ଚନ୍ଦ୍ରପୁର, ୨୮ା୪(ଡି.ଏନ୍.ଏ.)-ରାୟଗଡା ଜିଲା ଚନ୍ଦ୍ରପୁର ବ୍ଲକସ୍ଥିତ ସମନ୍ବିତ ଶିଶୁ ବିକାଶ ଯୋଜନା କାର୍ଯ୍ୟାଳୟ ଆଜକୁ ଦୀର୍ଘ ପାଞ୍ଚବର୍ଷରୁ ଉର୍ଦ୍ଧ୍ୱ ସମୟ ହେଲା ସଦର ମହକୁମାସ୍ଥିତ ରାଜୀବ ଗାନ୍ଧୀ ସେବାକେନ୍ଦ୍ରରେ ଚାଲିଛି। ଜିଲାର ସମସ୍ତ ବ୍ଲକରେ ସମନ୍ବିତ ଶିଶୁବିକାଶ ଯୋଜନା କାର୍ଯ୍ୟାଳୟ ପାଇଁ ସ୍ବତନ୍ତ୍ର ଗୃହ ନିର୍ମାଣ କରାଯାଇ ସେଠାରେ ଅଫିସ କାମ ଚାଳଇଛି। କିନ୍ତୁ ଚନ୍ଦ୍ରପୁର ଭଳି ପଛୁଆ ଅଞ୍ଚଳରେ ନା ଅଛି କାର୍ଯ୍ୟାଳୟ ଗୃହ ନା ଅଛନ୍ତି ସିଡିପିଓ ନା ଅଛନ୍ତି କିରାଣି ନା ଅଛନ୍ତି ପିଅନ। ଏଠାରେ ନାମକୁ ମାତ୍ର ମମତା ଯୋଜନାର ପ୍ରୋଗାମ ଆସିଷ୍ଟାଣ୍ଟ ଅଫିସ ଖୋଲି କାମ ତୁଲାଇଥାନ୍ତି ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ଏଠାରେ ଥିବା ସିଡିପିଓ ବର୍ଷେ ତଳୁ ବଦଳି ହୋଇ ଚାଲିଯିବା ପରେ ପ୍ରଶାସନ ପକ୍ଷରୁ ନୂତନ ଭାବେ କୌଣସିି ସିଡିପିଓଙ୍କୁ ନିଯୁକ୍ତି ଦିଆଯାଇ ନାହିଁ। ବର୍ତ୍ତମାନ କାମଚଳା ପାଇଁ ମୁନିଗୁଡା ବ୍ଲକ ସିଡିପିଓ ଏହାର ଅତିରିକ୍ତ ଦାୟିତ୍ୱରେ ଅଛନ୍ତି। ଏଠାରେ ଥିବା ପ୍ରୋଗାମ ଆସିଷ୍ଟାଣ୍ଟ ସୁପରଭାଇଜର ଅଙ୍ଗନଓ୍ବାଡି କର୍ମୀଙ୍କ ଦରମା ତଥା ଅନ୍ୟ ସୂଚନା ସମ୍ପର୍କୀୟ କାମ ପାଇଁ ବାଧ୍ୟ ହୋଇ ମୁନିଗୁଡା ସିଡିପିଓଙ୍କ ନିକଟକୁ ଯାଇଥାନ୍ତି। ଅଫିସ କାର୍ଯ୍ୟ ତଥା ପରିଦର୍ଶନ ପାଇଁ ସରକାରଙ୍କ ପକ୍ଷରୁ ଚାରିଚକିଆ ଯାନଟିଏ ମଧ୍ୟ ଯୋଗାଇ ଦିଅରଯାଇ ନାହିଁ। ଏ ସମ୍ପର୍କରେ ସିଡିପିଓ କାର୍ଯ୍ୟାଳୟର ମମତା ଯୋଜାନର ପ୍ରୋଗାମ ଆସିଷ୍ଟାଣ୍ଟ ଉମାକାନ୍ତ ଦାସଙ୍କୁ ପଚାରିବାରୁ ସେ କହିଛନ୍ତି, ଜଣେ କିରାଣୀ ସୁନିଲ ବିଡିକା ଥିବା ସମୟରେ ଅଫିସ କାମ ସୁରୁଖୁରୁରେ ଚାଲୁଥିଲା। ସେ ଏକ ବର୍ଷ ହେଲାଣି ପଦ୍ମପୁର ବ୍ଲକକୁ ବଦଳି ପରେ କେହି କିରାଣୀ ନାହାନ୍ତି। ବିନା କିରାଣି, ବିନା ପିଅନରେ ଅଫିସ ଜଗି ବସିଛୁ ବୋଲି ସେ କହିଛନ୍ତି। ଏହି ରାଜୀବ ଗାନ୍ଧୀ ସେବା କେନ୍ଦ୍ର ପରିସରରେ ଗୋଟିଏ ପାର୍ଶ୍ୱରେ ସିଡିପିଓ କାର୍ଯ୍ୟାଳୟ, ଅନ୍ୟ ପାର୍ଶ୍ୱରେ ଓଡିଶା ଜୀବିକା ମିଶନର ଅଫିସ ଚାଲିଛି। ଅତିଶୀଘ୍ର ଚନ୍ଦ୍ରପୁର ପାଇଁ ଜଣେ ସିଡିପିଓ, ଦୁଇଟି କିରାଣି ନିଯୁକ୍ତି ସହ ସ୍ବତନ୍ତ୍ର ଭାବେ କାର୍ଯ୍ୟାଳୟ ଗୃହ ନିର୍ମାଣ ପାଇଁ ଚନ୍ଦ୍ରପୁର ବ୍ଲକର ପୂର୍ବତନ ଅଧ୍ୟକ୍ଷ ଭୀମ ଗଗେରେଙ୍ଗା ଦାବି କରିଛନ୍ତି। ଜିଲାପାଳ ଏଥିପ୍ରତି ଦୃଷ୍ଟି ଦେଇ ପଦକ୍ଷେପ ନେବା ପାଇଁ ଅଞ୍ଚଳବାସୀ ଦାବି କରିଛନ୍ତି।
