କଟକ ଅଫିସ,୨୦ା୧୨- ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ଓଡ଼ିଶା-ସର୍ଭିସେସ୍ ରଣଜୀ ମ୍ୟାଚ୍ର ୩ୟ ଦିବସ ଖେଳ ଶେଷ ହୋଇଛି। ଘରୋଇ ମାଟିରେ ଓଡ଼ିଶା ପାଇଁ ଇନିଂସ ବିଜୟ ସୁଯୋଗ ରହିଛି। ସର୍ଭିସେସ୍ର ପ୍ରଥମ ଇନିଂସ ୨୭୧ରନରେ ସୀମିତ ରହିବା ପରେ ଓଡ଼ିଶା ପ୍ରଥମ ଇନିଂସରେ ୫୪୦ରନ ରନ ସଂଗ୍ରହ କରିଛି। ବାମହାତୀ ବ୍ୟାଟ୍ସମ୍ୟାନ ଦେବାଶିଷ ସାମନ୍ତରାୟ ଏହି ମ୍ୟାଚ୍ରେ କ୍ୟାରିୟରର ଶ୍ରେଷ୍ଠ ଇନିଂସ ଖେଳିଛନ୍ତି। ୧୯୫ରନ କରିଥିବା ଦେବାଶିଷ ଅଳ୍ପକେ ଦ୍ୱିଶତକରୁ ବଞ୍ଚିତ ହୋଇଛନ୍ତି। ଗୁରୁବାର ଷ୍ଟମ୍ପ ଅପସାରଣ ବେଳକୁ ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିବା ସର୍ଭିସେସ୍ ୩ଉଇକେଟ ହରାଇ ୮୬ରନ କରିଛି। ସର୍ଭିସେସ୍ ୧୮୩ରନ ପଛରେ ଥିବା ବେଳେ ବିଜୟ ନିମନ୍ତେ ଓଡ଼ିଶାକୁ ୭ଉଇକେଟ ଆବଶ୍ୟକ ହେଉଛି।
ଦ୍ୱିତୀୟ ଦିବସର ଅସମାପ୍ତ ଇନିଂସ୍ ୨୮୦/୬ରୁ ଓଡ଼ିଶା ଗୁରୁବାର ଖେଳ ଆରମ୍ଭ କରିଥିଲା। ୯୬ରନରେ ଅପରାଜିତ ଥିବା ଦେବାଶିଷ ୨୪୯ ବଲରୁ ଶତକ ପୂରଣ କରିଥିଲେ। ପ୍ରଥମ ଶ୍ରେଣୀ କ୍ରିକେଟରେ ଦେବାଶିଷଙ୍କର ଏହା ଦ୍ୱିତୀୟ ଶତକ। ୮ରନରେ ଅପରାଜିତ ଥିବା ପେସ୍ବୋଲର ଦେବବ୍ରତ ପ୍ରଧାନ ମଧ୍ୟ ଏଠାରେ କ୍ୟାରିୟରର ପ୍ରଥମ ଅର୍ଦ୍ଧଶତକ ହାସଲ କରିଥିଲେ। ୭ଟି ଚୌକା ଓ ୨ଟି ଛକା ବଳରେ ଦେବବ୍ରତ ୫୭ରନରେ ଆଉଟ ହୋଇଥିଲେ। ନିମ୍ନକ୍ରମର ବ୍ୟାଟ୍ସମ୍ୟାନଙ୍କ ସହାୟତାରେ ଦେବାଶିଷ ଦଳୀୟ ସ୍କୋରକୁ ୫୦୦ରନ୍ ଅତିକ୍ରମ କରାଇଥିଲେ। ପେସ୍ ବୋଲର ସୂର୍ଯ୍ୟକାନ୍ତ ପ୍ରଧାନ ବିସ୍ପୋରକ ଇନିଂସ ଖେଳିଥିଲେ। ସେ ୨୮ଟି ବଲରୁ ୪ ଚୌକା ଓ ୬ ଛକା ସହାୟତାରେ ୬୪ରନ କରିଥିଲେ। ଏହାଛଡ଼ା ରାଜେଶ ମହାନ୍ତି ୨୭ ଓ ବସନ୍ତ ମହାନ୍ତି ୧୪ରନ କରିଥିଲେ। ୪୦୩ବଲ ଖେଳି ୨୩ଟି ଚୌକା ସହାୟତାରେ ୧୯୫ରନ କରି ଦେବାଶିଷ ଅନ୍ତିମ ବ୍ୟାଟ୍ସମ୍ୟାନ ଭାବେ ଆଉଟ ହୋଇଥିଲେ। ସର୍ଭିସେସ୍ ଅଲରାଉଣ୍ଡର ଅରୁଣ ବାମଲ ସର୍ବାଧିକ ୪ଟି ଏବଂ ଦିୱେଶ ପଠାନିଆ, ସାଦବ ନଜାର, ସଚିଦାନନ୍ଦ ପାଣ୍ଡେ ୨ଟି ଲେଖାଏ ଉଇକେଟହାସଲ କରିଥିଲେ। ପ୍ରଥମ ଇନିଂସରେ ଓଡ଼ିଶା ୨୬୯ରନର ଅଗ୍ରଣୀ ହାସଲ କରିଥିଲା। ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିବା ସର୍ଭିସେସ ପ୍ରଥମ ଉଇକେଟରେ ୫୯ରନ ଯୋଡ଼ିଥିଲା। ଓପନର ନକୁଲ ବର୍ମା ୩୧ରନ କରିଥିବା ବେଳେ ଅଭିଷେକ ରାଉତଙ୍କ ଦ୍ୱାରା ରନଆଉଟ ହୋଇଥିଲେ। ପରେ ଅନ୍ୟତମ ଓପନର ମୁମତାଜ କାଦିର ୩୧ରନରେ ଓ ରବି ଚୌହ୍ବାନ ୨ରନରେ ରାଜେଶ ମହାନ୍ତିଙ୍କ ଶିକାର ହୋଇଥିଲେ। ଅଧିନାୟକ ରଜତ ପଲିୱାଲ ୬ରନରେ ଓ ରାହୁଲ ସିଂ ୧୪ରନରେ ଅପରାଜିତ ଅଛନ୍ତି।
