ଯାଜପୁର ଅଫିସ,୧୪।୫: ରାଜ୍ୟ ସରକାର କଳାକାରମାନଙ୍କର ଏକ ଡାଟାବେଶ୍ ବା ତଥ୍ୟପୂର୍ଣ୍ଣ ତାଲିକା ପ୍ରସ୍ତୁତ କରିବାକୁ ଯାଉଛନ୍ତି। ପୂର୍ବରୁ ରାଜ୍ୟ ସରକାର ଜିଲା କଳା ସଂସ୍କୃତି ସଂଘ, ବ୍ଲକ କଳା ସଂସ୍କୃତି ସଂଘ ଗଠନ କରିଛନ୍ତି। ଯାହାଦ୍ୱାରା କଳାକାରମାନେ ସଂଗଠିତ ହେବା ସହ ସେମାନଙ୍କର କଳା ପ୍ରଦର୍ଶନ କରିଛନ୍ତି ଓ ଆର୍ଥିକ ସହଯୋଗ ମଧ୍ୟ ହାସଲ କରୁଛନ୍ତି। ଏହା କଳାକାରମାନଙ୍କ ଦ୍ୱାରା ସରକାରୀ ଯୋଜନାର ପ୍ରଚାର ପ୍ରସାର ସହ କଳା ପ୍ରଦର୍ଶନର ଏକ ଶ୍ରେଷ୍ଠ ମାଧ୍ୟମ ପାଲଟିଛି। ତେବେ ସରକାର ୫-ଟି ବ୍ୟବସ୍ଥା ଲାଗୁ କରିବା ପରେ ବର୍ତ୍ତମାନ ସମସ୍ତ ଜିଲାର କଳାକାରମାନଙ୍କ ତଥ୍ୟକୁ ଡାଟାବେଶ ମାଧ୍ୟମରେ ଉପଲବ୍ଧ କରାଇବାକୁ ନିଷ୍ପତ୍ତି ନେଇଛନ୍ତି। ଏହାଫଳରେ ପ୍ରତି ଜିଲାରେ ଥିବା କଳାକାରମାନଙ୍କ ସଂଖ୍ୟା ଓ କି ପ୍ରକାର କଳା ରହିଛି, ତାହା ଜାଣିବା ସହଜ ହେବ। ଏଥିପାଇଁ ରାଜ୍ୟ ସରକାରଙ୍କ ସଂସ୍କୃତି ବିଭାଗ ପକ୍ଷରୁ ସମସ୍ତ ଜିଲାପାଳମାନଙ୍କୁ ପତ୍ର ପଠାଯାଇଛି। ଏହି ଡାଟାବେଶ୍ରେ ପଞ୍ଜୀକୃତ କଳାକାରମାନଙ୍କର ନାମ, ପିତା/ସ୍ବାମୀଙ୍କ ନାମ, ଜନ୍ମ ତାରିଖ, ଲିଙ୍ଗ, ଠିକଣା, ଶିକ୍ଷାଗତ ଯୋଗ୍ୟତା, ଯେଉଁ କଳା ଅନୁଷ୍ଠାନରେ କାର୍ଯ୍ୟ କରୁଥିବେ ତାହାର ଠିକଣା, ଏହି ଅନୁଷ୍ଠାନ ସୋସାଇଟି ରେଜିଷ୍ଟ୍ରେସନ ଆକ୍ଟ ୧୮୬୦ ରେ ପଞ୍ଜୀକୃତ କି ନା, ଅନୁଷ୍ଠାନର ମୁଖ୍ୟ ବା ଗୁରୁଙ୍କ ନାମ, ଠିକଣା ଓ ଯୋଗାଯୋଗ ନମ୍ବର, କି ପ୍ରକାର ଭୂମିକା ନିର୍ବାହ କରନ୍ତି, ମାସିକ ରୋଜଗାର, ମେଧା ବୃତ୍ତି/ଜାତୀୟ ବୃତ୍ତି/ଗବେଷଣା ଫେଲୋଶିପ ପାଉଛନ୍ତି କି, ସରକାରୀ ବା ବେସରକାରୀ ଭାବେ ପୁରସ୍କୃତ, କଳା କ୍ଷେତ୍ରରେ ପ୍ରଶିକ୍ଷଣ ନେଇଛନ୍ତି କି, ପ୍ରଶିକ୍ଷଣର ଅବଧି, କଳାକାର ଭତ୍ତା, ବୃତ୍ତି ବା ସହାୟତା ମିଳିଛି କି, ମିଳୁଥିଲା କି, ବର୍ତ୍ତମାନର ପେଷା, ଆକାଶବାଣୀ, ଦୂରଦର୍ଶନର ସ୍ବୀକୃତିପ୍ରାପ୍ତ କଳାକାର କି, ଆଧାର ନମ୍ବର, ଭୋଟର କାର୍ଡର ନମ୍ବର ଉଲ୍ଲେଖ କରି ଆନୁସଙ୍ଗିକ ପ୍ରମାଣ ପତ୍ର ସଂଲଗ୍ନ କରି ନିଜ ଅଭିଜ୍ଞତାର ବିବରଣୀ ୨୫୦ ଶବ୍ବରେ ଲେଖି ଓ ସ୍ବାକ୍ଷର କରି ସମ୍ପୃକ୍ତ ବ୍ଲକରେ କିମ୍ବା ଜିଲା ସଂସ୍କୃତି କାର୍ଯ୍ୟାଳୟରେ ୨୮।୫।୨୦୨୦ ତାରିଖ ସୁଦ୍ଧା ଅବଗତ କରାଇବାକୁ କୁହାଯାଇଛି।
