ଟିକ୍ରାପଡା, ୨ ା୭ (ଡି.ଏନ୍.ଏ.): ବଲାଙ୍ଗୀର ଜିଲା ସଇଁନ୍ତଳା ବ୍ଲକ କରମତଲା ପଁଚେତ୍ ଅଧୀନ ଭଣ୍ଡାରବାଞ୍ଜି ଗଁାର ସୂର୍ଯ୍ୟମଣି ସୁନାପିରତି(୪୬)। ସେ ଗଲା ୨୦୧୮ ଅକ୍ଟୋବରରେ ଗୁଟେ ବାଇକ ଦୁରଘଟନାର ଶିକାର ହେଲାରୁ ତାକର ନଲଗୁଡ଼ର ହାଡ଼ ଭାଂଗିଗଲା। ଏନ୍ତାଥି ପରିବାର ଲୋକ ଧାରଉଧାର କରି ବଲାଙ୍ଗୀରର ଗୁଟେ ଘରୋଇ ଡାକ୍ତରଖାନାରେ ଭରତି କଲେ। ସେଠାନେ ସୂର୍ଯ୍ୟମଣିକଁର ଭଂଗା ଗୋଡ୍ର ଅପରେଶନ କରି ଷ୍ଟିଲ ରଡ଼ ଖଁଜାଗଲା। ହେଲେ ଏହେଦେ ଗୋଡ୍ରୁ ରଡ ବାହାର କରବାର ସମିଆ ୨ ମାସ ଡେଗି ଯାଇଥିଲେ ବି ଟଁକା ପଏସା ଅଭାବୁ ସେ ଘରେ ପଡ଼ିରହିଛନ୍।
ସୂଚନା ଅନ୍ସାରେ ସୂର୍ଯ୍ୟମଣି ୨୦୧୮ ଅକ୍ଟୋବର ମାସେ ଗୁଟେ ଦୁରଘଟନାର ଶିକାର ହେଇଥିଲେ। ପରିବାର ଲୋକ୍ ଚିକିସତ୍ା ଲାଗି ତାହାକୁ ବଲାଙ୍ଗୀର ମୁଖିଆ ଡାକ୍ତରଖାନାରେ ଭରତି କଲେ। ହେଲେ ଡାକ୍ତର ଇଠାନେ ଚିକିସତ୍ା ସମ୍ଭବ ନୁହେ, ବୁର୍ଲା ଯିବାକେ ପଡ଼ବା ବଲି ପରାମଶ ଦେଇଥିଲେ। ହେଲେ ଟଁକା ପଏସା ଅଭାବୁ ସୂର୍ଯ୍ୟମଣି ବୁର୍ଲା ନାଇଁ ଯାଇପାରଲେ। ଶେଷେ ପରିବାର ଲୋକ୍ ଲାଗରଲେସର, ବଁଧୁବାଧଁବ୍ନୁ ଧାର ଉଧାର କରି ୧୯.୧୦.୨୦୧୮ରେ ବଲାଙ୍ଗୀରର ଗୁଟେ ଘରୋଇ ଡାକ୍ତରଖାନାରେ ସୂର୍ଯ୍ୟମଣିକଁର ଭଂଗା ଗୋଡ୍ର ଅପରେଶନ କରାଲେ। ସେଠାନେ ତାକର ଗୋଡ଼ରେ ଷ୍ଟିଲ ରଡ ଖଁଜାଗଲା। ହେଲେ ଇତାର ପରେ ଭିନେ ଭିନେ ସମିଆରେ ଡ୍ରେସିଂ ସେ ବଲାଙ୍ଗୀର ଯିବାର ଆଏବାର କଲେ। ଏନ୍ତାଥି ଲାଗ୍ବରମସ ବଢ଼ବାର ସଂଗେ ଜମିବାଡ଼ି, ସୁନା ଗହନା କରି ପାଖାପାଖି ୭୦ ହଜାର ଟଁକା ଚିକିସତ୍ାରେ ଖରଚ୍ କରି ସରବ୍ସୁଅଁାତ ହେଇଯାଇଛନ୍। ଇଆଡ଼େ ହାଡ଼ ଯୁଡ଼ି ହେବା ବଲି ଗୁଡ଼େ ୮ଟା ଷ୍ଟିଲ ରଡ ଖଁଜା ହେଇଛେ। ଅପରେଶନର ୬ ମାସ ଉତାରୁ ସେ ରଡ ସବୁ ହିଟେଇ ଦେବାର କଥା। ହେଲେ ଟଁକା ପଏସା ଅଭାବୁ ରଡ ହିଟାବାର ଧାଯ୍ ସମିଆନୁ ୨ ମାସ ଡେଗିଯାଇଥିଲେ ବି ସୂର୍ଯ୍ୟମଣି ଅପରେଶନ କରେଇ ନାଇଁ ପାରବାର। ଇଥିରଲାଗି ଯିବାର ଆଏବାର, ଚିକିସତ୍ା, ଉଷୋକଷା ବାବ୍ଦେ ପାଖାପାଖି ୧୦ ହଜାର ଟଁକା ଖରଚ୍ ହେବା। ହେଲେ ସୂର୍ଯ୍ୟମଣି ଅଭାବ ଅନାଟନ ଲାଗି ଟଁକା ଯୁଗାଡ଼ କରି ନାଇଁପାରି ଖଟେ ପଡ଼ିରହିଛନ୍। ଏନ୍ତାଥି ଘରେ ମାଏକିନା ମିଥିଳା, ୪ ପୁଓ ଆର ଗୁଟେ ବଲି ଝି’ ଦୁଖ୍ରେ ଭାଂଗିପଡ଼ିଛନ୍। ସୂର୍ଯ୍ୟମଣିକଁର ବଡ଼ ପୁଓ ଭକ୍ତବନ୍ଧୁ(୨୭) ଘରର ଅବସ୍ତା ଦେଖି ବାହାର ରାଏଜ୍କେ ଦାଦନ ଖଟିଯାଇଥିଲାବେଲେ ଦୁତୀଅ ପୁଓ ପୁଷ୍ପାଞ୍ଚଳ(୧୭) ଗଁାରେ ଲୁକ୍କର କୁଲିମଜୁରି ପରିବାର ଚଲଉଛନ୍। ଉନିଆ ଦୁଇପୁଓ ବିଶ୍ୱାମିତ୍ର ଆର ନରୋତ୍ତମ ଅଷ୍ଟମ ୮ମ ଆର ୪ର୍ଥ ଶ୍ରେଣୀରେ ପଢ଼ୁଛନ୍। ଏନ୍ତାଥି ସୂର୍ଯ୍ୟମଣିକଁର ମାଏକିନା ମିଥିଳା ବଡ଼ା ଗୁଲଗୁଲା ହେଇ ସରକାରୀ ସାହାଯ୍ ଲାଗି ଗଣମାଧ୍ୟମ ଜରିଆରେ ଜିଲାପାଲକୁଁ ଗୁହାରି କରିଛନ୍। ଇ ଦୁଖି ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ସୂର୍ଯ୍ୟମଣିକୁଁ ଚିକିସତ୍ା ସାହାଯ୍ ଯୁଗେଇ ଦେବାକେ ସାଧାରନରେ ଦାବି ହେଉଛେ।