ଢେଙ୍କାନାଳ ଅଫିସ, ୨।୧୧
ନିଖୋଜର ଦୀର୍ଘ ୯ମାସ ପରେ ପରିବାର ଲୋକଙ୍କ ସହ ଘରକୁ ଫେରିଛନ୍ତି ବୃଦ୍ଧ ତୁଫାନୀ। ଏଥିପାଇଁ ସେ ମହର୍ଷି ଦୟାନନ୍ଦ ମିଶନ ଆଶ୍ରମ ଜରାଶ୍ରମର କର୍ମକର୍ତ୍ତାଙ୍କୁ ସାଧୁବାଦ ଜଣାଇଛନ୍ତି।
ସୂଚନାଯୋଗ୍ୟ, ତୁଫାନୀଙ୍କ ପୈତୃକ ଗ୍ରାମ ବିହାରର ସୋହା ଜିଲାରେ। ଦୀର୍ଘ ୯ମାସ ତଳେ ସେ ନିଖୋଜ ହୋଇଯାଇଥିଲେ। ଗତ ଦୀପାବଳିରେ ଢେଙ୍କାନାଳ ଜିଲା କଙ୍କଡ଼ାହାଡ଼ ଥାନା ଅଞ୍ଚଳରୁ ତାଙ୍କୁ ଉଦ୍ଧାର କରାଯାଇଥିଲା। ପୋଲିସ ସହାୟତାରେ ତାଙ୍କୁ ସଦର ବ୍ଲକ ଗୋବିନ୍ଦପୁରସ୍ଥିତ ମହର୍ଷି ଦୟାନନ୍ଦ ମିଶନ ଆଶ୍ରମ ଜରାଶ୍ରମରେ ଥଇଥାନ କରାଯାଇଥିଲା। ସୂଚନା ପାଇ ତୁଫାନୀଙ୍କ ପୁଅ ମହମ୍ମଦ ଜାହିର, ସ୍ତ୍ରୀ ସୁବେଦା ଏବଂ ଅନ୍ୟ ପରିବାର ସଦସ୍ୟ ଶୁକ୍ରବାର ଜରାଶ୍ରମରେ ପହଞ୍ଚତ୍ଥିଲେ। ଅପରାହ୍ନ ୨ଟାରେ ଟ୍ରେନ୍ରେ ସମସ୍ତେ ଘର ଅଭିମୁଖେ ବାହୁଡ଼ିଛନ୍ତି।
ମହମ୍ମଦଙ୍କ କହିବା କଥା, ବାପା ତୁଫାନୀ ହେଉଛନ୍ତି ସୋହାର ଜଣେ ଓ୍ବାର୍ଡ ସଦସ୍ୟ। ଗତ ଫେବୃୟାରୀରେ ନୂଆଦିଲ୍ଲୀର ଆନନ୍ଦ ବିହାର ଅଞ୍ଚଳର ଜଣେ ସମ୍ପର୍କୀୟଙ୍କ ଘରକୁ ଯାଇଥିଲେ। ଏହାପରେ ସେ ନିଖୋଜ ହୋଇଯାଇଥିଲେ। ତାଙ୍କୁ ଖୋଜିବା ପାଇଁ ବିଭିନ୍ନ ଥାନା ଏବଂ ଜରାଶ୍ରମକୁ ଯୋଗାଯୋଗ କରାଯାଇଥିଲା। ମହର୍ଷି ଦୟାନନ୍ଦ ସର୍ଭିସ ମିଶନର ସମ୍ପାଦକ ପ୍ରଦୀପ ସାହୁଙ୍କ ଉଦ୍ୟମରେ ବାପାଙ୍କ ସମ୍ପର୍କରେ ଜଣାପଡ଼ିଥିଲା। ପରିବାର ଲୋକଙ୍କ ସହ ମିଶିବା ପରେ ତୁଫାନୀ ଭାବବିହ୍ବଳ ହୋଇପଡ଼ିଥିବା ଦେଖିବାକୁ ମିଳିଥିଲା।
