ବଇଣ୍ଡା,୭।୬(ଡି.ଏନ.ଏ.)-କଟକ-ସମ୍ବଲପୁର ୫୫ନଂ. ଜାତୀୟ ରାଜପଥର କିଶୋରନଗର ଥାନା ଶୁଶବଠାରେ ରବିବାର ସକାଳେ ଏକ ଆଇରନ ବୋଝେଇ ଟ୍ରକରେ ନିଆଁ ଲାଗି ଜଳିଯାଇଛି। ଏଥିରେ ଟ୍ରକରେ ବସିଥିବା ଚାଳକ ଓ ହେଲପର ଅଳ୍ପକେ ବର୍ତ୍ତି ଯାଇଛନ୍ତି।
ଘଟଣାରୁ ଜଣାପଡ଼ିଛି, ପାରାଦୀପରୁ ସମ୍ବଲପୁର ଅଭିମୁଖେ ଆଇରନ ଗୁଣ୍ଡ ବୋଝେଇ କରି ଏକ ଟ୍ରକ ଯାଉଥିବାବେଳେ ଶୁଶୁବଠାରେ ଚାଳକ ଟ୍ରକଟିକୁ ଗଛ ତଳେ ଅଟକାଇଥିଲେ। ପରେ ଚାଳକ ଓ ହେଲପର ଏକ ଛୋଟ ଗ୍ୟାସ ସାହାଯ୍ୟରେ ରୋଷେଇ କରୁଥିବାବେଳେ ଗଛରେ ଥିବା ମହୁମାଛିମାନେ ଉଭୟଙ୍କୁ ଆକ୍ରମଣ କରିଥିଲେ। ଉଭୟେ ଘଟଣାସ୍ଥଳରୁ ଦୌଡି ପଳାଇ ଯାଇଥିଲେ। ଫଳରେ ଟ୍ରକ ଭିତରେ ଥିବା ଗ୍ୟାସଟି ପଡି ଯାଇ ନିଆଁ ଲାଗି ଯାଇଥିଲା। ଖବରପାଇ ବାମୁର ଅଗ୍ନିଶମ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ।
