ଏରସମା, ୧୫।୨ (ସ୍ବ.ପ୍ର.): ଏରସମା ଥାନା ଅଧୀନ ଜିରାଇଲୋ ପଞ୍ଚାୟତସ୍ଥିତ ଶରବା ଗ୍ରାମ ନିକଟରେ ପ୍ରସ୍ତାବିତ ଚିଙ୍ଗୁଡି ପ୍ରକ୍ରିୟାକରଣ ପ୍ରକଳ୍ପକୁ ବିରୋଧ କରି ଗତ ଜାନୁୟାରୀ ୨୧ରୁ ଦିଆଯାଇଥିବା ଗଣଧାରଣା ଶୁକ୍ରବାର ୨୫ ଦିନରେ ପହଞ୍ଚିଛି। ଧାରଣା ଦିଆ ଯିବାର ୨୨ ଦିନ ପରେ ପ୍ରଶାସନ ଧାରଣାସ୍ଥଳକୁ ଆସି ଜନଶୁଣାଣି କରିବା ଓ ଖୋଲାଖୋଲି ଜନମତକୁ ଅବମାନନା କରିବା ଦ୍ୱାରା ଆନ୍ଦୋଳନ ତୀବ୍ରରୂପ ଧାରଣ କରିଛି। ଏହାର ପ୍ରତିବାଦରେ ଜିରାଇଲୋ ପଞ୍ଚୟତସ୍ଥିତ ୯ ମୌଜାର ଶତାଧିକ ମହିଳାପୁରୁଷ ଶୁକ୍ରବାର ଏରସମା ତହସିଲ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ଭିଟାମାଟି ସୁରକ୍ଷା ସମିତିର ସଭାପତି ଅଭିଜିତ ସାହୁଙ୍କ ନେତୃତ୍ୱରେ ଆନ୍ଦୋଳନକାରୀମାନେ ଗଣଧାରଣାସ୍ଥଳରୁ ପଦଯାତ୍ରାରେ ‘ଅମ ଗାଁ ଅମେ ଛାଡିବୁ ନାହିଁ’ ନାରାଦେଇ ତହସିଲ ସମ୍ମୁଖରେ ପହଞ୍ଚିଥିଲେ। ସେଠାରେ ଆୟୋଜିତ ପ୍ରତିବାଦ ସଭାରେ ପୋସ୍କୋ ପ୍ରତିରୋଧ ସଂଗ୍ରାମ ସମିତିର ସଭାପତି ଅଭୟ ସାହୁ କହିଥିଲେ,ପ୍ରକଳ୍ପ ପାଇଁ ପ୍ରସ୍ତାବିତ ସ୍ଥାନ ଶରବା ଗ୍ରାମଠାରୁ ୨୦ ମିଟର, କିମିଲୋ ଗ୍ରାମ ଓ ଜିରାଇଲୋ ନ ମୌଜୀ ହାଇସ୍କୁଲଠାରୁ ୧୦୦ମିଟର ଦୂର ହୋଇଥିବାରୁ ପ୍ରକଳ୍ପର କୁପ୍ରଭାବ ପରିବେଶକୁ ସିଧାସଳଖ ପ୍ରଭାବିତ କରିବ। ଜିଲା ପ୍ରଶାସନ ସ୍ଥାନୀୟ ଲୋକମାନଙ୍କ ଜୀବନ ଜୀବିକାକୁ ସହୃଦୟତାର ସହ ବିଚାରକୁ ନେଇ ପ୍ରକଳ୍ପ ସ୍ଥାନାନ୍ତର କରନ୍ତୁ। ନଚେତ୍ ଆଗାମୀ ଦିନଠାରୁ କେବଳ ମହିଳା ଓ ଶିଶୁ ଆନ୍ଦୋଳନକୁ ଓହ୍ଲାଇବାକୁ ପ୍ରସ୍ତୁତ ହେଲେଣି ବୋଲି ଚେତାବନୀ ଦେଇଥିଲେ। ଏଥିରେ ସିପିଆଇର ବରିଷ୍ଠ ନେତା ଶଶିଭୂଷଣ ସ୍ବାଇଁ, ଉତ୍କଳ ମହିଳା ସମିତିର ରାଜ୍ୟ ସମ୍ପାଦିକା ଜିନ୍ମୟୀ ସାହାଣୀ, ନାରୀନେତ୍ରୀ ମଞ୍ଜୁଲତା ହାତୀ, ରବୀନ୍ଦ୍ର ମାଝି, ସୁରେନ୍ଦ୍ର ସ୍ବାଇଁ, ବିଶ୍ୱନାଥ ବେହେରା, ରବୀନ୍ଦ୍ର ପାଇଟାଳ ପ୍ରମୁଖ ଉପସ୍ଥିତ ଥିଲେ। ଜିଲାପାଳଙ୍କ ଉଦ୍ଦେଶ୍ୟରେ ସହସିଲଦାର ଚିତ୍ତରଞ୍ଜନ ମହାନ୍ତଙ୍କୁ ଦାବିପତ୍ର ପ୍ରଦାନ କରାଯାଇଥିଲା।
