁ ପ୍ରୀତ କନୱର ସିଂ ଚୌହ୍ବାନ ସର୍ବାଧିକ ୭ଟି ଉଇକେଟ ନେଇଥିଲେ। ଅମ୍ରିତ ଖଟୁଆଙ୍କ ୩୦ରନର ସଂଘର୍ଷପୂର୍ଣ୍ଣ ଇନିଂସ ସହାୟତାରେ ଓଡ଼ିଶା ପ୍ରଥମ ଇନିଂସରେ ୧୧୧ରନ କରିଥିଲା। ସତୀଶ ଜଞ୍ଜିର ପଣ୍ଡିଚେରୀ ପକ୍ଷରୁ ୫ଟି ଉଇକେଟ ଅକ୍ତିଆର କରିଥିଲେ। ପଣ୍ଡିଚେରୀର ଦ୍ୱିତୀୟ ଇନିଂସ ୧୬୮ରନରେ ସୀମିତ ରହିଥିଲା। ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟ ଘଟିଥିଲେ ସୁଦ୍ଧା ସତୀଶ ଜଞ୍ଜିର ୫୩ରନର ଧୁଆଁଧାର ଇନିଂସ ଖେଳିଥିଲେ। ପ୍ରୀତ କନୱର ଦ୍ୱିତୀୟ ଇନିଂସରେ ୬ଟି ଉଇକେଟ ଅକ୍ତିଆର କରିବା ସହ ମ୍ୟାଚ୍ରେ ମୋଟ୍ ୧୩ଟି ଉଇକେଟ ହାସଲ କରିଛନ୍ତି। ୧୭୨ରନର ବିଜୟ ଲକ୍ଷ୍ୟ ପିଛା କରୁଥିବା ଓଡ଼ିଶା ୫୩ରନରେ ପ୍ରଥମ ୪ଟି ଉଇକେଟ ହରାଇ ସଙ୍କଟରେ ପଡ଼ିଥିଲା। କ୍ଷମାସାଗର ବଳ ଓ ଅମ୍ରିତ ଦଳକୁ ବିଜୟ ନିମନ୍ତେ ଅଗ୍ରସର କରାଉଥିବା ବେଳେ କ୍ଷମାସାଗର ୭୧ବଲରୁ ୫୯ରନ କରି ଆଉଟ ହୋଇଥିଲେ। ପରେ ଓଡ଼ିଶାର ନିମ୍ନକ୍ରମର ବ୍ୟାଟିଂ ଲାଇନଅପ ଅଳ୍ପରନରେ ଭୁଶୁଡ଼ି ପଡ଼ିଥିଲା। ଅମ୍ରିତ ୧୬ରନରେ ଅପରାଜିତ ଥିଲେ। ପଣ୍ଡିଚେରୀ ପକ୍ଷରୁ ଏମ୍ ପୁଭିସରନ ସର୍ବାଧିକ ୪ଟି ଉଇକେଟ ଅକ୍ତିଆର କରିଥିଲେ।
