ବୁଗୁଡ଼ା,୨୯ା୫(ଡି.ଏନ.ଏ.)- ଅଙ୍ଗନୱାଡ଼ି କର୍ମୀଙ୍କର ଦାବି ମେ ୩୧ ସୁଦ୍ଧା ପୂରଣ ନ ହେଲେ ଜୁନ ୧ରୁ କାର୍ଯ୍ୟ ବନ୍ଦ ଆନ୍ଦୋଳନ କରିବେ ବୋଲି ଶୁକ୍ରବାର ସ୍ଥାନୀୟ ସିଡିପିଓ କାର୍ଯ୍ୟାଳୟରେ ଅଧିକାରୀ ରଞ୍ଜିତା ତ୍ରିପାଠୀଙ୍କୁ ଲିଖିତ ଆକାରରେ ଅଲ୍ ଓଡ଼ିଶା ଅଙ୍ଗନୱାଡ଼ି ଲେଡିଜ୍ ସ୍ବାର୍କର୍ସ ଆସୋସିଏସନ ବୁଗୁଡ଼ା ଶାଖା ତରଫରୁ ଏକ ଦାବିପତ୍ର ପ୍ରଦାନ କରାଯାଇଛି। ସେମାନଙ୍କ ଅଭିଯୋଗ, ବ୍ଲକର ଅଙ୍ଗନୱାଡ଼ି କେନ୍ଦ୍ରର କର୍ମୀମାନେ ସରକାରଙ୍କ ନିର୍ଦ୍ଦେଶିତ ଆଇନ ଅନୁଯାୟୀ ସୂଚାରୁ ରୂପେ ଶୁଖିଲା ଖାଦ୍ୟ ସହ ଅଣ୍ଡା ବଣ୍ଟନ କରୁଥିଲେ। କିନ୍ତୁ ବର୍ତ୍ତମାନ ଏସ୍ଏଚଜି ମାଧ୍ୟମରେ ଅଣ୍ଡା ବଣ୍ଟନ ହେଉଥିବା ଯୋଗୁ କର୍ମୀମାନେ ଏହାକୁ ବିରୋଧ କରୁଛନ୍ତି। ସରକାରଙ୍କ ବିଭିନ୍ନ ନିୟମ ମାନି ବର୍ତ୍ତମାନ କରୋନା ଯୋଦ୍ଧା ଭାବେ ମୁଖ୍ୟମନ୍ତ୍ରୀଙ୍କ ଦ୍ୱାରା ପ୍ରଶଂସିତ ହେଉଛନ୍ତି। କିନ୍ତୁ ବର୍ତ୍ତମାନ ସମୟରେ ସେମାନଙ୍କୁ ଏପ୍ରିଲ୍ ଓ ମେ ମାସର ବିଲ୍ ମଧ୍ୟ ବନ୍ଦ କରିବାକୁ ଧମକ ଦିଆଯାଇଛି। ବର୍ତ୍ତମାନ ଅଙ୍ଗନୱାଡ଼ି କର୍ମୀଙ୍କୁ ପୂର୍ବପରି ରନ୍ଧାଖାଦ୍ୟ ଓ ଶୁଖିଲା ଖାଦ୍ୟ ବଣ୍ଟନ ସହ ଅଣ୍ଡା ବାଣ୍ଟିବାକୁ ସୁବିଧା ମିଳିବା ଓ ବକେୟା ୨ ମାସ ବିଲ ପ୍ରଦାନ କରାଯାଉ। ଅନ୍ୟଥା ଏସଏଚଜିଙ୍କୁ ସମସ୍ତ ଅଣ୍ଡା ବାଣ୍ଟିବା ସହ ରନ୍ଧା ଓ ଶୁଖିଲା ଖାଦ୍ୟ ସାମଗ୍ରୀ ବାଣ୍ଟିବା ଦାୟିତ୍ୱ ଦିଆଯାଉ ବୋଲି ସଂଘ ପକ୍ଷରୁ ସଭାପତି ବାସନ୍ତୀ କୁମାରୀ ପ୍ରଧାନ, ସମ୍ପାଦିକା ଅନିତା ମିଶ୍ର ପ୍ରମୁଖ କର୍ମକର୍ତ୍ତାମାନେ ଅଧିକାରୀଙ୍କୁ ଜଣାଇଛନ୍ତି।
