ନୂଆପଡ଼ା ଅଫିସ,୨୨ା୫-ମହାମାରୀ କରୋନା ସମଗ୍ର ବିଶ୍ୱକୁ ଗ୍ରାସିଛି। ଭାରତରେ ଏହାର ମୁକାବିଲା ଲାଗି କେତେକ କଟକଣା ଜାରି କରାଯାଇଛି। ସମଗ୍ର ଦେଶ ଲକ୍ଡାଉନ୍ ରହିଛି। ଲକ୍ଡାଉନ୍ ଯୋଗୁ ଲୋକଙ୍କ ଜୀବନ ଜୀବିକା ଦୁର୍ବିଷହ ହୋଇ ପଡ଼ିଲାଣି। ଆଶା ଆଉ ଆଶଙ୍କା ଭିତରେ ଲୋକେ ଦିନ କାଟୁଛନ୍ତି। ଓଡ଼ିଶାର ୩୦ ଜିଲାରୁ ୨୨ଟି ଜିଲା କରୋନା କବଳରେ ପଡ଼ିଲାଣି। ଅବଶ୍ୟ ନୂଆପଡା ଜିଲା ବର୍ତ୍ତମାନ ସୁଦ୍ଧା ଗ୍ରୀନ୍ ଜୋନ୍ରେ ରହିଛି। ଏଠାରେ ଏବେ ସୁଦ୍ଧା କେହି କରୋନା ଆକ୍ରାନ୍ତ ଚିହ୍ନଟ ହୋଇ ନାହାନ୍ତି। ଏଣୁ ଲୋକେ ଟିକିଏ ଆଶ୍ୱସ୍ତ ଅଛନ୍ତି। ହେଲେ ଜିଲାକୁ ଆସିବାକୁ ଥିବା ପ୍ରବାସୀ ଓଡ଼ିଆଙ୍କ ଚିନ୍ତା ଲୋକଙ୍କୁ ଘାରିଛି। ଜିଲାକୁ ଫେରିବାକୁ ୭୦ହଜାର ଶ୍ରମିକ ପଞ୍ଜୀକରଣ କରିଛନ୍ତି। ହେଲେ ମାତ୍ର ୧୦ହଜାର ଶ୍ରମିକ ଆସିଛନ୍ତି। ବାକି ୬୦ହଜାର ଶ୍ରମିକ ଆସିବେ। ଏଣୁ ସେମାନେ ଫେରିବା ପରେ ସ୍ଥିତି କ’ଣ ହେବ ତାହାକୁ ନେଇ ଭୟ ରହୁଛି। ଅବଶ୍ୟ ସେମାନଙ୍କ ଆଗମନକୁ ଦୃଷ୍ଟିରେ ରଖି ଜିଲାବ୍ୟାପୀ କ୍ୱାରାଣ୍ଟାଇନ୍ ସେଣ୍ଟର ଖୋଲା ଯାଇଛି। ହେଲେ ଏହା ଯଥେଷ୍ଟ ନୁହେଁ ବୋଲି ପ୍ରମାଣ କରୁଛି। କାରଣ ଜିଲାର ୧୩୧ଟି ପଞ୍ଚାୟତ ଏବଂ ୩ଟି ଏନ୍ଏସିରେ ମାତ୍ର ୭୮୧ଟି ସଙ୍ଗରୋଧ କେନ୍ଦ୍ରର ବ୍ୟବସ୍ଥା ହୋଇଛି। ଏଥିରେ ପାଖାପାଖି ୨୯ହଜାର ୭୨୧ଲୋକଙ୍କୁ ରଖାଯାଇପାରିବ। ଏଣୁ ବାକି ପ୍ରବାସୀ କେଉଁଠି ରହିବେ ତାହାକୁ ନେଇ ପ୍ରଶ୍ନ ଉଠିଛି।
ଅନ୍ୟପକ୍ଷେ ଏହି ଜିଲାରୁ ଏ ପର୍ଯ୍ୟନ୍ତ ମାତ୍ର ୧ ହଜାର ସ୍ବାବ୍ ପରୀକ୍ଷା ସକାଶେ ଯାଇଛି, ମାତ୍ର ୩୨୧ଟି ନମୁନାର ରିପୋର୍ଟ ଆସିଛି। ବାକି ୬୭୯ ରିପୋର୍ଟ ମିଳି ନାହିଁ। ପୁଣି ସ୍ବାବ୍ ପରୀକ୍ଷା କଥା ବିଚାରକୁ ନିଆଗଲେ ବିଭିନ୍ନ କାରଣରୁ ରିପୋର୍ଟ ବିଳମ୍ବରେ ଆସୁଛି। ତେବେ ସିଡିଏମ୍ଓ କାଳୀପ୍ରସାଦ ବେହେରା ରିପୋର୍ଟ ମିଳିବାରେ ବିଳମ୍ବ ହେବାକୁ ସ୍ବୀକାର କରିଛନ୍ତି। ହେଲେ କାରଣ ଜାଣି ନାହାନ୍ତି। ମୁକାବିଲା ପାଇଁ କିନ୍ତୁ ସବୁ ପ୍ରକାର ପ୍ରସ୍ତୁତି କରାଯାଇଛି। ପ୍ରଶାସନର ସମସ୍ତେ ସଜାଗ ଥିବା କହିଛନ୍ତି।
