ଛତ୍ରପୁର,୫।୨(ଡି.ଏନ୍.ଏ.) : ୨୦୨୫ ସୁଦ୍ଧା ରାଜ୍ୟ ହେବ ଶିଶୁଶ୍ରମିକ ମୁକ୍ତ। ଶୈଶବ କିପରି ସୁରକ୍ଷିତ ରହିବ ସେ ଦିଗରେ ସରକାର ଲକ୍ଷ୍ୟ ରଖିଛନ୍ତି। ଛତ୍ରପୁର ସର୍କିଟ ହାଉସ ପରିସରରେ ବୁଧବାର ଏନେଇ ଆୟୋଜିତ ଏକ ଖବରଦାତା ସମିଳନୀରେ ରାଜ୍ୟ ଶିଶୁ ସୁରକ୍ଷା ଆୟୋଗର ଅଧ୍ୟକ୍ଷା ସୁଶ୍ରୀ ସନ୍ଧ୍ୟାବତୀ ପ୍ରଧାନ ଏହି ସୂଚନା ଦେଇଛନ୍ତି। ସାରା ବିଶ୍ୱରେ ଶିଶୁଶ୍ରମିକ ଏକ ଜଟିଳ ସମସ୍ୟା ଯାହାକୁ ରୋକାଯାଇପାରୁ ନାହିଁ। ଆର୍ଥିକ ଅନଗ୍ରସର ଅଭିଭାବକ ନିଜର ସନ୍ତାନମାନଙ୍କୁ ପଢ଼ାଇବା ବଦଳରେ ବଳ ପୂର୍ବକ କାମରେ ଲଗାଉଛନ୍ତି। ସାରା ବିଶ୍ୱରେ ଶିଶୁଶ୍ରମିକ ନିର୍ଯାତିତ ହେଉଛନ୍ତି। ଏହି ବେଆଇନ କାର୍ଯ୍ୟ ବିରୋଧରେ ଜନ ସଚେତନତା ନିମନ୍ତେ ରାଜ୍ୟ ସରକାର ଏଭଳି ପଦକ୍ଷେପ ଗ୍ରହଣ କରିଛନ୍ତି। ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ଏବଂ ରାଜ୍ୟ ଶ୍ରମ ଏବଂ କର୍ମଚାରୀ ବୀମା ବିଭାଗ ଏ ଦିଗରେ ଜନପ୍ରତିନିଧି, ସରକାରୀ ଅଧିକାରୀ ଏବଂ ବେସରକାରୀ ସଂସ୍ଥା ଓ କର୍ମକର୍ତ୍ତା ଓ ଅନ୍ୟାନ୍ୟ ଅଂଶଦାରୀମାନଙ୍କୁ ସଚେତନ କରିବା ଉଦ୍ଦେଶ୍ୟରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଥିରେ ଜିଲା ଶ୍ରମ, ଶିଶୁ ସୁରକ୍ଷା ବିଭାଗର ଅଧିକାରୀ ଉପସ୍ଥିତ ଥିଲେ
