ଜଳେଶ୍ୱର,୨୧।୧(ଡି.ଏନ.ଏ./ସ୍ବ.ପ୍ର.)-ଜଳେଶ୍ୱର ବ୍ଲକର ରାଇବଣିଆ ଏକ ଆଦିବାସୀ ଅଧ୍ୟୁୁଷିତ ଅଞ୍ଚଳ। ଏହି ଅଞ୍ଚଳରେ ଥିବା ବିଭିନ୍ନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ଓ ଆନୁଷଙ୍ଗିକ ବ୍ୟବସ୍ଥା ନ ଥିବାରୁ ସ୍ବାସ୍ଥ୍ୟସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଫଳରେ ରାଇବଣିଆ ଅଞ୍ଚଳର ଜନସାଧାରଣ ସ୍ବାସ୍ଥ୍ୟସେବା ପାଇବାରୁ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି। ଶିଖରପୁର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘଦିନ ହେଲା ଏମବିବିଏସ୍ ଡାକ୍ତର ନ ଥିବାରୁ ସୁଦୂର ଜଳେଶ୍ୱର ହସ୍ପିଟାଲ ଉପରେ ନିର୍ଭର କରୁଛନ୍ତି। ଏଥିପାଇଁ ଶିଖରପୁର ପଞ୍ଚାୟତର ସରପଞ୍ଚ ହରେକୃଷ୍ଣ ଗିରି, ସମିତିସଦସ୍ୟ ଝାଡ଼େଶ୍ୱର ଦାସ, ସମାଜସେବୀ ମିହିର କୁମାର ଆଚାର୍ଯ୍ୟଙ୍କ ନେତୃତ୍ୱରେ ପଞ୍ଚାୟତର ମହିଳା ଓ ପୁରୁଷମାନେ ୭ ଦଫା ଦାବିରେ ଜଳେଶ୍ୱର ତହସିଲ କାଯର୍ୟାଳୟ ସମ୍ମୁଖରେ ମଙ୍ଗଳବାର ଧାରଣାରେ ବସିଥିଲେ। ଧାରଣାସ୍ଥଳରେ ଜଳେଶ୍ୱର ଭାରପ୍ରାପ୍ତ ତହସିଲଦାର କ୍ଷୀରୋଦ ଚନ୍ଦ୍ର ପଣ୍ଡା ଓ ସିଡିଏମ୍ଓଙ୍କ ପ୍ରତିନିଧି ଭାବେ ହାତୀଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ଡା. ପ୍ରଭାସ ଚନ୍ଦ୍ର ନାୟକ ପହଞ୍ଚତ୍ ଧାରଣାକାରୀଙ୍କ ସହ ଆଲୋଚନା କରି ଦାବି ପୂରଣ ଦିଗରେ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ଦାବିଗୁଡିକ ମଧ୍ୟରେ ଜଣେ ଏମବିବିଏସ୍ ଡାକ୍ତର ନିଯୁକ୍ତି, ଆୟୁର୍ବେଦିକ ଡାକ୍ତର ଥିବା ବେଳେ ଆବଶ୍ୟକ ମୁତାବକ ଆୟୁର୍ବେଦିକ ଔଷଧ ଯୋଗାଇ ଦେବା, ସ୍ଥାୟୀ ସୁଇପର ନିଯୁକ୍ତି କରିବା, ଡାକ୍ତର ଓ କର୍ମଚାରୀମାନଙ୍କର ରହିବା ପାଇଁ ଗୃହ ନିର୍ମାଣ କରିବା, ଡାକ୍ତରଖାନା ଚତୁଃପାର୍ଶ୍ୱରେ ପାଚେରି ନିର୍ମାଣ କରିବା, ସ୍ଥାୟୀ ଜଗୁଆଳି ନିଯୁକ୍ତି, ଡାକ୍ତରଖାନା ପରିସରରେ ଉଜ୍ଜଳ ଆଲୋକ ବ୍ୟବସ୍ଥା କରିବା ଆଦି ଅନ୍ତର୍ଭୁକ୍ତ। ଧାରଣାରେ ପରେଶ ଚନ୍ଦ୍ର ପ୍ରଧାନ, ଅଜୟ ମଣ୍ଡଳ, ଶ୍ୟାମସୁନ୍ଦର ଦାସ, ଶାନ୍ତିଲତା ବେହେରା, ଅନ୍ନପୂର୍ଣ୍ଣା ଓଝା, କବିତା ରାଣୀ ଓଝା, ବିଷ୍ଣୁପ୍ରିୟା ଜେନା, ବନଜା ଦାସ, ଗୀତାଞ୍ଜଳି ଜେନା, ପ୍ରଭାତୀ ଦାସ, କବିତା ଜେନା, ସବିତା ଜେନା, ଯାମିନୀ ଦାସ ପ୍ରମୁଖ ବହୁ ମହିଳା ଓ ପୁରୁୁଷ ଯୋଗ ଦେଇଥିଲେ।
