ଅନୁଗୋଳ ଅଫିସ୍, ୧୭।୩
କରୋନା ମୁକାବିଲା ପାଇଁ ଅନୁଗୋଳ ପ୍ରଶାସନ ସମସ୍ତ ପ୍ରସ୍ତୁତି ଆରମ୍ଭ କରିଦେଇଛି। ଆକ୍ରାନ୍ତଙ୍କ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟର ଜେରିଆଟିକ୍ ୱାର୍ଡକୁ କରୋନା ୱାର୍ଡ ଭାବେ ସୋମବାର ଜିଲାପାଳ ମନୋଜ କୁମାର ମହାନ୍ତି ଓ ଉପଜିଲାପାଳ ବାସୁଦେବ ଶତପଥୀ ଘୋଷଣା କରିଛନ୍ତି। ଏଥିସହ ମା’ ଏବଂ ଶିଶୁ ଚିକିତ୍ସାଳୟର ୬ ମହଲାରେ ୨୦ଟି ଅନ୍ତରୀଣ ଶଯ୍ୟାର ବ୍ୟବସ୍ଥା କରାଯାଇଛି। ସେହିପରି ମୁଖ୍ୟ ଚିକିତ୍ସାଳୟ ସହ ଗୋଷ୍ଠୀ ଓ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର୍ରରେ ଭିତ୍ତିଭୂମିର ବିକାଶ ପାଇଁ ଆବଶ୍ୟକ ଉପକରଣ ଯୋଗାଇ ଦିଆଯିବ ବୋଲି ଜିଲାପାଳ କହିଛନ୍ତି। ଅନ୍ୟପକ୍ଷରେ ଜିଲାପାଳଙ୍କ ଅଧ୍ୟକ୍ଷତାରେ ଜିଲାରେ ଥିବା ସମସ୍ତ ଘରୋଇ ମେଡିକାଲର ମୁଖ୍ୟଙ୍କୁ ନେଇ ଏକ ବୈଠକ ମଧ୍ୟ ଅନୁଷ୍ଠିତ ହୋଇଯାଇଛି। ଜିଲାର ପ୍ରତି ଘରୋଇ ମେଡିକାଲରେ କରୋନା କର୍ନର ଖୋଲିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
ବିଭିନ୍ନ ଘରୋଇ କ୍ଲିନିକ୍ରୁ ଆସିଥିବା କର୍ମକର୍ତ୍ତାମାନେ ସେମାନଙ୍କ କ୍ଲିନିକ୍ରେ କରୋନା କର୍ନର ଖୋଲିବା ସହ ସ୍ବତନ୍ତ୍ର ଅନ୍ତରୀଣ ଶଯ୍ୟା ରଖିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଥଣ୍ଡା, କାଶ ଓ ଛିଙ୍କରେ ଆକ୍ରାନ୍ତ ହୋଇ କ୍ଲିନିକକୁ ଆସିଥିବା ରୋଗୀଙ୍କୁ ସେମାନଙ୍କ ଯାତ୍ରା ବିବରଣୀ ଓ କେଉଁମାନଙ୍କ ସହ ମିଶିଛନ୍ତି ତାର ସବିଶେଷ ତଥ୍ୟ ସଂଗ୍ରହ କରିବାକୁ ଜିଲାପାଳ କହିଥିଲେ। ଏପରି କି କରୋନା ଭୂତାଣୁ ଥିବାର ସନ୍ଦେହ ହେଲେ ସେମାନଙ୍କୁ ଅନ୍ତରୀଣ ଶଯ୍ୟାରେ ରଖିବାକୁ କୁହାଯାଇଛି। ଯେଉଁମାନଙ୍କଠାରେ କରୋନା ଆକ୍ରାନ୍ତର କୌଣସି ଲକ୍ଷଣ ନାହିଁ ସେମାନେ ନିଜ ଘରେ ପୃଥକ କୋଠରୀରେ ୧୪ ଦିନ ରହିବେ ବୋଲି ନିର୍ଦ୍ଦେଶ ଦିଆଯାଇଛି। କରୋନା ଆକ୍ରାନ୍ତଙ୍କୁ ଚିକିତ୍ସା କରୁଥିବା ଡାକ୍ତର ଓ ସେମାନଙ୍କର ସହଯୋଗୀ ଆବଶ୍ୟକ ସୁରକ୍ଷା ଉପକରଣ ବ୍ୟବହାର କରି ଚିକିତ୍ସା କରିବାକୁ ଜିଲାପାଳ କହିଛନ୍ତି। ନର୍ସିଂହୋମଗୁଡ଼ିକର କରୋନା କର୍ନରରେ ୱାଶ୍ ବେସିନ, ହ୍ୟାଣ୍ଡ ସାନିଟାଇଜର ଓ ମାସ୍କ ମହଜୁଦ ରଖିବାକୁ ଜିଲାପାଳ ପରାମର୍ଶ ଦେଇଛନ୍ତି। ରାଜ୍ୟ ସରକାରଙ୍କ ନିୟମାବଳୀକୁ କଡ଼ାକଡ଼ି ପାଳନ କରି ସଂକ୍ରମଣ ସଂଖ୍ୟାକୁ ଶୂନରେ ରଖିବାକୁ ଜିଲାପାଳ ନର୍ସିଂହୋମ ମାଲିକମାନଙ୍କୁ କହିଛନ୍ତି। କରୋନା ଭୂତାଣୁ ବା କୋଭିଡ-୧୯ର ପରୀକ୍ଷା କୌଣସି ବେସରକାରୀ ଚିକିତ୍ସାଳୟରେ ହୋଇପାରିବ ନାହିଁ। ବିଭିନ୍ନ ଔଷଧ ଦୋକାନରେ ହ୍ୟାଣ୍ଡ ସାନିଟାଇଜର ଓ ମାସ୍କ ଅଧିକ ମୂଲ୍ୟରେ ବିକ୍ରି ହେଉଥିଲେ ସମ୍ପୃକ୍ତ ଅଞ୍ଚଳର ତହସିଲଦାର, ବିଡିଓ ଓ ପୌରପାଳିକାର ନିର୍ବାହୀ ଅଧିକାରୀମାନେ କାର୍ଯ୍ୟାନୁଷ୍ଠାନ ଗ୍ରହଣ କରିବେ। କ୍ଲିନିକଗୁଡିକର ଓପିଡିରେ କେତେ ଜଣ ଜ୍ୱର, କାଶ, ଛିଙ୍କରେ ଆକ୍ରାନ୍ତ ରୋଗୀ ପଞ୍ଜୀକରଣ କରୁଛନ୍ତି ତାର ତଥ୍ୟ ଜିଲା ମୁଖ୍ୟ ଚିକିତ୍ସାଳୟକୁ ପ୍ରଦାନ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ବୈଠକରେ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଅନୁଗୋଳ ଉପଜିଲାପାଳ ବାସୁଦେବ ଶତପଥୀ, ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡାକ୍ତର ପ୍ରତାପ କୁମାର ବେହେରା, ପିସିଆଣ୍ଡପିଏନ୍ଡିଟିର ପିଏ ପର୍ଶୁରାମ ପଣ୍ଡାଙ୍କ ସମେତ ବିଭିନ୍ନ ଘରୋଇ କ୍ଲିନିକର କର୍ମକର୍ତ୍ତାମାନେ ଯୋଗଦେଇଥିଲେ।
