ନୟାଗଡ଼ ଅଫିସ,୧୧ା୧୨: ବିଭିନ୍ନ ସହରାଞ୍ଚଳରେ ପୌର ପ୍ରଶାସନର ପ୍ରତିନିଧିମାନଙ୍କ କାର୍ଯ୍ୟକାଳ ସରିଯାଇଥିବା ବେଳେ ସରକାରଙ୍କ ବିଭିନ୍ନ କାର୍ଯ୍ୟକ୍ରମକୁ ଅବ୍ୟାହତ ରଖିବା ପାଇଁ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଅଗଷ୍ଟ ମାସରେ ପ୍ରତି ୱାର୍ଡରେ ଅଫିସ ଖୋଲି ୱାର୍ଡ ଅଫିସର ନିଯୁକ୍ତି ଦେବା ପାଇଁ ପୌରାଞ୍ଚଳର ନିର୍ବାହୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲା। ଏହି ପରିପ୍ରେକ୍ଷୀରେ ନୟାଗଡ଼ ପୌରପରିଷଦର ୧୩ ୱାର୍ଡରେ ଅଫିସ ଖୋଲାଯାଇ ୧୦ଜଣ ନୋଡ଼ାଲ ଅଧିକାରୀଙ୍କୁ ୱାର୍ଡ ଅଫିସର ଭାବେ ନିଯୁକ୍ତ କରାଯାଇଥିଲା। ଏମାନଙ୍କର କାର୍ଯ୍ୟ ହେଉଛି ପ୍ରତ୍ୟହ ପୂର୍ବାହ୍ନ ୧୦ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଅଫିସରେ ରହି ୱାର୍ଡବାସୀଙ୍କ ଅଭିଯୋଗ ଶୁଣିବେ। ହେଲେ ନୟାଗଡ଼ ପୌରାଞ୍ଚଳରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ନିର୍ଦ୍ଧାରିତ ସମୟରେ ୱାର୍ଡ ଅଫିସରେ ତାଲା ଝୁଲୁଥିବାରୁ ଓ୍ବାର୍ଡବାସୀ ଅଭିଯୋଗ କରି ନ ପାରି ହଇରାଣ ହେଉଛନ୍ତି। ମଙ୍ଗଳବାର ପୂର୍ବାହ୍ନ ୧୦ଟା ୨୦ ମିନିଟ ସମୟରେ ୧୧ ଓ ୧୨ ନମ୍ବର ୱାର୍ଡ ପାଇଁ ଅଫିସ ହୋଇଥିବା ସିଦ୍ଧେଶ୍ୱରୀ କଲ୍ୟାଣ ମଣ୍ଡପ ଯାଇ ଦେଖିବାବେଳକୁ ସେଠାରେ ତାଲା ଝୁଲୁଥିଲା। ବିଜୁ ପଟ୍ଟନାୟକ କଲ୍ୟାଣ ମଣ୍ଡପ ଓ ଟାଉନ ହଲ୍ଠାରେ ଖୋଲାଯାଇଥିବା ଅଫିସରେ ମଧ୍ୟ ସମାନ ଅବସ୍ଥା ଦେଖାଯାଇଥିଲା।
ପ୍ରକାଶ ଯେ, ନୟାଗଡ଼ ପୌରପାଳିକାର ୧ ନମ୍ବର ୱାର୍ଡ ପାଇଁ ବିଜୁ ପଟ୍ଟନାୟକ କଲ୍ୟାଣ ମଣ୍ଡପ, ୨ନଂ. ପାଇଁ ସନ୍ତୋଷୀ ମା’ ମନ୍ଦିର, ୩ ନଂ.ର ହାଟପଦା ଅଙ୍ଗନୱାଡ଼ି, ୪ ଓ ୫ନଂ.ର ଟାଉନ ହଲ, ୬ନଂ. ନାଉରିସାହି କ୍ଲବ ଘର, ୭ ଓ ୮ ନମ୍ବର ୱାର୍ଡର ପୁରୁଣା ରାଜବାଟୀ, ୯ ଓ ୧୦ ନମ୍ବର ୱାର୍ଡର ରାମ ମନ୍ଦିର, ୧୧ ଓ ୧୨ ନମ୍ବର ୱାର୍ଡ଼ ଲାଗି ସିଦ୍ଧେଶ୍ୱରୀ କଲ୍ୟାଣ ମଣ୍ଡପ ଓ ୧୩ ନମ୍ବର ୱାର୍ଡ ପାଇଁ ଦିବ୍ୟଜ୍ୟୋତି କ୍ଲବରେ ୱାର୍ଡ ଅଫିସ ଖୋଲାଯାଇଛି। ୱାର୍ଡ ଅଫିସର ପୌରାଞ୍ଚଳର ଜନସାଧାରଣ ଓ ପୌର ପ୍ରଶାସନ ମଧ୍ୟରେ ସମନ୍ବୟକାରୀ ଅଧିକାରୀ ଭାବେ କାର୍ଯ୍ୟ କରିବେ। ସହରରେ ବସବାସ କରୁଥିବା ଜନସାଧାରଣ ସିଧାସଳଖ ନିଜ ସମସ୍ୟା ୱାର୍ଡ ଅଫିସରଙ୍କୁ ଜଣାଇବେ। ଏହାର ସମାଧାନ ନିମିତ୍ତ ୱାର୍ଡ ଅଫିସର ସମ୍ପୃକ୍ତ ବିଭାଗକୁ ନିର୍ଦ୍ଦେଶ ଦେବେ। ହେଲେ ପ୍ରକୃତରେ ଏଭଳି କିଛି ହୋଇପାରୁ ନାହିଁ। ଯେଉଁଠାରେ ୱାର୍ଡ ଅଫିସ ହୋଇଛି ସେଠାରେ କୌଣସି ସୂଚନା ଫଳକ ମଧ୍ୟ ଲଗାଯାଇ ନାହିଁ। ଫଳରେ ଜନସାଧାରଣ କେଉଁଠାରେ ଅଭିଯୋଗ କରିବେ ଜାଣି ପାରୁନାହାନ୍ତି। ସହରୀ ଲୋକଙ୍କୁ ହାତ ପାଆନ୍ତାରେ ସମସ୍ତ ସୁବିଧା ଯୋଗାଇଦେବାକୁ ସରକାର ଚେଷ୍ଟା କରୁଥିଲେ ମଧ୍ୟ ତାହା ଫଳପ୍ରଦ ହେଉ ନ ଥିବା ଦେଖିବାକୁ ମିଳିଛି। ଏ ନେଇ କିଛି ୱାର୍ଡ ଅଫିସର କହନ୍ତି, ଘର ଦେଲେ କ’ଣ ହେବ, ବସିବାକୁ ଚେୟାର ନାହିଁ। ଏହାଛଡା ଅଫିସରେ ରହି କାମ କରିବା ଯୋଗୁ ପୌରାଞ୍ଚଳର ବିଭିନ୍ନ ଟ୍ୟାକ୍ସ ଆଦାୟ କରିବାରେ ବାଧା ସୃଷ୍ଟି ହେଲା। ଫଳରେ ୱାର୍ଡ ଅଫିସରେ ତାଲା ପକାଇ ଟ୍ୟାକ୍ସ ଆଦାୟ କରୁଥିବା ପ୍ରକାଶ କରିଛନ୍ତି। କାର୍ଯ୍ୟନିବାର୍ହୀ ଅଧିକାରୀ ସନ୍ତୋଷ କୁମାର ଜେନା କହନ୍ତି, ୱାର୍ଡ ଅଫିସରମାନେ ୱାର୍ଡରେ ରହୁ ନ ଥିଲେ ସେମାନଙ୍କୁ ଏଥିପାଇଁ ତାଗିଦ୍ କରାଯିବ। ଆଗାମୀ ଦିନରେ ଏହା କିଭଳି କାର୍ଯ୍ୟକାରୀ ହେଉଛି ତାହା ଦେଖିବାକୁ ସ୍ଥାନୀୟ ଲୋକେ ଅପେକ୍ଷା କରିଛନ୍ତି।
