କପ୍ତିପଦା, ୩।୨(ଡି.ଏନ.ଏ.)-ମୟୂରଭଞ୍ଜ ଜିଲା କପ୍ତିପଦା ବ୍ଲକ ଅଧୀନ ଲାବଣ୍ୟଦେଇପୁର ପଞ୍ଚାୟତର ଗଜାପଥର ଓ ଶରତ ପଞ୍ଚାୟତର ଅଶ୍ୱକୂଟୀ ଛକ ସାହି ଗ୍ରାମ ଏବେ ବି ପ୍ରଶାସନର ଦୃଷ୍ଟି ଆଢୁଆଳରେ ରହିଛି। ଫଳରେ ଗଜାପଥର ଗ୍ରାମରେ ଆଦିବାସୀ ସମ୍ପ୍ରଦାୟର ୩୦୦ ଓ ଅଶ୍ୱକୂଟୀ ଛକସାହିରେ ୧୦୦ରୁ ଊର୍ଦ୍ଧ୍ୱ ଲୋକ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବାରମ୍ବାର ଅଭିଯୋଗ ପରେ ମଧ୍ୟ ପ୍ରଶାସନ ନୀରବଦ୍ରଷ୍ଟା। ଅଦ୍ୟାବଧି ଗଜାପଥର ଗ୍ରାମର ଲୋକ ମାନେ ଚୁଆ ପାଣି ପିଉଛନ୍ତି। ସରକାରୀ ଭାବେ ଏହି ଗାଁରେ କେବଳ ଗୋଟିଏ ଛୋଟ ଗଡିଆ ଓ ଏକ ନଳକୂଅ ରହିଛି। ଯାହାକି ଖରାଦିନେ ଶୁଖିଯାଏ। ଏହାପରେ ଗ୍ର୍ରାମବାସୀ ବାଧ୍ୟ ହୁଅନ୍ତି ବିଲ ମାନଙ୍କରେ ଚୁଆ ତାଡି ସେହି ପାଣିକୁ ବ୍ୟବହାର କରିବା ପାଇଁ। ଗାଁରେ ଛୋଟ ଛୋଟ ପିଲାମାନେ ମଧ୍ୟ ସେହି ଦୂଷିତ ପାଣି ପିଇବାକୁ ବାଧ୍ୟ ହୋଇଥାନ୍ତି। ଗୋଳିଆ ପାଣି ଗଡିଆରେ ଗାଧୋଇବା ଓ ଚୁଆ ପାଣି ପିଇ ଗ୍ରାମର ପିଲା ମାନେ ବହୁ ଦୂରାରୋଗରେ ପଡୁଥିବାର ସ୍ଥାନୀୟବାସୀ ରାୟ ସିଂ ଓ ପୂଜା ସିଂ କହିଛନ୍ତି।
ଗାଁରେ ଥିବା ଏକ ମାତ୍ର ନଳକୂଅଟିରେ ଖରା ଦିିନେ ଜଳସ୍ତର ତଳକୁ ଚାଲି ଯାଉଥିବାରୁ ପାଣି ବାହାରେ ନାହିଁ। ପଥୁରିଆ ଅଞ୍ଚଳ ଆଳ କରି ଜଳସ୍ତର ଠିକ୍ ଭାବେ ନ ଥିବାରୁ ନୂତନ ନଳକୂପ ମଧ୍ୟ ଖୋଳା ଯାଉ ନାହିଁ। ଯାହା ଫଳରେ ସେହି ଚୁଆ ପାଣି ଲୋକ ମାନଙ୍କର ଜୀବନ ବଞ୍ଚାଉଥିବା ଅର୍ଜୁନ ସିଂ ଓ ଘାସିରାମ ସିଂ କହିଛନ୍ତି। ଖରା ଦିନେ ବିଭାଗ ପକ୍ଷରୁ ୨ ଦିନରେ ଥରେ ଟ୍ୟାଙ୍କର ପାଣି ଯୋଗା ଯାଇଥାଏ ା ତାହା ମଧ୍ୟ ଆବଶ୍ୟକ ତୁଳନାରେ ଯଥେଷ୍ଟ ନୁହେଁ। ଆଗକୁ ବଡ଼ ଖରାଦିନ ଆସୁଥିବାରୁ ସମସ୍ୟା ମୁଣ୍ଡ ଟେକିଛି ା ଡହ ଡହ ଖରାରେ ସେମାନଙ୍କୁ ଲାଇନରେ ଛିଡା ହୋଇ ପାଣି ସଂଗ୍ରହ କରିବାକୁ ପଡୁଛି। ଯାହାକୁ ନେଇ ଗ୍ରାମରେ ମହିଳା ମାନଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି।
ସେହିପରି ଅଶ୍ୱକୂଟୀ ଛକ ସାହିରେ ନଳକୂପ ନ ଥିବା ବେଳେ ଅଧ କି.ମି ଦୂର ଅଶ୍ୱକୂଟୀ ତଳ ସାହିରେ ଗୋଟିଏ ମାତ୍ର ନଳକୂପ ରହିଛି। ସମୟ ସମୟରେ ପୁରୁଷ ଲୋକ ମାନେ ସେଠାରୁ ପାଣି ସଂଗ୍ରହ କରି ଆଣୁଥିବା ବେଳେ ଚୁଆ ଓ କାପଡଗାଡା ନାଳ ପାଣି ସେମାନଙ୍କର ଜୀବନ ବଞ୍ଚାଇଛି ବୋଲି ଗ୍ରାମବାସୀ କହିଛନ୍ତି। ସ୍ବାଧୀନତାର ୭୨ ବର୍ଷ ପରେ ମଧ୍ୟ ଯେଉଁଠି ଚୁଆ ପାଣି ଭରସା ସେଠାରେ ଲୋକ ମାନେ ବିକାଶ କଣ ବୁଝିବେ ବୋଲି ତୁରି ସିଂ କହିଛନ୍ତି। ଗ୍ରାମରେ ଥିବା ଗୃହ ପାଳିତ ପଶୁ ମାନେ ମଧ୍ୟ ପାଣି ପିଇବା ପାଇଁ ବହୁ ସମସ୍ୟା ଦେଖାଦେଇଛି। ମାଲିିକ ମାନେ ସେମାନଙ୍କୁ ଗାଁ ଠାରୁ ୨ କି.ମି ଦୂରରେ ଥିବା ଏକ ଝରଣାକୁ ପାଣି ପିଇବାକୁ ନେଇଥାନ୍ତି। କେତେକ ମହିଳା ନିଜେ ପାଣି ଆଣି ସେମାନଙ୍କୁ ଦେଇଥାନ୍ତି। ଚୁଆ ଗୁଡିକ ମଧ୍ୟ ସେପରି ଆବଦ୍ଧ ନ ଥିବାରୁ ଗାଈ, ଛେଳି, ମେଣ୍ଢା ଆଦି ସେହି ଚୁଆରୁ ପାଣି ପିଇଥାନ୍ତି। ଏପରିକି ସମୟ ସମୟରେ ଏହି ଗୃହ ପାଳିତ ପଶୁ ମାନେ ଚୁଆକୁ ପାଣି ପିଇବାକୁ ଯାଇ ଚୁଆରେ ପଡି ମୃତ୍ୟୁମୁଖରେ ପଡିଥିବା ନଜିର ରହିଛି। ଏହି ଚୁଆର ରକ୍ଷଣାବେକ୍ଷଣ ଯଦିବି ପ୍ରଶାସନ କରନ୍ତା ତେବେ ଲୋକେ ଟିକେ ଶୁଦ୍ଧ ଜଳ ପିଇବାକୁ ପାଆନ୍ତେ ବୋଲି ଗ୍ରାମବାସୀ ପ୍ରକାଶ କରିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀଙ୍କୁ ପଚାରିବାରୁ ସେ କହନ୍ତି ଗଜାପଥରରେ ଗୋଟିଏ ନଳକୂଅ ତଡା ଯାଇଥିବା ବେଳେ ଅନ୍ୟ ଗୋଟିଏ ପାଇଁ ପ୍ରସ୍ତାବ ରହିଛି ା ସେହିପରି ଅଶ୍ୱକୂଟୀ ପାଇଁ ମଧ୍ୟ ପ୍ରସ୍ତାବ ରହିଛି। ପଥୁରିଆ ଜାଗା ହୋଇଥିବାରୁ ସମସ୍ୟା ରହୁଛି ା ତେବେ ସେମାନଙ୍କୁ ଖରାଦିନେ ଟ୍ୟାଙ୍କରରେ ପାଣି ଦିଆଯାଇଥାଏ।
