ବେଙ୍ଗାଲୁରୁ, ୨୬।୮ (ପି.ଟି.)- କରୁନ ନାୟାରଙ୍କ ଦମ୍ଦାର ଅପରାଜିତ ଶତକ ସତ୍ତ୍ୱେ ଇଣ୍ଡିଆ ବ୍ଲୁ ଓ ଇଣ୍ଡିଆ ରେଡ୍ ମଧ୍ୟରେ ଏଠାରେ ଅନୁଷ୍ଠିତ ଦୁଲୀପ୍ ଟ୍ରଫି ମ୍ୟାଚ୍ ଶେଷରେ ବିନା ହାର୍ଜିତ୍ରେ ଶେଷ ହୋଇଛି। ତେବେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ପ୍ରିୟଙ୍କ ପଞ୍ଚଲଙ୍କ ନେତୃତ୍ୱାଧୀନ ଇଣ୍ଡିଆ ରେଡ୍ ଦଳ ମ୍ୟାଚ୍ରୁ ୩ ପଏଣ୍ଟ ଅର୍ଜନ କରି ଫାଇନାଲ ଖେଳିବା ପାଇଁ ଦୃଢ଼ ଦାବିଦାର ହୋଇଛି। ଅପରପକ୍ଷରେ ଶୁବମନ ଗିଲ୍ଙ୍କ ନେତୃତ୍ୱାଧୀନ ଇଣ୍ଡିଆ ବ୍ଲୁ ଦୁଇ ମ୍ୟାଚ୍ ଖେଳି ୨ ଡ୍ର’ ସହ ୨ ପଏଣ୍ଟରେ ସନ୍ତୁଷ୍ଟ ରହିଛି। ଫଳରେ ଦଳର ଫାଇନାଲ ଖେଳିବା ଆଶା କ୍ଷୀଣ ହୋଇଯାଇଛି। ଇଣ୍ଡିଆ ରେଡ୍ ଏହାର ଅନ୍ତିମ ମ୍ୟାଚ୍ରେ ଇଣ୍ଡିଆ ଗ୍ରୀନକୁ ଅଗଷ୍ଟ ୨୯ରେ ଭେଟିବ।
ସ୍ଥାନୀୟ କର୍ନାଟକ ଷ୍ଟେଟ୍ କ୍ରିକେଟ୍ ଆସୋସିଏଶନ ଗ୍ରାଉଣ୍ଡରେ ଖେଳାଯାଇଥିବା ଏହି ମ୍ୟାଚ୍ର ସୋମବାର ଥିଲା ଅନ୍ତିମ ତଥା ୪ର୍ଥ ଦିବସ। ପୂର୍ବଦିନର ଅସମାପ୍ତ ୨ୟ ଇନିଂସ ସ୍କୋର ୯୩/୨ ରନରୁ ସୋମବାର ଖେଳ ଆରମ୍ଭ କରିଥିବା ଇଣ୍ଡିଆ ରେଡ୍ ପାଇଁ ନାୟାର ଦର୍ଶନୀୟ ବ୍ୟାଟିଂ କରିଥିଲେ। ପ୍ରଥମ ଇନିଂସରେ ମାତ୍ର ୧ ରନ୍ ପାଇଁ ଅଳ୍ପକେ ଶତକ ହାସଲରୁ ବଞ୍ଚତ୍ତ ହୋଇଥିବା ଏହି କର୍ନାଟକ ଡାହାଣହାତୀ ବ୍ୟାଟ୍ସମ୍ୟାନ ଏଥର କିନ୍ତୁ କୌଣସି ତ୍ରୁଟି ନ କରି ଅପରାଜିତ ୧୬୬ ରନର ଏକ ମାରାଥନ ଶତକୀୟ ଇନିଂସ ଖେଳିଥିଲେ। ଏହି ଇନିଂସ ମଧ୍ୟରେ ସେ ୧୯ ଚୌକା ଓ ଗୋଟିଏ ଛକା ମାରିଥିଲେ। ପ୍ରଥମ ଇନିଂସର ଶତକ ହାସଲକାରୀ ଅଙ୍କିତ କଲସି (୬୪ ରନ) ଓ ନାୟାର ୩ୟ ଉଇକେଟ୍ ଯୋଡ଼ିରେ ୧୫୭ ରନର ଭାଗୀଦାରି କରିଥିଲେ। ଇଣ୍ଡିଆ ରେଡ୍ ୮୮ ଓଭରରେ ୬ ଉଇକେଟ୍ ହରାଇ ୨୯୭ ରନ କରିଥିବାବେଳେ ଏହାର ୨ୟ ଇନିଂସ ଘୋଷଣା କରିବା ସହ ୩୨୮ ରନର ଟାର୍ଗେଟ୍ ଧାର୍ଯ୍ୟ କରିଥିଲା। ଏହାପରେ ମ୍ୟାଚ୍ରେ ଫଳାଫଳ ଆଶା କ୍ଷୀଣହେବାରୁ ଉଭୟ ଦଳର ଅଧିନାୟକଙ୍କ ସହମତି ଭିତ୍ତିରେ ଅମ୍ପାୟର ଡ୍ର’ ଘୋଷଣା କରିଥିଲେ। ମ୍ୟାଚ୍ର ଉଭୟ ଇନିଂସରେ ଯଥାକ୍ରମେ ୯୯ ଓ ୧୬୬* ରନ୍ କରିଥିବା କରୁନ ନାୟାର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ପୂର୍ବରୁ ଅଙ୍କିତ କଲାସି (୧୦୬) ଓ ନାୟାର (୯୯)ଙ୍କ ଉପଯୋଗୀ ବ୍ୟାଟିଂ ବଳରେ ଇଣ୍ଡିଆ ରେଡ୍ ଏହାର ପ୍ରଥମ ଇନିଂସରେ ୨୮୫ ରନ୍ କରି ଅଲ୍ଆଉଟ୍ ହୋଇଥିଲା। ଜବାବରେ ଇଣ୍ଡିଆ ବ୍ଲୁ ଅଙ୍କିତ ବାଓ୍ବନେ (୧୨୧*)ଙ୍କ ଶତକ ସତ୍ତ୍ୱେ ୨୫୫ ରନରେ ସୀମିତ ରହି ୩୦ ରନରେ ପଛୁଆ ରହିଥିଲା।
ସଂକ୍ଷିପ୍ତ ସ୍କୋର:
ଇଣ୍ଡିଆ ରେଡ୍ ପ୍ରଥମ ଇନିଂସ- ୨୮୫/୧୦ (ଅଙ୍କିତ ୧୦୬, ନାୟାର ୯୯, ଦିଓ୍ବେଶ ପଠାଣିଆ ୪/୫୫)।
ଇଣ୍ଡିଆ ବ୍ଲୁ ପ୍ରଥମ ଇନିଂସ- ୨୫୫/୧୦ (ବାଓ୍ବନେ ୧୨୧*, ଅଭେଶ ଖାଁ ୪/୫୮)।
ଇଣ୍ଡିଆ ରେଡ୍ ୨ୟ ଇନିଂସ- ୨୯୭/୬ରେ ଘୋଷଣା (ନାୟାର ୧୬୬*, ଅଙ୍କିତ ୬୪, ଇଶାନ କିଶାନ ୧୨, ଅକ୍ଷର ପଟେଲ ୯, ଜଲଜ ସସ୍କେନା ୪/୧୦୫)।
