ବ୍ରହ୍ମପୁର ଅଫିସ,୧୬ା୧-୧୬ନଂ. ଜାତୀୟ ରାଜପଥ ଖଜୁରିଆ ବାଇପାସ ନିକଟରେ ବୁଧବାର ସନ୍ଧ୍ୟାରେ ଟିକ୍ଟକ୍ ଶୁଟିଂ କରୁଥିବା ବେଳେ ଦୁର୍ଘଟଣା ଘଟିଛି। ବାଇକ୍ରେ ବସି ୨ ଜଣ ଯୁବକ ଟିକ୍ଟକ୍ ଶୁଟିଂ କରୁଥିବା ବେଳେ ଟ୍ରକ୍ ଧକ୍କାରେ ଭିଣୋଇ (ବାଇକ୍ ଚାଳକ)ଙ୍କ ମୃତ୍ୟୁ ଘଟିଥିବା ବେଳେ ପଛରେ ବସିଥିବା ଶାଳକ ଗୁରୁତର ହୋଇଛନ୍ତି। ମୃତକ ହେଲେ ସଦର ଥାନା ଅନ୍ତର୍ଗତ ସୁକୁଣ୍ଡା ଗ୍ରାମର ଶିବ ଶଙ୍କର ସାହୁ (୩୨)। ଅନ୍ୟପଟେ ସଂଜ୍ଞାହୀନ ଅବସ୍ଥାରେ ଥିବା ଯୁବକ ଗୋଳନ୍ଥରା ଥାନା ଅଞ୍ଚଳର ଶିବ ପାତ୍ର (୨୨) ବୋଲି ପୋଲିସ ସ୍ପଷ୍ଟ କରିଛି।
ଘଟଣାରୁ ପ୍ରକାଶ, ବାଇକ୍ ନଂ. ଓଆର ୦୭ ଭି-୨୪୮୮ ରେ ଶିବ ଶଙ୍କର ସାହୁ ଓ ତାଙ୍କ ଶାଳକ ରାଜପଥ ଉପରେ ବାଇକ୍ରେ ବସି ଟିକ୍ଟକ୍ ଶୁଟିଂ କରୁଥିବା ବେଳେ ତାଙ୍କ ବାଇକ୍ ପଛପଟକୁ ଦ୍ରୁତଗତିରେ ଆସୁଥିବା ଏକ ଟ୍ରକ ଧକ୍କା ଦେଇଥିଲା। ଫଳରେ ସେମାନେ ଖସିପଡି ଥିଲେ। ସ୍ଥାନୀୟ ଲୋକେ ଉଭୟ ଗୁରୁତର ଆହତଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଏମ୍କେସିଜି ମେଡିକାଲକୁ ପଠାଇଥିଲେ। ସେଠାରେ ଡାକ୍ତର ଶିବ ଶଙ୍କର ସାହୁଙ୍କୁ ମୃତ ଘୋଷଣ କରିଥିଲେ। ଟ୍ରାଫିକ ପୋଲିସ ମୃତଦେହ ଜବତ କରି ନଂ.୦୩/୨୦ ରେ ମାମଲା ରଜୁ କରିଛି। ଅନ୍ୟପଟେ ଘଟଣା ପରେ ଟ୍ରକ ସେଠାରୁ ଫେରାର ହୋଇଯାଇଥିବା ଜଣା ପଡିଛି। ଜାତୀୟ ରାଜପଥରେ ଲାଗିଥିବା ସିସି ଟିଭି କ୍ୟାମେରା ଯାଞ୍ଚ କରି ପୋଲିସ ଦୁର୍ଘଟଣା ଘଟାଇଥିବା ଟ୍ରକର ସନ୍ଧାନ କରୁଥିବା ଜଣାପଡିଛି।
