ଉଲୁଣ୍ଡା, ୧୪ା୮ (ଡି.ଏନ୍.ଏ): ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ କୋଟସମଲାଇ ପଁଚେତ୍ ଖଜୁରିଆପାଲି ଗଁାରେ ଜଂଗଲି ହାତୀକର ଉତ୍ପାତ ଦେଖ୍ବାକେ ମିଲିଛେ। ସୋମବାର ଅଧ୍ରାତିରେ ଇ ଗଁାର କିଶୋର ଗଡୁଆକଁର ଘର ଭାଂଗିଦେବାର ସଂଗେ ଜିନିଷପାତି ଭଂଗାରୁଜା କରିଥିବାର ଜନାଯାଇଛେ। କିଶୋରକଁର ପରିବାର ଖାଇପିଇ ଶୁଇଥିଲାବେଲେ ରାତି ପାଖାପାଖି ୩ ବଜେ ହାତୀ ଘରର କଁାଥି ଭାଂଗି ଭିତରକେ ପଶିଥିଲା। ସେନ୍ତା ହାତୀ ଗଁାର କ୍ଲବ ଘରର ଝରକା କବାଟ ଭାଂଗି ଦେଇଛେ। ଇତାର ବାହାରେ ତୋଫାନ ଦେହେରୀକଁର ପାଖାପାଖି ଅଧ୍ଏକର ଧାନ୍ ଫସଲକେ ମାଡ଼ିଦଲି ଖରାପ କରିଦେଇଥିବାର ଅଭିଯୋଗ ହେଇଛେ। ଇ ବାବ୍ଦେ ରେଞ୍ଜର ଶିବ ପ୍ରସାଦ ନାଏକକୁଁ ପଚରାଲାରୁ ଘଟନାର ତଦଁତ୍ କରି ଯେନ୍ମାନକର କ୍ଷୟକ୍ଷତି ହେଇଛେ ତାହାକୁ ସରକାରୀ ସାହାଯ୍ ଯୁଗେଇ ଦିଆଯିବା ବଲି ସେ କହିଥିଲେ।
