ସୁରଟ୍, ୯ା୫: ଟ୍ରେନ୍ ବାତିଲ ପରେ ସୁରଟ୍ ସହରରେ ଦାଦନ ଶ୍ରମିକଙ୍କ ଅସମ୍ଭବ ଭିଡ଼ ଦେଖିବାକୁ ମିଳିଛି। ସେଠାରେ ଥିବା କମ୍ପାନୀଗୁଡ଼ିକ ଲକ୍ଡାଉନ ଯୋଗୁ ବନ୍ଦ ହୋଇଯିବା ଫଳରେ ଭୋକ ଉପାସରେ ରହୁଥିବା ପୂର୍ବାଞ୍ଚଳ ରାଜ୍ୟର ଶ୍ରମିକମାନେ ଘରକୁ ଫେରିବାର ଆଶା ରଖିଥିଲେ। ହେଲେ ଓଡ଼ିଶା ସରକାରଙ୍କ ପକ୍ଷରୁ ୩ ଟ୍ରେନ ବାତିଲ କରାଯିବା ପରେ ଏବେ ରାଜରାସ୍ତାରେ ଏମାନେ ଘୂରିବୁଲୁଛନ୍ତି। ଫଳରେ କରୋନା ଭୂତାଣୁ ଅଧିକ ବ୍ୟାପିବାର ଆଶଙ୍କା ପ୍ରକାଶ ପାଇଛି। ଶୁକ୍ରବାର ସେମାନେ ଏହି ଟ୍ରେନରେ ଘରକୁ ଫେରିବାର ଥିଲା। ଟ୍ରେନ ବାତିଲ ପରେ ଭୋକର ଦାଉ ସହ ଘରକୁ ଫେରିବାର ବ୍ୟଗ୍ରତା ଏବେ ସେମାନଙ୍କୁ ଅଥୟ କରିଛି। କେତେକ ସ୍ଥାନରେ ଏହି ଶ୍ରମିକମାନେ ବିକ୍ଷୋଭ କରି ପୋଲିସ ସହ ହାତାହାତି ହୋଇଛନ୍ତିି। ସେମାନଙ୍କ ଫେରିବା ଲାଗି କିଛି ବ୍ୟବସ୍ଥା ଗୁଜରାଟ ସରକାର କରିବା ଲାଗି ସେମାନେ ନେହୁରା ହେଉଛନ୍ତି। ପୋଲିସ ସେମାନଙ୍କୁ ବୁଝାଶୁଝା କରୁଥିଲେ ହେଁ ପରିସ୍ଥିତି ଅସମ୍ଭାଳ ରହିଛି। ବର୍ତ୍ତମାନ ସୁଦ୍ଧା ୧୮ ଶ୍ରମିକ ସ୍ପେଶାଲ ଟ୍ରେନ ସୁରଟରୁ କେତେକ ଶ୍ରମିକଙ୍କୁ ଧରି ଫେରିଛି। ଏହା ସହ ଓଡ଼ିଶା ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ସରକାର ୩ ଟ୍ରେନ ବାତିଲ କରିଛନ୍ତି। ଏହି ଟ୍ରେନ୍ଗୁଡ଼ିକ ମେ ୮ରେ ଶ୍ରମିକଙ୍କୁ ନେଇ ଫେରିବାର ଥିଲା ବୋଲି ସୁରଟ ଜିଲାପାଳ ଧବଲ ପଟେଲ ପ୍ରକାଶ କରିଛନ୍ତି। କେବଳ କରୋନା ନେଗେଟିଭ ଥିବା ଲୋକଙ୍କୁ ଫେରିବା ଲାଗି ନିର୍ଦ୍ଦେଶ ରହିଛି। ଏବେ ଶ୍ରମିକମାନେ ଧର୍ଯ୍ୟଧରି ସମୟକୁ ଅପେକ୍ଷା କରିବାକୁ ପଡ଼ିବ ବୋଲି ସେ କହିଛନ୍ତି। ରେଲଓ୍ବେ ଅଧିକାରୀଙ୍କୁ ଶ୍ରମିକମାନେ ଯିବା ଲାଗି ହୋଇଥିବା ଟିକେଟ ଅର୍ଥ ଫେରସ୍ତ କରିବାକୁ ଜିଲା ପ୍ରଶାସନ ପକ୍ଷରୁ କୁହାଯାଇଛି।
