ରାୟପୁର, ୩୦।୧: ଭୋଟରଙ୍କୁ ହାତେଇବା ପାଇଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁ ଥିବା ପ୍ରାର୍ଥୀମାନେ ବେଳେବେଳେ କେତେକ ଉପହାର ଦେଇଥାନ୍ତି। କିନ୍ତୁ ନିର୍ବାଚନରେ ପରାଜିତ ହେବାପରେ ଏହାକୁ ଭୋଟରଙ୍କଠାରେ ଫେରାଇ ନେବା କଥା ଶୁଣିଲେ ଯେ କେହି ଆଶ୍ଚର୍ଯ୍ୟ ହେବ। ତେବେ ଏଭଳି ଏକ ଘଟଣା ଛତିଶଗଡ଼ ରାୟପୁରରେ ଘଟିଛି। ଏଠାରେ ପଞ୍ଚାୟତ ନିର୍ବାଚନରେ ଜଣେ ପ୍ରାର୍ଥୀ ହାରିବା ପରେ ଭୋଟରଙ୍କୁ ଦେଇଥିବା ଉପହାର ଫେରାଇବାକୁ କହିଥିଲେ। ଏହା ଶୁଣି ଭୋଟରମାନେ ସମସ୍ତ ଉପହାରକୁ ସ୍ଥାନୀୟ ଏକ ଛକରେ ଆଣି ଜମା କରିଥିଲେ। ଏବେ ଏହା ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି। ସ୍ଥାନୀୟ ମନ୍ଦିରହସୌଦର ଭାନସୋଜ୍ ପଞ୍ଚାୟତରେ ନିର୍ବାଚନରେ ଚନ୍ଦ୍ରହାସ ଦେବାଙ୍ଗନ ଏବଂ ମନୋହର ଦେବାଙ୍ଗନ ପ୍ରତିଦ୍ୱନ୍ଦ୍ୱିତା ହେଉଥିଲା। ଏଥିରେ ମନୋହର ପରାଜିତ ହୋଇଥିଲେ। ଭୋଟରେ ଜିଣିବା ପାଇଁ ସେ ଭୋଟରଙ୍କୁ ପ୍ରେସର କ୍ରୁକର, ଗ୍ରାଇଣ୍ଡର, ପ୍ୟାଣ୍ଟ-ଶର୍ଟ, ମଦ ବୋତଲ ଆଦି ଦେଇଥିଲେ। ତେବେ ହାରିବା ପରେ ସେ ଲୋକଙ୍କୁ ଧମକ ଚମକ ଦେଇ ଏସବୁ ଫେରାଇବାକୁ କହିଥିଲେ। ଲୋକେ ଏସବୁକୁ ଆଣି ସ୍ଥାନୀୟ ବସ୍ଷ୍ଟାଣ୍ଡ୍ ଛକରେ ଜମା କରିଥିଲେ। ଳୋକଙ୍କୁ ଧମକ ଚମକ ଦେଇଥିବାରୁ ମନୋହରଙ୍କ ବିରୋଧରେ ପୋଲିସ ଏକ ମାମଲା ରୁଜୁ କରିଛି।
