ସରଣ୍ଡା,୧୮ା୫(ଡି.ଏନ୍.ଏ.): ବରଗଡ଼ ଜିଲା ଅତାବିରା ବ୍ଲକ ଅନ୍ତର୍ଗତ ଲରାସରା ପଞ୍ଚାୟତରେ ଖୋଲା ଯାଇଥିବା କ୍ୱାରାଣ୍ଟାଇନ୍ ସେଣ୍ଟରରେ ୧୮ ଜଣ ପ୍ରବାସୀ ଓଡ଼ିଆ କ୍ୱାରାଣ୍ଟାଇନ୍ ସେଣ୍ଟରରେ ରହିଛନ୍ତି। ସେମାନଙ୍କ ମଧ୍ୟରୁ ଆନ୍ଧ୍ରପ୍ରଦେଶର ବିଜୟଓ୍ବାଡାରୁ ଫେରିଥିବା ଟୁପାପଡ଼ା ଗ୍ରାମର ଶ୍ରମିକ ଦମ୍ପତି ରହିଛନ୍ତି। ଏଠାକୁ ସାଧାରଣ ଲୋକ ଯିବାକୁ ସମ୍ପୂର୍ଣ୍ଣ ନିଷେଧାଦେଶ ରହିଥିବା ବେଳେ ମା’ବାପାଙ୍କୁ ମାଦକ ଦ୍ରବ୍ୟ, ଭାଙ୍ଗ ଓ ଗୁଡାଖୁ ସହ କିଛି ଟଙ୍କା ଦେବା ପାଇଁ ପୁଅ ଚାଷଜମି ପଟୁ ଝରକା ଖୋଲି ଦେଇଥିଲେ। ଏହି ଘଟଣା ସ୍ଥାନୀୟ ଜନସାଧାରଣ ଦେଖି ଅଭିଯୋଗ କରିବା ପରେ ଟୁପାପଡ଼ା ଗ୍ରାମବାସୀ ଉକ୍ତ ଯୁବକଙ୍କୁ ଗ୍ରାମକୁ ପଶିବାକୁ ବାରଣ କରି ଲରାସରା ସରପଞ୍ଚଙ୍କୁ ଜଣାଇଥିଲେ। ପରେ ସରପଞ୍ଚ ରଣଜିତ୍ ସାହୁ ଉକ୍ତ ଯୁବକଙ୍କୁ ରବିବାର ସେହି କ୍ୱାରାଣ୍ଟାଇନ୍ ସେଣ୍ଟରରେ ଅଲଗା ଏକ କୋଠରିରେ ରଖିଛନ୍ତି । ତେବେ ଲରାସରା ପଞ୍ଚାୟତ ହାଇସ୍କୁଲର ଏହି କ୍ୱାରାଣ୍ଟାଇନ୍ ସେଣ୍ଟର(ଟିଏମ୍ସି)ରେ ଏପରି ଅବହେଳା କିଭଳି ହେଲା ସେ ନେଇ ତଦନ୍ତ କରିବାର ଆବଶ୍ୟକତା ରହିଛି। ନଚେତ୍ ଆଗକୁ ଆହୁରି ସମସ୍ୟା ସୃଷ୍ଟି ହେବ ବୋଲି ସଚେତନ ନାଗରିକ ମତପ୍ରକାଶ କରିଛନ୍ତି। ଏନେଇ ସରପଞ୍ଚ ରଣଜିତ ସାହୁଙ୍କୁ ପଚାରିବାରୁ ଏଠାରେ ସୁରକ୍ଷା ବ୍ୟବସ୍ଥାକୁ ଏବେ କଡ଼ାକଡ଼ି କରାଯାଇଛି ଆଗକୁ ଏଠାକୁ ୨୦୦ ପ୍ରବାସୀ ଓଡ଼ିଆ ଆସିବାର ଅଛି ବୋଲି କହିଛନ୍ତି।
