ଭବାନୀପାଟଣା,୨୮।୯(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ଗଣ ବଳାତ୍କାର ମାମଲା ନୂଆମୋଡ଼ ନେଇଛି। ଶୁକ୍ରବାର ପୀଡ଼ିତା ମୁଖ୍ୟ ଅଭିଯୁକ୍ତ ଲଳିନ୍ଦ୍ର ଶବର ତାଙ୍କୁ ଗିରଫ କରା ନ ଗଲେ ଆତ୍ମହତ୍ୟା କରିବେ ବୋଲି ଗଣମାଧ୍ୟମ ସମ୍ମୁଖରେ ପ୍ରକାଶ କରିବା ପରେ ଯାଦବ ସମାଜ ଏବଂ ଜିଲା ଭାଜପା ମହିଳା ମୋର୍ଚ୍ଚା ପକ୍ଷରୁ ଲଳିନ୍ଦ୍ରକୁ ଗିରଫ ପାଇଁ ଜିଲା ଆରକ୍ଷୀ ଦାବିପତ୍ର ପ୍ରଦାନ କରାଯାଇଥିଲା। ଏହା ପରେ ପୋଲିସ ଲଳିନ୍ଦ୍ରକୁ ଗିରଫ କରିଛି। ତେବେ ପୋଲିସ ପ୍ରଶାସନ ପକ୍ଷରୁ ଶନିବାର ପୀଡ଼ିତାଙ୍କ ବୟାନ ରେକର୍ଡ କରିବା ସମୟରେ ଲଳିନ୍ଦ୍ର ଶବର ତାଙ୍କୁ ପ୍ରଥମେ ବଳାତ୍କାର କରିଥିବା ପ୍ରକାଶ କରିଥିଲେ। ପରେ ଲଳିନ୍ଦ୍ରକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ବୋଲି ଶନିବାର ସନ୍ଧ୍ୟାରେ ଏସ୍ପି ବାତୁଲା ଗଙ୍ଗାଧର ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଏହି ଘଟଣାରେ ଗଣବଳାତ୍କାର ମାମଲାରେ ଏଯାଏ ଗିରଫ ସଂଖ୍ୟା ୭ରେ ପହଞ୍ଚତ୍ଥିବା ବେଳେ ଭିଡିଓ ଭାଇରାଲ ଘଟଣାରେ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ମୋଟ ଗିରଫ ସଂଖ୍ୟା ୧୦ରେ ପହଞ୍ଚତ୍ଛି।
ସୂଚନାଯୋଗ୍ୟ ଯେ, ଗତ ୧୪ ତାରିଖରେ ସୁଭଦ୍ରା ବସ୍ର ଡ୍ରାଇଭର ଲଳିନ୍ଦ୍ର ଶବର ପୀଡ଼ିତାଙ୍କୁ ମୋଟରସାଇକେଲରେ ଲିଫ୍ଟ ଦେଇ ଜୁନାଗଡ଼ ରାସ୍ତାରେ ନେଇଥିଲେ। ତେବେ ଜାରିଙ୍ଗ ନିକଟରେ ମୋଟରସାଇକେଲ ଅଟକାଇବା ପରେ ୬ ଜଣ ଯୁବକ ପୀଡ଼ିତାଙ୍କୁ ଜଙ୍ଗଲ ଭିତରକୁ ଟେକି ନେଇ ବଳାତ୍କାର କରିଥିଲେ। ଏହି ଘଟଣାର ଭିଡିଓ ଭାଇରାଲ ହେବା ପରେ ପୀଡ଼ିତା ଜୁନାଗଡ଼ ଥାନାରେ ଲିଖିତ ଏତଲା ଦେଇଥିଲେ। ଉକ୍ତ ଏତଲାକୁ ଭିତ୍ତିକରି ଏସ୍ପି ବାତୁଲା ଗଙ୍ଗାଧର ନିଜେ ତିନୋଟି ଟିମ୍ ଗଠନ କରି ୭ ଅଭିଯୁକ୍ତଙ୍କୁ ଗିରଫ କରିଥିଲେ। ଡ୍ରାଇଭର ଲଳିନ୍ଦ୍ରଙ୍କୁ ପୋଲିସ ମୁଖ୍ୟ ସାକ୍ଷୀ କରି ଛାଡ଼ିଦେଇଥିଲା। ମାତ୍ର ପୀଡ଼ିତା ଲଳିନ୍ଦ୍ର ମୁଖ୍ୟ ଅଭିଯୁକ୍ତ ଏବଂ ପ୍ରଥମେ ଲଳିନ୍ଦ୍ର ହିଁ ତାଙ୍କୁ ବଳାତ୍କାର କରିଥିବା ଗଣମାଧ୍ୟମ ନିକଟରେ ପ୍ରକାଶ କରିବା ପରେ ପୋଲିସ ଲଳିନ୍ଦ୍ରଙ୍କୁ ଗିରଫ କରି କୋର୍ଟ ଚାଲାଣ କରିଛି।
