ଭଞ୍ଜନଗର,୨୭।୬(ଡି.ଏନ.ଏ.)- ଘରୋଇ ଶିକ୍ଷାନୁଷ୍ଠାନଗୁଡିକ ଶିକ୍ଷା ଅଧିକାର ଆଇନ ଉଲ୍ଲଂଘନ କରି ବେନିୟମ ଭାବେ ଚଳାଇଥିବା ଦର୍ଶାଇ ପ୍ରଶାସନ ପକ୍ଷରୁ ଜଗନ୍ନାଥପ୍ରସାଦ, ଭଞ୍ଜନଗର, ବେଲଗୁଣ୍ଠା ସମେତ ପ୍ରମୁଖ ବ୍ଲକର କିଛି ଶିକ୍ଷାନୁଷ୍ଠାନକୁ ସୋମବାର ସିଲ୍ କରି ଦିଆଯାଇଥିଲା। କିନ୍ତୁ ଚଳିତମାସ ୩୦ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନନେବାପାଇଁ ଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ଥିଲା। ଉକ୍ତ ନିର୍ଦ୍ଦେଶନାମା ଉପରେ ଚଢ଼ାଉରେ ସାମିଲ ଥିବା ଅଧିକାରୀମାନେ ଜାଣିନଥିଲେ। ତେଣୁ କିଛି ଘରୋଇ ଶିକ୍ଷାନୁଷ୍ଠାନକୁ ପ୍ରଶାସନ ପକ୍ଷରୁ ସିଲ୍ କରି ଦିଆଯାଇଥିଲା। ଏନେଇ ହୋହଲ୍ଲା ହେବାସହ ଚିଠିର ତର୍ଜମା ପରେ ବୁଧବାର ରାତିରେ ସିଲ୍ କରାଯାଇଥିବା ଶିକ୍ଷାନୁଷ୍ଠାନର ସିଲ୍ ପୁଣି ଖୋଲାଯାଇଥିଲା। ଫଳରେ ଗୁରୁବାର ତାଲା ପଡିଥିବା ଶିକ୍ଷାନୁଷ୍ଠାନ ଗୁଡିକ ଖୋଲିଛି। କିନ୍ତୁ ସବୁଦିନ ପାଇଁ ସ୍କୁଲ ଖୋଲିବ ନା ଆଗକୁ ପୁଣି କିଛି କାର୍ଯ୍ୟାନୁଷ୍ଠାନ ହେବ ସେନେଇ ସନ୍ଦେହ ଦୁରିଭୂତ ହୋଇନାହିଁ। ଅପରପକ୍ଷେ ପ୍ରଶାସନର ଏଭଳି ତାଲା ପକା ଏବଂ ଖୋଲା ଅଭିଯାନକୁ ନେଇ ଅଭିଭାବକମାନେ ଦ୍ୱନ୍ଦ୍ୱରେ ରହିବା ସହ ଅସନ୍ତୋଷ ବ୍ୟକ୍ତ କରିଛନ୍ତି। ଶିକ୍ଷାବର୍ଷ ମଝିରେ ପ୍ରଶାସନର ଏଭଳି କଡା କାର୍ଯ୍ୟାନୁଷ୍ଠାନ ଯୋଜନାକୁ ନେଇ ସାଧାରଣରେ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି। ପ୍ରଶାସନ ଯଦି ଭବିଷ୍ୟତରେ ବେନିୟମ ଭାବେ ଚାଲୁଥିବା ଘରୋଇ ଶିକ୍ଷାନୁଷ୍ଠାନଗୁଡିକୁ ଶିକ୍ଷାବର୍ଷ ମଝିରେ ବନ୍ଦ କରିଦିଅନ୍ତି ତେବେ ସେଠାରେ ପଢୁଥିବା ଛାତ୍ରୀଛାତ୍ର କେଉଁଠି ପଢ଼ିବେ ସେନେଇ ମଧ୍ୟ ପ୍ରଶ୍ନବାଚୀ ଦେଖାଦେଇଛି। ସହରାଞ୍ଚଳ ସରକାରୀ ସ୍କୁଲ ଗୁଡିକରେ ହଠାତ୍ ହଜାର ହଜାର ଛାତ୍ରୀଛାତ୍ର ଘରୋଇ ସ୍କୁଲରୁ ଆସି ନାମ ଲେଖାଇବେ। ତେବେ ସେଥିପାଇଁ ଭିତ୍ତିଭୂମିର ଅଭାବ ରହିଛି। ତେଣୁ ପ୍ରଶାସନ ଛାତ୍ରୀଛାତ୍ରଙ୍କ ଭବିଷ୍ୟତକୁ ଦୃଷ୍ଟିରେ ରଖି ପଦକ୍ଷେପ ନେବାପାଇଁ ସାଧାରଣରେ ଦାବି ହୋଇଛି। ତାଲା ପକା ଓ ଖୋଲା ଅଭିଯାନ ମଧ୍ୟରେ କେତେଜଣ ଛାତ୍ରୀଛାତ୍ର ଘରୋଇ ଶିକ୍ଷାନୁଷ୍ଠାନରୁ ଯାଇ ସରକାରୀ ଶିକ୍ଷାନୁଷ୍ଠାନରେ ନାମ ଲେଖାଇଲେଣି। ଆଉ କେତେଜଣ ଅଭିଭାବକ ଘରୋଇ ଶିକ୍ଷାନୁଷ୍ଠାନରୁ ଟିସି ନେବା ଯୋଜନାରେ ଅଛନ୍ତି।
