ଟୋକିଓ: ଅନୁଶାସନ ପାଇଁ ଜନ୍ମକଲା ପିଲାଙ୍କୁ ଦଣ୍ଡ ଦେବା ଅତି ସାଧାରଣ କଥା। ପାଠପଢ଼ିବା ହେଉ ଅବା ସଂସ୍କାରବାଦୀ ଚିନ୍ତାଧାରା ପାଇଁ ପ୍ରତି ଘରେ ଶିଶୁଙ୍କ ଉପରେ ଛୋଟମୋଟ କଟକଣା ଲଗାଯାଇଥାଏ। ଭାରତରେ ଏହା ସାଧାରଣ କଥା। ହେଲେ ଜାପାନରେ ଯଦି ବି ଏପରି ଘଟଣା ସାମ୍ନାକୁ ଆସେ ତେବେ ଅଭିଭାବକ କାଠଗଡ଼ାକୁ ଟଣାହେବା ଥୟ।
ପୃଥିବୀର ଅନ୍ୟତମ ବିକଶିତ ଦେଶ ହେଉଛି ଜାପାନ। ଟେକ୍ନୋଲୋଜିକୁ ନେଇ ସବୁବେଳେ ଗୋଟିଏ ପାଦ ଆଗରେ ରହୁଥିବା ଏହି ଦ୍ୱୀପଦେଶରେ ପ୍ରଚଳିତ ନିୟମ ମଧ୍ୟ ଟିକେ ନିଆରା। ନିକଟରେ ପିଲାମାନଙ୍କୁ ଅଧିକ ସ୍ବାଧୀନଚେତା କରିବାକୁ ସେଠାକାର କ୍ୟାବିନେଟରେ ଏଭଳି ଏକ ପ୍ରସ୍ତାବ ଦିଆଯାଇଛି। ଚଳିତ ସପ୍ତାହରେ ଏହା ଉପରେ ଆଲୋଚନା କରାଯିବ। ନିଷ୍କର୍ଷରୁ ବାହାରିଥିବା ନିଷ୍ପତ୍ତି ଅନୁଯାୟୀ ଏହାକୁ ଚୂଡ଼ାନ୍ତ ରୂପ ଦିଆଯିବ।
କର୍ମଚାପରେ ସୃଷ୍ଟି ହେଉଥିବା ଚିଡଚିଡାପଣ ଯୋଗୁ ଅନେକ ସମୟରେ ମାତାପିତା ହିତାହିତ ଜ୍ଞାନ ହରାଇ ପିଲାମାନଙ୍କ ଉପରକୁ ହାତ ଉଠାଇଥାନ୍ତି। ଏପରି ଘଟଣା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ଶିଶୁ ଉତ୍ପୀଡ଼ନ ଅଧିନିୟମକୁ ଆଣିବା ସହ ଆଇନରେ ପରିବର୍ତ୍ତନ କରିବାକୁ ଯୋଜନା କରୁଛନ୍ତି ଜାପାନ ସରକାର। ନୂଆ ପ୍ରସ୍ତାବ ଅନୁଯାୟୀ, ଶିଶୁଙ୍କୁ ଆକଟ କରିବାକୁ ଦଣ୍ଡଦେବା ଏକ ବାହାନା ହୋଇପାରିବ ନାହିଁ। ଅର୍ଥାତ୍ ଛୁଆକୁ କୌଣସି ପ୍ରକାର ଶାରୀରିକ ନିର୍ଯାତନା ଦେବା ପୂର୍ବରୁ ଅଭିଭାବକଙ୍କୁ ଶହେ ଥର ଭାବିବାକୁ ପଡିବ। କେତେକ କ୍ଷେତ୍ରରେ ଏପରି ଅଭିଯୋଗ ଆସିବା ପରେ ମା’ବାପା ନିଜକୁ ବଞ୍ଚାଇବାକୁ ଅଜବ ଯୁକ୍ତି ଉପସ୍ଥାପନ କରିଥାନ୍ତି। ସ୍ଥଳ ବିଶେଷରେ ସେମାନେ କହିଥାନ୍ତି ଯେ, ଆକଟ କରିବା ସତ୍ତ୍ୱେ ନ ଶୁଣିବାରୁ ସେମାନେ ଶାରୀରିକ ଦଣ୍ଡ ଦେବାକୁ ବାଧ୍ୟ ହୋଇଥିଲେ। ହେଲେ ନୂଆ ଆଇନ ଆସିବା ପରେ ଏସବୁ ଯୁକ୍ତି ନିରର୍ଥକ ହୋଇଯିବ। କେବଳ ଏତିକି ନୁହେଁ, ଦଣ୍ଡ ଦେବା ଉଦ୍ଦେଶ୍ୟରେ ପିଲାଙ୍କୁ କେହି ଭୋକରେ ରଖିପାରିବେ ନାହିଁ ବୋଲି ପ୍ରସ୍ତାବରେ ଉଲ୍ଲେଖ ରହିଛି।
ଆଲୋଚନା ପାଇଁ ପ୍ରସ୍ତୁତ ଏହି ଅଧିନିୟମରେ ପିଲାମାନଙ୍କୁ ଭାବନାତ୍ମକ ଯନ୍ତ୍ରଣାରୁ ମୁକ୍ତି ଦେବାକୁ ଉଦ୍ୟମ କରାଯାଇଛି। ଏଥିରେ ସ୍ବତନ୍ତ୍ର ଭାବେ ଉଲ୍ଲେଖ କରାଯାଇଛି, ମା’ବାପା, ଅଭିଭାବକମାନେ ଯେତେ ସମସ୍ୟାରେ ଥିଲେ ମଧ୍ୟ ପିଲାମାନଙ୍କ ପ୍ରତି ସକାରାତ୍ମକ ଦୃଷ୍ଟିଭଙ୍ଗୀ ପୋଷଣ କରିବେ। ‘ଭଲ ହୋଇଥାନ୍ତା ତୁ (ଝିଅ/ପୁଅ) ଯଦି ଜନ୍ମ ନ ହୋଇଥାନ୍ତୁ’ ଭଳି କଟୁ ଶବ୍ଦ ମଧ୍ୟ ବ୍ୟବହାର କରିପାରିବେ ନାହିଁ। ଏପରି ଶବ୍ଦ ଉଚ୍ଚାରଣ କରାଗଲେ ଏହାକୁ ଶିଶୁ ଅଧିକାର ଉଲ୍ଲଂଘନ ବୋଲି ବିଚାର କରାଯିବ। ଏତଦ୍ବ୍ୟତୀତ ପାଠପଢ଼ାରେ ଅନ୍ୟସହ ତୁଳନା କଲେ କିମ୍ବା ଅନ୍ୟମାନଙ୍କ ଆଗରେ ତଳୁଆ ଦେଖାଇବା ମନୋଭାବ ପ୍ରଦର୍ଶନ ପାଇଁ ମୋଟା ଅଙ୍କର ଜରିମାନା ଦେବାକୁ ପଡ଼ିବ। ଯଦି ସବୁ କିଛି ସରକାରଙ୍କ ଅନୁଯାୟୀ ଚାଲେ ତେବେ ଆସନ୍ତା ମାର୍ଚ୍ଚରୁ ଜାପାନରେ ଏହି ଆଇନ କାର୍ଯ୍ୟକାରୀ ହୋଇଯିବ।
ଏ ନେଇ ଦେଶର ଶିଶୁ ବିକାଶ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟୀକରଣରେ କୁହାଯାଇଛି, ପ୍ରସ୍ତାବ ଉପରେ ଆପତ୍ତି ଆସିବା ଆରମ୍ଭ ହେଲାଣି। ଏଥିପାଇଁ ସ୍ବାସ୍ଥ୍ୟ ବିଭାଗ ସହିତ ବିଚାରବିମର୍ଷ କରାଯାଇଛି। ସ୍ବାସ୍ଥ୍ୟ ବିଭାଗର ବରିଷ୍ଠ ବିଶେଷଜ୍ଞମାନେ କହିଛନ୍ତି, ଏହାଦ୍ୱାରା ମା’ବାପାଙ୍କ ଅଧିକାର ସଙ୍କୁଚିତ ହେଉଥିବା କଥା ଭାବିବା ଭୁଲ। ଏହି ଆଇନର ପ୍ରମୁଖ ଉଦ୍ଦେଶ୍ୟ ପିଲାମାନଙ୍କୁ ମାନସିକ ଚାପରୁ ଦୂରେଇ ରଖିବା।
