ବାରଙ୍ଗ, ୨୫।୯(ଡି.ଏନ୍.ଏ.): ନନ୍ଦନକାନନ ପଶୁପକ୍ଷୀ ସୁରକ୍ଷା କମିଟି ପକ୍ଷରୁ ବୁଧବାର ସକାଳେ ନନ୍ଦନକାନନ ମୁଖ୍ୟ ପ୍ରବେଶପଥ ଫାଟକକୁ ବନ୍ଦ କରାଯାଇଥିଲା। ଜଟଣୀ ବିଧାୟକ ସୁରେଶ କୁମାର ରାଉତରାୟ ଓ ତପନ କୁମାର ଚକ୍ରବର୍ତ୍ତୀଙ୍କ ନେତୃତ୍ୱରେ କମିଟିର ସଦସ୍ୟମାନେ ଗେଟ କମ୍ପ୍ଲେକ୍ସ ଫାଟକ ସହ ବୁକିଂ କାଉଣ୍ଟର ବନ୍ଦକରି ଧାରଣାରେ ବସିଥିଲେ। ପରେ ଟିକେଟ ଯାଞ୍ଚ ଫାଟକକୁ ସେମାନେ ବନ୍ଦ କରିଥିଲେ। ଦାରୁଠେଙ୍ଗରେ ହୋଇଥିବା ଡମ୍ପିୟାଡ ଯୋଗୁ ନନ୍ଦନକାନନରେ ପଶୁପକ୍ଷୀଙ୍କ ସହ ୪ଟି ହାତୀଙ୍କ ମୃତ୍ୟୁ ଘଟିଛି। ଡମ୍ପିୟାଡ୍ ସ୍ଥାନାନ୍ତର, ଗାଇଡ୍ମାନଙ୍କ ସ୍ଥାୟିତ୍ୱ, ପଶୁପକ୍ଷୀଙ୍କ ସୁରକ୍ଷା ଓ ନୂଆ ଜୀବଜନ୍ତୁ ଆସିବା ଆଦି ୪ଦଫା ଦାବି ଉପରେ କମିଟିର ସଭ୍ୟମାନେ ଅଭିଭାଷଣ ଦେଇଥିଲେ। ପରେ ନନ୍ଦନକାନନ ଉପନିର୍ଦ୍ଦେଶକ ଜୟନ୍ତ କୁମାର ଦାଶ ୪ଦଫା ସମ୍ବଳିତ ଦାବିପତ୍ର ଗ୍ରହଣ କରିବା ପରେ ସାଢ଼େ ୧୦ଟାରେ ନନ୍ଦନକାନନ ଫାଟକ ଖୋଲିଥିବା ଜଣାପଡ଼ିଛି।
