ଔପଦା, ୧୧।୯(ଡି.ଏନ.ଏ.)-ବାଲେଶ୍ୱର ଜିଲା ଔପଦା ବ୍ଲକ ଗଡ଼ସାହି ପଞ୍ଚାୟତ ଗଡ଼ସାହି ଓ ଭରଡ଼ାବାଟି ଗ୍ରାମରେ ହାତୀ ଉପଦ୍ରବ ଥମିବାର ନଁା ଧରୁନି। ଫଳରେ ଚାଷୀମାନେ ଅସନ୍ତୁଷ୍ଟ ହୋଇ ଚାଷ ଛାଡିଦେବେ ବୋଲି ଚେତାବନୀ ଦେଇଛନ୍ତି।
କୁଲଡ଼ିହା ହାତୀ ଅଭୟାରଣ୍ୟ ସଂଲଗ୍ନ ପାହାଡ଼ିତଳି ଆଦିବାସୀ ଗ୍ରାମ ଭରଡ଼ାବାଟି, ଗଡ଼ସାହି ଓ ଅତାସାହି ସଂଲଗ୍ନ ଧାନ କ୍ଷେତରେ ସଞ୍ଜ ହେବା ବେଳକୁ ହାଜର ହୋଇଯାଉଛନ୍ତି। ଯେତିକି ଖାଉଛନ୍ତି ତାହାଠୁ ଅଧିକ ଦଳଚକଟି ଧାନକ୍ଷେତ ନଷ୍ଟ କରି ଦେଉଛନ୍ତି। ଚାଷୀମାନେ ସଂଘବଦ୍ଧ ହୋଇ ହାତୀ ଘଉଡ଼ାଇବା ପାଇଁ ଗଛରେ ମଞ୍ଚା ବାନ୍ଧି ରାତି ଉଜାଗର ରହୁଛନ୍ତି। ମାତ୍ର କିଛି ଲାଭ ହେଉନି। ହାତୀପଲ ଆସିଲେ ଚାଷୀମାନେ ବାଣ ଫୁଟାଇବା ସହ ଘଣ୍ଟା ବଜାଇ ହୋହଲ୍ଲା କଲେ ମଧ୍ୟ କିଛି ଫରକ ପଡୁନାହିଁ। ଏ ନେଇ ଗଡ଼ସାହି ଗ୍ରାମର ନଟବର ଗିରି, ଦୁର୍ଯ୍ୟୋଧନ ଖେଜୁରିଆ, ବନମାଳି ମଢ଼େଇ, ମଙ୍ଗୁଳୁ କୁଅଁର, ଗୋପୀନାଥ କୁଅଁର, ଭରଡ଼ାବାଟି ଗ୍ରାମର ହରିହର ଖଟୁଆ, ପୁନ ବିଶ୍ୱାଳ, ଗୌତମ ଗଡ଼ଗାୟାଁ ଓ ଅତାସାହି ଗ୍ରାମର ପ୍ରଶାନ୍ତ ବେହେରା, କାଳନ୍ଦ୍ରୀ ଲେଙ୍କା ପ୍ରମୁଖ ହାତୀ ଉପଦ୍ରବ ପାଇଁ ହତାଶ ହୋଇ ଚାଷ ଛାଡ଼ି ଦେବାକୁ ସ୍ଥିର କରିଥିବା କହିଛନ୍ତି। ଅନ୍ୟପକ୍ଷରେ ହାତୀ ଉପଦ୍ରବ ରୋକିବା ସହ ଏହାର ସ୍ଥାୟୀ ପ୍ରତିକାର କରିବାକୁ ବନବିଭାଗ ନିକଟରେ ଚାଷୀମାନେ ଦାବି ଜଣାଇଛନ୍ତି। ଏ ସମ୍ପର୍କରେ ସ୍ଥାନୀୟ ବନବିଭାଗ ପଦାଧିକାରୀଙ୍କ ସହ ଯୋଗାଯୋଗ କରିବାରୁ ସେ କ୍ଷତିଗ୍ରସ୍ତ ଚାଷୀଙ୍କୁ ଉଚିତ୍ କ୍ଷତିପୂରଣ ଦେବାକୁ ପଦକ୍ଷେପ ନେଉଥିବା କହିଛନ୍ତି।
