ଗୋପାଳପୁର/କନିଷି,୧୬ା୧୦(ଡି.ଏନ.ଏ.):୧୬ନଂ ଜାତୀୟ ରାଜପଥ ରଣ୍ଢାଛକ ନିକଟରେ ରାସ୍ତା ପାର ହେଉଥିବାବେଳେ ଟ୍ରକ ଧକ୍କାରେ ବୁଧବାର ଭୋର ପ୍ରାୟ ୫ଟାରେ ଜଣେ ମହିଳାଙ୍କ ମୃତ୍ୟୁ ଘଟିଛି। ସେ ହେଲେ ଚିକରଡ଼ା ଗ୍ରାମର କନକ ବେହେରା (୫୫)। ଦୁର୍ଘଟଣା ପରେ ଚାଳକ ଟ୍ରକ୍ ଛାଡି ଘଟଣାସ୍ଥଳରୁ ଚମ୍ପଟ ମାରିଛି। ପରେ ଚିକରଡ଼ା ଗ୍ରାମବାସୀ ମୃତକଙ୍କ ପରିବାରକୁ କ୍ଷତିପୂରଣ ଓ ଓଭରବ୍ରିଜ୍ ନିର୍ମାଣ ଦାବିରେ ଟାୟାରି ଜାରି ୧୬ ନଂ. ଜାତୀୟ ରାଜପଥ ଅବରୋଧ କରିଥିଲେ। ନଂ.୨୫୫/୧୯ରେ ମାମଲା ରୁଜୁ କରି ପୋଲିସ ଟ୍ରକକୁ ଜବତ କରିବା ସହ ତଦନ୍ତ ଚଳାଇଛି।
ପ୍ରକାଶ ଯେ, କନକ ପ୍ରତିଦିନ ରଣ୍ଢା ଗ୍ରାମରୁ ପନିପରିବା ଧରି ବିକ୍ରିି ପାଇଁ ବ୍ରହ୍ମପୁର ସହରକୁ ଯାଇଥାନ୍ତି। ବୁଧବାର ଭୋରରେ କନକ ପନିପରିବା ଧରି ରାସ୍ତାପାର ହେଉଥିବାବେଳେ ଇଚ୍ଛାପୁର ଅଭିମୁଖେ ଯାଉଥିବା ଏକ ଟ୍ରକ ତାଙ୍କୁ ଧକ୍କା ଦେଇ ଚାଲି ଯାଇଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ସେଠାରେ କାର୍ଯ୍ୟରତ ଗୃହରକ୍ଷୀ ଟ୍ରକକୁ ପିଛାକରି କାବୁ କରିଥିଲେ। ତେବେ ଚାଳକ ଗାଡ଼ି ଛାଡ଼ି ପଳାଇଥିଲେ। ଖବର ପାଇ ଚିକରଡ଼ା ଗ୍ରାମବାସୀ ମୃତକଙ୍କ ପରିବାରକୁ କ୍ଷତିପୂରଣ ଓ ଓଭରବ୍ରିଜ୍ ନିର୍ମାଣ ଦାବିରେ ୧୬ ନଂ. ଜାତୀୟ ରାଜପଥକୁ ୫ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଅବରୋଧ କରିଥିଲେ।
