ଜମାକାରୀଙ୍କ ମାଚ୍ୟୁରିଟି ଟଙ୍କାକୁ ନେଇ ହୋହଲ୍ଲା
7:37 amFebruary 18, 2020 / 21

ବ୍ରହ୍ମପୁର ଅଫିସ,୧୮ା୨ – ସାହାରା ଇଣ୍ଡିଆ ଚିଟଫଣ୍ଡ ସଂସ୍ଥା ଅଧୀନରେ କାର୍ଯ୍ୟ କରୁଥିବା କ୍ଷେତ୍ର କର୍ମଚାରୀ (ଏଜେଣ୍ଟ)ଙ୍କୁ ଜମାକାରୀଙ୍କ ମାଚ୍ୟୁରିଟି ଟଙ୍କା ପ୍ରଦାନକୁ ନେଇ ସୋମବାର ପୁଣି ଅସନ୍ତୋଷ ଦେଖାଦେଇଛି । ଟଙ୍କା ପ୍ରଦାନରେ ତାରତମ୍ୟକୁ ନେଇ ବ୍ରହ୍ମପୁର ଶାଖା କାର୍ଯ୍ୟାଳୟଠାରେ ସଂସ୍ଥା କର୍ତ୍ତୃପକ୍ଷ ଓ ଏଜେଣ୍ଟଙ୍କ ମଧ୍ୟରେ ମୁହଁ।ମୁହିଁ ପରିସ୍ଥିତି ସୃଷ୍ଟି ହୋଇଥିଲା । ପୂର୍ବରୁ ମାସିକ ଇନ୍‌କମ ସ୍କିମ (ଏମଆଇଏସ) ଟଙ୍କା ପ୍ରଦାନରେ କର୍ତ୍ତୃପକ୍ଷ ଅଣଦେଖା କରୁଥିବା ବେଳେ ଏବେ ମାଚ୍ୟୁରିଟି ଟଙ୍କା ପ୍ରଦାନରେ ମଧ୍ୟ ପାତରଅନ୍ତର କରାଯାଉଥିବା ଏଜେଣ୍ଟ ଅଭିଯୋଗ କରିଛନ୍ତି।
ଗତ ଜୁଲାଇ ୧୭ରେ ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ହୋଇଥିବା ଆଲୋଚନା ଓ ସାହାରା ଇଣ୍ଡିଆ କର୍ତ୍ତୃପକ୍ଷଙ୍କ ପ୍ରତିଶ୍ରୁତି ପ୍ରକାରେ ଜମାକାରୀଙ୍କ ମାଚ୍ୟୁରିଟି ଟଙ୍କା ପର୍ଯ୍ୟାୟକ୍ରମେ ପ୍ରଦାନ କରାଯାଉଛି । ଏଜେଣ୍ଟକୁ ଦିଆଯାଉଥିବା ଜମାକାରୀଙ୍କ ମାଚ୍ୟୁରିଟି ଟଙ୍କାର ଯଥେଷ୍ଟ ଅଧିକ ଟଙ୍କା କାର୍ଯ୍ୟାଳୟର ୪ ଜଣ ସିନିୟର ଏଜେଣ୍ଟଙ୍କୁ ସଂସ୍ଥା ପ୍ରଦାନ କରୁଥିଲା। ପରେ ସେମାନଙ୍କ ଟଙ୍କାର ପରିମାଣ ସଂସ୍ଥା ହ୍ରାସ କରିଥିଲା। ଏହା ପ୍ରତିବାଦରେ ଉକ୍ତ ୪ ସିନିୟର ଏଜେଣ୍ଟ ୮ ଦିନ ଧରି ଶାଖା କାର୍ଯ୍ୟାଳୟକୁ ବନ୍ଦ କରି ଦେଇଥିଲେ। ସୋମବାର ଅନ୍ୟ ଏଜେଣ୍ଟମାନେ କାର୍ଯ୍ୟାଳୟକୁ ଆସିବାରେ ସମ୍ପୃକ୍ତ ୪ ସିନିୟର ଏଜେଣ୍ଟ ସଂସ୍ଥା ସହ ସଲାସୁତୁରା କରି ଅଧିକ ମାଚ୍ୟୁରିଟି ଟଙ୍କା ହାତଉଥିବା ସାମ୍ନାକୁ ଆସିଥିଲା। ତେଣୁ ସମସ୍ତଙ୍କୁ ସମାନ ମାଚ୍ୟୁରିଟି ଟଙ୍କା ପ୍ରଦାନ କରିବାକୁ ଏଜେଣ୍ଟମାନେ ଦାବି କରିବା ସହ ହଟ୍ଟଗୋଳ କରିଥିଲେ । ଏହାକୁ ନେଇ ସଂସ୍ଥା କର୍ତ୍ତୃପକ୍ଷ-ଏଜେଣ୍ଟଙ୍କ ମଧ୍ୟରେ ମୁହାଁମୁହିଁ ପରିସ୍ଥିତ ସୃଷ୍ଟି ହୋଇଥିଲା । ଖବରପାଇ ପୋଲିସ ପହଞ୍ଚି ବୁଝାଶୁଝା କରିଥିଲା। ମଙ୍ଗଳବାର ସମସ୍ତ ଏଜେଣ୍ଟଙ୍କ ସହ ଆଲୋଚନା କରାଯାଇ ସମସ୍ତଙ୍କୁ ସମାନ ଭାବେ ଜମାକାରୀଙ୍କ ମାଚ୍ୟୁରିଟି ପ୍ରଦାନ କରିବା ଦିଗରେ ମୁଖ୍ୟ କାର୍ଯ୍ୟାଳୟକୁ ଅବଗତ କରାଯିବ ବୋଲି ଶାଖା ପରିଚାଳକ ବିଭୂତି ଭୂଷଣ ପଟ୍ଟନାୟକ ପ୍ରତିଶ୍ରୁତି ଦେବା ପରେ ପରିସ୍ଥିତ ଶାନ୍ତ ପଡିଥିଲା ।