କଟକରୋଡ଼,୨।୧୨(ଡି.ଏନ୍.ଏ.): ଥଇଥାନ ଦାବିରେ ବ୍ୟବସାୟୀ ଅଟଳ, ଉଚ୍ଛେଦକାରୀ ଟିମ୍କୁ ଲୋକଙ୍କ ବିରୋଧ ପରେ ଅଧିକାରୀମାନଙ୍କୁ ଫେରିବାକୁ ପଡ଼ିଛି। ସୋମବାର ଏଭଳି ଏକ ଘଟଣା ଘଟିଛି ଲକ୍ଷ୍ମୀସାଗର ଅଞ୍ଚଳରେ।
ସୂଚନାନୁଯାୟୀ, ଲକ୍ଷ୍ମୀସାଗର ହାଇସ୍କୁଲ ପାର୍ଶ୍ୱରେ ଦୀର୍ଘ ବର୍ଷ ଧରି ୨୦ରୁ ଊର୍ଦ୍ଧ୍ୱ ବ୍ୟବସାୟୀ ଦୋକାନ କରି ପରିବାର ପୋଷୁଛନ୍ତି। ସୋମବାର ପୂର୍ବାହ୍ନରେ ଦୋକାନ ଉଚ୍ଛେଦ ଲାଗି ଭୁବନେଶ୍ୱର ମହାନଗର ନିଗମ (ବିଏମ୍ସି)ଓ ଭୁବନେଶ୍ୱରର ଉନ୍ନୟନ କର୍ତ୍ତୃପକ୍ଷ(ବିଡିଏ)ର ଏକ ଟିମ୍ ସହ କମିଶନରେଟ୍ ପୋଲିସ ଘଟଣାସ୍ଥଳରେ ପହଞ୍ଚି ଥିଲେ। ତେବେ ଉଚ୍ଛେଦକାରୀ ଟିମ୍କୁ ଦେଖିବା ପରେ ଉତ୍ତେଜନା ଦେଖାଯାଇଥିଲା। ପ୍ରଥମେ ଥଇଥାନ୍ ପରେ ଉଚ୍ଛେଦ ଦାବିରେ ବହୁସଂଖ୍ୟାରେ ବ୍ୟବସାୟୀ ଓ ଅଞ୍ଚଳବାସୀ ଲକ୍ଷ୍ମୀସାଗର ସ୍କୁଲନିକଟରେ ରାସ୍ତା ଅବରୋଧ କରିଥିଲେ। ୨୦୧୬ ମସିହାରେ ବିଏମ୍ସି ପକ୍ଷରୁ ବ୍ୟବସାୟୀଙ୍କୁ ଭେଣ୍ଡିଂଜୋନ୍ ମାଧ୍ୟମରେ ଥଇଥାନ କରାଯିବା ପାଇଁ ସର୍ଭେ ହୋଇଥିଲେ ମଧ୍ୟ ତାହା ଏଯାବତ୍ ଯୋଗାଇ ଦିଆଯାଇ ନାହିଁ । ଫଳରେ ଦୋକାନ ଭାଙ୍ଗିବାକୁ ଦିଆଯିବ ନାହିଁ ବୋଲି ବ୍ୟବସାୟୀ ଅଡ଼ି ବସିଥିଲେ। ପୋଲିସ ବୁଝାସୁଝା କରିବା ଫଳରେ ବ୍ୟବସୟୀଙ୍କ ପକ୍ଷରୁ ବିଏମ୍ସିକୁ ୧୫ ଦିନ ସମୟ ମଗାଯାଇ ଥିଲ। ପରେ ରାସ୍ତା ଅବରୋଧ ହଟିବା ସହ (ବିଡିଏ/ ବିଏମ୍ସି) ଘଟଣାସ୍ଥଳରୁ ଫେରିଥିଲେ।
