ବରଗଡ଼ ଅଫିସ୍,୬।୪: ରାଜ୍ୟ ବାହାରକୁ କର୍ମ ଅନ୍ବେଷଣରେ ଯାଇ କିଛି ରୋଜଗାର ଆଶା ରଖିଥିଲେ । ମାତ୍ର ଲକ୍ ଡାଉନ୍ ନୁହେଁ, ସଟ୍ ଡାଉନ କଟକଣା ଲାଗୁ ହେବାରୁ ଗୁଜୁରାଟର ଜାମନଗର ଦାରେଦ୍ ଅଞ୍ଚଳରେ ବରଗଡ଼ ଜିଲାର ଶ୍ରମିକମାନେ ଫସି ରହି ଦୁର୍ବିସହ ଜୀବନ ଅତିବାହିତ କରୁଥିବା ସୂଚନା ମିଳିଛି । ସେମାନଙ୍କ ପାଖକୁ ସେଠାକାର ପ୍ରଶାସନ ପକ୍ଷରୁ କିଛି ସହାୟତା ପହଞ୍ଚି ନଥିବା ଯୋଗୁ ସେମାନେ ଭୋକ, ଉପାସରେ ଦିନ କାଟୁଛନ୍ତି । ସୂଚନା ଅନୁଯାୟୀ ବରଗଡ଼ ଜିଲା ବରିକେଲ ଅଞ୍ଚଳର ୨୮ଜଣ ଶ୍ରମିକ କିଛିମାସ ଆଗରୁ ଗୁଜୁରାଟକୁ କର୍ମ ଅନ୍ବେଷଣରେ ଯାଇଥିଲେ। ସେଠାକାର ଜାମନଗର ଦାରେଦ୍ ଅଞ୍ଚଳରେ ରହିଥିବା ଏକ କନଷ୍ଟ୍ରକ୍ସନ କମ୍ପାନୀ ଜୟ ଜଲାରାମ ଏକ୍ସଟ୍ରୁଶନ ଅଧିନରେ ସେମାନେ କାମ କରୁଥିଲେ । ଲକଡାଉନ ପରେ ସେଠାରେ ସେମାନଙ୍କ ରୋଜଗାର ବନ୍ଦ ହୋଇଯାଇଛି । ଯାହା ରୋଜଗାର କରିଥିଲେ, ତାହା ମଧ୍ୟ ସରି ଯାଇଥିବା ଶ୍ରମିକମାନେ ସୂଚନା ଦେଇଛନ୍ତି । ଅନ୍ୟପକ୍ଷେ ସେମାନେ ଯେଉଁ ଅଞ୍ଚଳରେ ରହୁଛନ୍ତି ସେଠାରେ ସଟ୍ଡାଉନ୍ କଟକଣା ଲାଗୁ ହୋଇଛି । ଫଳରେ ସେମାନେ ଆଦୌ ଘରକୁ ବାହାରି ପାରୁ ନାହାନ୍ତି । ଏ ନେଇ ଶ୍ରମିକମାନେ ସୋସିଆଲ ମିଡ଼ିଆରେ ଜଣାଇବା ପରେ ତାହା ବରଗଡ଼ର ସାମାଜିକ କର୍ମୀ ଦିବସ କୁମାର ସାହୁଙ୍କ ନଜରକୁ ଆସିଥିଲା । ଏହାପରେ ସାମାଜିକ କର୍ମୀ ସାହୁ ସେମାନଙ୍କୁ ରାଶନ ସାମଗ୍ରୀ ଯୋଗାଇ ଦେବା ପାଇଁ ରବିବାର ଗୁଜୁରାଟର ପ୍ରଶାସନ ସହିତ ସୋସିଆଲ ମିଡ଼ିଆରେ ଯୋଗାଯୋଗ କରି ବିହିତ ପଦକ୍ଷେପ ନିବେଦନ କରିଥିବା କହିଛନ୍ତି । ସେମାନେ ଯେଭଳି ରାଶନ ସାମଗ୍ରୀ ପାଇ ପାରିବେ, ସେ ନେଇ ଗୁଜୁରାଟ ସରକାର, ପ୍ରଶାସନ ସହିତ ତାଙ୍କ ଯୋଗାଯୋଗ ଜାରି ରହିଛି ବୋଲି ସେ କହିଛନ୍ତି ।
