ପରଜଙ୍ଗ, ୧୦ା୩(ଡି.ଏନ.ଏ.)- ଘରେ କୌଣସି କାରଣରୁ ପାଟିତୁଣ୍ଡ କରି ରାଗରେ ଏକ ବାଇକ୍ ଧରି ପଳାଇ ଆସୁଥିବା ବେଳେ ଗଛରେ ପିଟି ହୋଇ ଜଣେ ଯୁବକଙ୍କ ମୃତ୍ୟୁ ହୋଇଛି । ଢେଙ୍କାନାଳ ଜିଲା ପରଜଙ୍ଗ ଥାନା ଭାଲୁମୁଣ୍ଡା-ଆଲୁଅଝରଣ ପୂର୍ତ୍ତ ବିଭାଗ ରାସ୍ତାର ବାରଘରିଆ ଗାଁ ନିକଟରେ ମଙ୍ଗଳବାର ଅପରାହ୍ନରେ ଏହି ଦୁର୍ଘଟଣା ଘଟିଛି । ମୃତକ ପାଟରପଦା ଗ୍ରାମର ରାକେଶ ସାହୁ (୨୫) ବୋଲି ଜଣାପଡିଛି।
ରାକେଶଙ୍କ ବାପା ରବି ନାରାୟଣ ସାହୁଙ୍କ ସୂଚନା ମୁତାବକ, ଘରେ ପାଟିତୁଣ୍ଡ କରି ରାକେଶ ଏକ ବାଇକ୍ (ନଂ. ଓଡ଼ି ୧୪ଡି ୮୨୧୦) ଧରି ଝାରସୁଗୁଡା ଅଭିମୁଖେ ବାହାରି ଯାଇଥିଲେ। ବାରଘରିଆ ନିକଟରେ ସେ ଭାରସାମ୍ୟ ହରାଇ ଏକ ତାଳଗଛରେ ପିଟି ହୋଇଯାଇଥିଲେ। ବାଇକଟି ବିଲରେ ପଡିବା ସହ ଘଟଣାସ୍ଥଳରେ ରାକେଶଙ୍କ ମୃତ୍ୟୁ ହୋଇଥିଲା। ଦୁର୍ଘଟଣା ସ୍ଥଳରେ ପରଜଙ୍ଗ ଥାନା ଅଧିକାରୀ ସନ୍ତୋଷ ପ୍ରଧାନ, ଏସ୍ଆଇ ବ୍ରଜକିଶୋର ମଲ୍ଲିକ, ସମରଜିତ ନାୟକ ପହଞ୍ଚି ବାଇକଟିକୁ ଜବତ କରିବା ସହ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛନ୍ତି । ଏ ସଂକ୍ରାନ୍ତରେ ପରଜଙ୍ଗ ଥାନାରେ ନଂ. ୫୦/୨୦ ରେ ଏକ ମାମଲା ରୁଜୁ ହୋଇଛି। ଘଟଣାର ତଦନ୍ତ ଚାଲିଥିବା ପୋଲିସ କହିଛି।
