ଢେଙ୍କିକୋଟ,୧୯ା୭(ଡି.ଏନ୍.ଏ.)- ଜାତୀୟ ରାଜପଥ ୨୦ନଂ. ନବୀକରଣ ପରେ ଢେଙ୍କିକୋଟ ଗ୍ରାମବାସୀଙ୍କ ଦୁଃଖ ବଢ଼ିଯାଇଛି। ଅଧାପନ୍ତରିଆ କରି ଠିକା ସଂସ୍ଥା ଚାଲିଗଲା। ଉଭୟ ପାର୍ଶ୍ୱ ସର୍ଭିସ ରୋଡ୍ ନିର୍ମାଣ ଏପର୍ଯ୍ୟନ୍ତ ହୋଇନାହିଁ। ଓଭରବ୍ରିଜ୍ରେ ୪ ଲେନ୍ କଲାନି ରାସ୍ତା ନ ହେବାରୁ ଦୈନିକ ଦୁର୍ଘଟଣାରେ ଧନଜୀବନ ନଷ୍ଟ ହେଉଛି। ସେଥିପ୍ରତି କୌଣସି ପଦକ୍ଷେପ ନିଆଯାଉ ନାହିଁ। ତେବେ ବଜାରଠାରୁ ୧ କି.ମି. ଦୂରରେ ଅବସ୍ଥିତ ଟୋଲପ୍ଲାଜା। ଏଠାରେ ଦିନରାତି ହଜାର ହଜାର ଟ୍ରକ୍, ବସ୍ ଓ ଛୋଟ ଗାଡ଼ିରୁ ଟୋଲ ବାବଦକୁ ପ୍ରତିଦିନ ଲକ୍ଷ ଲକ୍ଷ ଟଙ୍କା ଆଦାୟ କରାଯାଉଛି। କିନ୍ତୁ ଏହାର ୫୦୦ ମିଟର ଦୂର ଉଭୟ ପାର୍ଶ୍ୱ ଜାତୀୟ ରାଜପଥରେ ହାଇମାଷ୍ଟ ଲାଇଟ ଲଗାଇଥିଲେ ମଧ୍ୟ ସେ ସବୁ ଜଳୁନାହିଁ। ଏନେଇ ଜାତୀୟରାଜପଥ ପ୍ରାଧୀକରଣଙ୍କୁ ବାରମ୍ବାର ଅଭିଯୋଗ କରାଯାଉଥିଲେ ମଧ୍ୟ ଏହାର କୌଣସି ସ୍ଥାୟୀ ପ୍ରତିକାର କରାଯାଉନାହିଁ। ଏଣେ ହାଇମାଷ୍ଟ ଜଳୁ ନ ଥିବାରୁ ଅନ୍ଧାରର ସୁଯୋଗ ନେଇ ଅସାମାଜିକ ଯୁବକଙ୍କ ଆଡ୍ଡାସ୍ଥଳୀ ପାଲଟିଛି। ଏହି ରାସ୍ତାରେ ମଦ, ଗଞ୍ଜେଇ ନିଶାଦ୍ରବ୍ୟ ସେବନ କରି ରାତିରେ ରହୁଥିବା ଟ୍ରକ୍ ଡ୍ରାଇଭରଙ୍କଠାରୁ ଚୋରି ଲୁଟ୍ପାଟ୍ ଦିନକୁ ଦିନ ବୃଦ୍ଧି ପାଉଛି। ଶୌଚାଳୟ କାର୍ଯ୍ୟ ଶେଷ କରି ନ ଥିବାରୁ ତା’ ଭିତରେ ରହି ବିଭିନ୍ନ ଅନୈତିକ କାର୍ଯ୍ୟକଳାପ କରୁଥିବା ଅଭିଯୋଗ ହେଉଛି। ଏଣୁ ଜାତୀୟରାଜପଥ ପ୍ରାଧୀକରଣ ଏଥିପ୍ରତି ଦୃଷ୍ଟି ଦେଇ ତୁରନ୍ତ ଲାଇଟଗୁଡ଼ିକୁ ମରାମତି କରି ଜାଳିବା ପାଇଁ ସାଧାରଣରେ ଦାବି ହେଉଛି ନଚେତ ଏହା ଆନ୍ଦୋଳାତ୍ମକ ରୂପ ନେବ ବୋଲି ଚେତାବନୀ ଦିଆଯାଇଛି।
