ଦୁବାଇ,୧୧।୧୦:ପ୍ରଥମ ମହିଳା ରେଫରୀ ଭାବେ ଭାରତର ଜି.ଏସ୍. ଲକ୍ଷ୍ମୀ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଇଭେଣ୍ଟରେ ମ୍ୟାଚ୍ ପରିଚାଳନା କରିବାର ସୌଭାଗ୍ୟ ଲାଭ କରିଛନ୍ତି। ଆଇସିସି ପୁରୁଷ ଟି୨୦ ବିଶ୍ୱକପ୍ ଯୋଗ୍ୟତା ପର୍ଯ୍ୟାୟ ମ୍ୟାଚ୍ ପରିଚାଳନା ଲାଗି ଆଇସିସି ପକ୍ଷରୁ ଗୁରୁବାର ଅଫିସିଆଲଙ୍କ ତାଲିକା ପ୍ରକାଶ ପାଇଛି। ଯେଉଁଥିରେ ନ୍ୟୁଜିଲାଣ୍ଡର ପ୍ରାକ୍ତନ ଅଧିନାୟକ ଜେଫ୍ କ୍ରୋଙ୍କ ସମେତ ଭାରତର ଲକ୍ଷ୍ମୀ ଓ ଦକ୍ଷିଣ ଆଫ୍ରିକାର ଜିହଡର୍ସ ପିନର ସ୍ଥାନ ପାଇଛନ୍ତି। ତିନୋଟି ଆଇସିସି ଟି୨୦ ବିଶ୍ୱକପ୍କୁ ମିଶାଇ କ୍ରୋ ବର୍ତ୍ତମାନ ସୁଦ୍ଧା ୪୮୮ ଅନ୍ତର୍ଜାତୀୟ ମ୍ୟାଚ୍ରେ ଅଫିସିଆଲ ଭାବେ ଦାୟିତ୍ୱ ତୁଲାଇ ସାରିଛନ୍ତି। ଟି୨୦ ବିଶ୍ୱକପ୍ର ଯୋଗ୍ୟତା ପର୍ଯ୍ୟାୟ ମ୍ୟାଚ୍ ଅକ୍ଟୋବର ୧୮ରୁ ନଭେମ୍ବର ୨ ତାରିଖ ପର୍ଯ୍ୟନ୍ତ ୟୁଏଇରେ ଅନୁଷ୍ଠିତ ହେବ। ଏଥିଲାଗି ୧୨ ଜଣିଆ ଅମ୍ପାୟର ତାଲିକା ମଧ୍ୟ ପ୍ରକାଶ ପାଇଛି। ଏଥିରେ ଭାରତର ସୁନ୍ଦରାମ ରବି ମଧ୍ୟ ରହିଛନ୍ତି।
ପର୍ଯ୍ୟାୟର ପ୍ରଥମ ଦିବସରେ ଆବୁଧାବିର ଜାୟେଦ ଷ୍ଟାଡିୟମରେ ହଂକଂ ଓ ଆୟର୍ଲାଣ୍ଡ ମଧ୍ୟରେ ମ୍ୟାଚ୍ ଅନୁଷ୍ଠିତ ହେବ। ଏଥିରେ ଲକ୍ଷ୍ମୀ ମ୍ୟାଚ୍ ଅଫିସିଆଲ ଦାୟିତ୍ୱ ତୁଲାଇବେ। ସେହିଭଳି ରବି ଓ ସାମ୍ ନୋଗାଜସ୍କି ଅମ୍ପାୟର ଭାବେ ମ୍ୟାଚ୍ ପରିଚାଳନା କରିବେ। ଏଠାରେ ଉଲ୍ଲେଖଯୋଗ୍ୟ, ୫୧ ବର୍ଷୀୟା ଆନ୍ଧ୍ରପ୍ରଦେଶ ନିବାସୀ ଲକ୍ଷ୍ମୀ ଭାରତୀୟ ଘରୋଇ କ୍ରିକେଟ୍ର ଜଣେ ପୂର୍ବତନ ଖେଳାଳି। ଆଇସିସିର ମ୍ୟାଚ୍ ରେଫରି ପ୍ୟାନେଲରେ ସ୍ଥାନ ପାଇବାରେ ସେ ପ୍ରଥମ ମହିଳା ଅଫିସିଆଲ ଥିଲେ।
