ପଟ୍ଟାମୁଣ୍ଡାଇ, ୧ା୫ (ସ୍ବ.ପ୍ର.): କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇ ବ୍ଲକ୍ ଗଙ୍ଗାରାମପୁର ପଞ୍ଚାୟତ ଗୁଣୁପୁର ପାଟଣା ଗ୍ରାମର ଅଲେଖ ଦାସଙ୍କ ପରିବାର ଏବେ ଅସହାୟ ହୋଇ ପଡିଛନ୍ତି। କରୋନା ପାଇଁ ତାଲା ବନ୍ଦ ତାଙ୍କ ପରିବାର ପାଇଁ ଅଭିଶାପ ପାଲଟିଛି। ଶ୍ରମଜୀବୀ ଅଲେଖଙ୍କ ଭଉଣୀ ଚିନ୍ମୟୀ ଧନୁଷ୍ଟଙ୍କାର ରୋଗରେ ପୀଡିତ ହୋଇଥିବା ବେଳେ ଏକମାତ୍ର ୩ ବର୍ଷର ପୁଅ ଥାଲାସେମିଆରେ ଆକ୍ରାନ୍ତ ହୋଇ ଦୁର୍ଦ୍ଦଶା ଭୋଗୁଛନ୍ତି। ଅଲେଖ ଜଣେ ଦିନ ମଜୁରିଆ। ଘରେ ଭଉଣୀ, ପୁଅଙ୍କ ସହିତ ତାଙ୍କ ସ୍ତ୍ରୀ ଅଛନ୍ତି। ଭଉଣୀର ଚିକିତ୍ସା ପାଇଁ ପ୍ରତି ମାସରେ ୩ ହଜାର ଟଙ୍କାର ଔଷଧ ଓ ପୁଅ ଲାଗି ୨ ମାସରେ ଥରେ ରକ୍ତର ଆବଶ୍ୟକତା ଅଛି। ଏପରିସ୍ଥଳେ ଶ୍ରମ ଅନ୍ବେଷଣରେ ଅଲେଖ ୪ ମାସ ତଳେ ହାଇଦ୍ରାବାଦ ଚାଲି ଯାଇଥିଲେ। ଏବେ ପରିବାର ଅଭାବ ଅନଟନରେ ଥିବାବେଳେ ଚିକିତ୍ସା ସେବା ପାଇବା କଷ୍ଟକର ହୋଇଛି। ଏ ସମ୍ପର୍କରେ ଗତ ୨୧ ତାରିଖରେ ଧରିତ୍ରୀରେ ଖବର ପ୍ରକାଶ ପାଇବା ପରେ ଡିଜେ ସେବା ସମବାୟ ସମିତିର ମୁଖ୍ୟ ପ୍ରତାପ ଚନ୍ଦ୍ର ପାଢୀ ଓ ଜିଲା ଧର୍ମରକ୍ଷା ସମିତିର ମାଧବ ଚନ୍ଦ୍ର ପ୍ରଧାନ, ଶଶାଙ୍କ କୁମାର ଜେନା ଅଲେଖଙ୍କ ଘରେ ପହଞ୍ଚତ୍ ୨୦ ଦିନର ରାଶନ ସାମଗ୍ରୀ ସହିତ ୩ ହଜାର ଟଙ୍କା ସହାୟତା ଦେଇଥିଲେ। ଏକ ସ୍ବେଚ୍ଛାସେବୀ ସଙ୍ଗଠନ ପକ୍ଷରୁ ପ୍ରତି ମାସରେ ଥାଲାସେମିଆ ପୁଅକୁ ରକ୍ତ ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ଏଥିନେଇ ସରପଞ୍ଚ ପ୍ରଫୁଲ୍ଲ କୁମାର ତରାଇ ଓ ଗ୍ରାମର ସ୍ବେଚ୍ଛାସେବୀ ପ୍ରଭାକର ସାମଲ, ଶିବ ତରାଇ, ଅଲେଖ ପରିଡା ପ୍ରମୁଖ ଧରିତ୍ରୀର ପଦକ୍ଷେପକୁ ପ୍ରଶଂସା କରିଛନ୍ତି।
