ଟାଇଟନିକ୍ ଜାହାଜ ବିଷୟରେ ଜାଣିଥିବେ ନିଶ୍ଚିତ। ଯାହା ଉପରେ ଫିଲ୍ମ ନିର୍ମାଣ କରାଯାଇଥିଲା। ଟାଇଟନିକ୍ ବିଶ୍ୱର ବୃହତ୍ତମ ଜାହାଜ ଭାବେ ପରିଚିତ ହେବା ଆଜକୁ ୧୦୮ ବର୍ଷ ବିତିଗଲାଣି। ଏହା ୧୦ ଏପ୍ରିଲ ୧୯୧୨ରେ ବ୍ରିଟେନର ସାଉଥ୍ମ୍ପଟନ୍ ବନ୍ଦରରୁ ନ୍ୟୁୟର୍କ ଅଭିମୁଖେ ଯାତ୍ରା କରିଥିଲା। ଯାତ୍ରା କରିବାର ମାତ୍ର ୪ ଦିନ ପରେ ଉତ୍ତର ଆଟ୍ଲାଣ୍ଟିକ ମହାସାଗରରେ ଏକ ହିମଖଣ୍ଡ ସହିତ ମୁହାଁମୁହିଁ ଧକ୍କା ହୋଇ ଖଣ୍ଡ ବିଖଣ୍ଡିତ ହୋଇଯାଇଥିଲା। ଫଳରେ ଏହାର ଭଗ୍ନାଂଶ ୩.୮ କିଲୋମିଟର ଗଭୀରରେ ରହିଗଲା।
ଟାଇଟନିକ୍ ଦୁର୍ଘଟଣାରେ ପ୍ରାୟ ୧୫୦୦ ଲୋକ ପ୍ରାଣ ହରାଇଥିଲେ। ଏହାକୁ ସେହି ସମୟର ସବୁଠାରୁ ବଡ଼ ସାମୁଦ୍ରିକ ଦୁର୍ଘଟଣା ଭାବରେ ବିବେଚନା କରାଯାଏ। ପ୍ରାୟ ୭୦ ବର୍ଷ ଧରି ଏହି ଜାହାଜର ଧ୍ୱଂସାବଶେଷ ସମୁଦ୍ରରେ ଛୁଇଁ ନ ଥିଲା। ୧୯୯୫ରେ ଟାଇଟନିକ୍ର ଧ୍ୱଂସାବଶେଷ ପ୍ରଥମେ ଅନୁସନ୍ଧାନକାରୀ ରବର୍ଟ ବଲାର୍ଡ ଏବଂ ତାଙ୍କ ଦଳ ଦ୍ୱାରା ଆବିଷ୍କୃତ ହୋଇଥିଲା।
ଜାହାଜ ଯେଉଁଠାରେ ବୁଡ଼ି ଯାଇଥିଲା ସେଠାରେ ଘନ ଅନ୍ଧକାର ଏବଂ ତାପମାତ୍ରା ୧ ଡିଗ୍ରୀ ସେଲସିୟସ ଥିଲା। ଯାହାକି ବର୍ତ୍ତମାନ ସମୟରେ ଏପରି ଗଭୀରକୁ ଯିବା ଏବଂ ନିରାପଦରେ ଫେରିବା ଅତ୍ୟନ୍ତ କଷ୍ଟକର। ଧ୍ୱଂସାବଶେଷ ଖୋଜିବା ତ ଦୂର କଥା। ଜାହାଜ ଏତେ ବଡ଼ ଏବଂ ଓଜନିଆ ଥିଲା ଯେ, ପ୍ରାୟ ୪ କିଲୋମିଟର ଗଭୀରରୁ ଭଗ୍ନାଂଶ ବାହାର କରିବା ଅସମ୍ଭବ।
କୁହାଯାଏ, ଟାଇଟନିକ୍ର ଧ୍ୱଂସାବଶେଷ ସମୁଦ୍ର ଭିତରେ ଅଧିକ ସମୟ ରହିପାରିବ ନାହିଁ। କାରଣ ଏହା ଦ୍ରୁତ ଗତିରେ ତରଳିବାରେ ଲାଗିଛି।
ବିଶେଷଜ୍ଞଙ୍କ ଅନୁଯାୟୀ, ଟାଇଟନିକର ଭଗ୍ନାଂଶ ଆସନ୍ତା ୨୦-୩୦ବର୍ଷ ମଧ୍ୟରେ ସମ୍ପୂର୍ଣ୍ଣ ତରଳି ଯିବ। ପ୍ରକୃତରେ ସମୁଦ୍ରରେ ଥିବା ଜୀବାଣୁ ଏହାର ଲୌହ ଗଠନକୁ ଶୀଘ୍ର ବଦଳାଇ ଦେଉଛନ୍ତି। ଯେଉଁ କାରଣରୁ ଏଥିରେ କଳଙ୍କି ଲାଗିଯାଉଛି।
ବିବିସି ରିପୋର୍ଟ ଅନୁଯାୟୀ, କଳଙ୍କି ସୃଷ୍ଟି କରୁଥିବା ଏହି ଜୀବାଣୁ ପ୍ରତିଦିନ ପ୍ରାୟ ୧୮୦ କିଲୋଗ୍ରାମ ଆବର୍ଜନା ଖାଇଥା’ନ୍ତି। ତେଣୁ ବୈଜ୍ଞାନିକମାନେ ବିଶ୍ୱାସ କରନ୍ତି ଏହା ଖୁବ୍ ଶୀଘ୍ର ପାଣିରେ ମିଳାଇଯିବ।
