ଭୁବନେଶ୍ୱର, ୧୯।୫(ବ୍ୟୁରୋ): ଘଣ୍ଟାକୁ ୧୫ କିମି ବେଗରେ ଗତି କରୁଛି ବାତ୍ୟା ‘ଅମ୍ଫନ’। ଆଇଏମ୍ଡି ଡିଜି ମୃତ୍ୟୁଞ୍ଜୟ ମହାପାତ୍ରଙ୍କ କହିବାନୁସାରେ ପୂର୍ବ ନିର୍ଦ୍ଧାରିତ ପଥରେ ଗତି କରୁଛି ଅମ୍ଫନ। ଏ ନେଇ ଏସ୍ଆରସି ପ୍ରଦୀପ ଜେନା ସୂଚନା ଦେଇଛନ୍ତି। ତାଙ୍କ କହିବା ଅନୁଯାୟୀ, ବୁଧବାର ଅପରାହ୍ନରୁ ସନ୍ଧ୍ୟା ଭିତରେ ଦୀଘା-ହାତିଆ ମଝିରେ ଥିବା ସୁନ୍ଦରବନରେ ସ୍ଥଳଭାଗ ଛୁଇଁବ ବାତ୍ୟା। ଫଳରେ ଉତ୍ତର ଓ ଉପକୂଳ ଉଡ଼ିଶାରେ ପ୍ରବଳ ବର୍ଷା ହେବ। ୧୧୦ରୁ ୧୨୦ କିମି ବେଗରେ ପବନ ବହିବ। ସ୍ଥଳ ବିଶେଷରେ ୧୩୫ କିମି ହୋଇପାରେ। ଏ ନେଇ କିଛି ଜିଲାରେ ଲୋକଙ୍କୁ ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହୋଇଛି। ଗଜପତିରେ ଭୂସ୍ଖଳନ ଆଶଙ୍କାରେ କିଛି ଲୋକଙ୍କୁ ସ୍ଥାନାନ୍ତର କରାଯାଇଛି। ଓଡ଼ିଶା ଉପକୂଳରେ ଆକସ୍ମିକ ଜୁଆର ମାଡ଼ିବା ସମ୍ଭାବନା ନାହିଁ। ଏଯାବତ୍ ମୋଟ ୧୩ଟି ଏନ୍ଡିଆର୍ଏଫ୍ ଏବଂ ଓଡ୍ରାଫ୍ ଟିମ୍ ନିୟୋଜିତ କରାଯାଇଛି। ଆମପାଖରେ ୫ଟି ଏନ୍ଡିଆର୍ଏଫ୍ ଓ ୫ଟି ଓଡ୍ରାଫ୍ ଟିମ୍ ରିଜର୍ଭ ରହିଛି ବୋଲି ଏସ୍ଆର୍ସି କହିଛନ୍ତି। ଜଳ ସମ୍ପଦ, ପୂର୍ତ୍ତ, ଶକ୍ତି ବିଭାଗକୁ ନେଇ ରାପିଡ୍ ରେସପନ୍ସ ଟିମ୍ ଗଠିତ ହୋଇଛି। ପାନୀୟ ଜଳ ଯୋଗାଣ ପାଇ ସମସ୍ତ ପ୍ରକାର ପ୍ରସ୍ତୁତି ସରିଛି। ଆଜି ସଂନ୍ଧ୍ୟା ସୁଦ୍ଧା ଲୋକଙ୍କୁ ସ୍ଥାନାନ୍ତରଣ କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି। ପରିସ୍ଥିତି ଦେଖି ଲୋକଙ୍କୁ ସତର୍କ ମେସେଜ ଦିଆଯିବ। ସାଇରନ ବାଜିବ ବୋଲି ଏସ୍ଆରସି ଜେନା ସୂଚନା ଦେଇଛନ୍ତି।
