ନୂଆପଡା ଅଫିସ,୧୬ା୫: ସରକାର ଗାଁରୁ ସହର ତକ୍ ମହିଲାମାନେ କେନ୍ଥେଇ ନିଜେର ଗୁଡ଼େ ନିଜେ ଠିଆ ହେଇପାରବେ, ଦୁଇପଏସା ରୁଜଗାର କରବେ ସେଥିରଲାଗି ଅନେକ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ଇ ଯୋଜନା ବିଫଲ ହେଉଥିବାର ଦେଖ୍ବାକେ ମିଲୁଛେ। ଅନେକ ଜାଗାରେ ଗାଁଗଁଲିର ମହିଲାକରନେ କଳା କାରିଗରୀ ଲୁକି ରହିଥିଲେ ବି ପୋରଛାହନ୍ ଅଭାବୁ ସେଟା ଫୁଟି ବାହାରକେ ନାଇଁ ଆସିପାରବାର। ଯେନ୍ଥିରଲାଗି ବନର ମଲି ବନେ ଫୁଟି ବନେ ମହଲିଲା ଲେଖେଁ ଅବସ୍ତା ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ନୂଆପଡ଼ା ଜିଲା ଖଡ଼ିଆଳ ବ୍ଲକ ଖୁଦପେଜ ଗାଁରେ। ଇ ଗାଁର ମହିଲାମାନେ ଧାନରେ ଅନେକ କିସମର ସଉଖିନ ସାମାନ ତିଆର କରୁଛନ୍। ହେଲେ ସେ ସବୁ ବିକାଭଂଗା କରବାର ଲାଗି ବଜାର ବେବସ୍ତା ବଡ଼ଭାରି ଅଭାବ ରହିଛେ। ଯେନ୍ଥିରଲାଗି ମହିଲା କାରିଗରମାନେ ଭଲ ଦୁଇପଏସା ରୁଜଗାର କରବାରୁ ବଁଚିତ୍ ହେଉଛନ୍।
ଖଡିଆଳରୁ ବୋଡ଼େନ ରାସ୍ତାରେ ୭ କି.ମି. ଗଲେ ଖୁଦପେଜ ଗାଁ ରହିଛେ। ଗାଁର ଲୋକ୍ ସଂଖ୍ୟା ପାଖାପାଖି ୨ ହଜାର ହେଇଥିଲାବେଲେ ଅନେକ ଲୋକ୍ ଅଭାବ ଅନାଟନ ଭିତରେ ଚଲୁଛନ୍। ଗାଁରେ ଲୁକ୍କର ଆୟର ପଁଥା କହେଲେ ଚାଷ୍ବାସ। ଇଥ୍ରେ ବଛରକ ୪ମାସ କାମବୁତା କରୁଥିଲାବେଲେ ବାକି ୮ମାସ ବସି ରହୁଛନ୍। ଲୋକ୍ ଏନ୍ତାଥି ବାହାର ରାଏଜ୍କେ ଦାଦନ ଖଟିଯାଉଛନ୍। ହେଲେ ଇ ଗାଁର କେତେ ସ୍ବୟଂ ସହାୟକ ଗୋଷ୍ଠୀର ମହିଲାମାନେ ନିଜେ ନିଜର ଆୟର ପଁଥା ଖୁଜିଛନ୍। ଚାଷ୍ବାସରୁ ଅମଲ ହେଉଥିବାର ଧାନକେ କେତେ ବିହନ, କେତେ ଖାଏବାର ଲାଗି ରଖୁଥିଲାବେଲେ ଆରକେତେ ଧାନକେ ମହିଲାମାନେ ବେଭାର କରି ସୁଁଦର ସୁଁଦର ମୂର୍ତ୍ତି ତିଆର କରୁଛନ୍। ସେମାନେ ଧନଲକ୍ଷ୍ମୀ ମୂର୍ତ୍ତି, ଟୁପଲି, ଭିନେ ଭିନେ ପରକାର ଫୁଲ ଆର ପୂଜା ସାମାନ ତିଆର କରୁଛନ୍। ହେଲେ ଇ କଳାକୁରତିର ବିକ୍ରିବଟା ଲାଗି ସରକାରୀ ବଜାର ବେବସ୍ତା ନଁାଇଁନ। ଯେନ୍ଥିରଲାଗି ମହିଳାମାନେ ଇ କଳାକୁରତିକେ ଆସରପାସର ହାଟ ବଜାରରେ ଅତି କମ୍ ଦରରେ ବିକ୍ରି କରୁଛନ୍। ମହିଲା କାରିଗରମାନକର କହେବାର ହିସାବେ ଗଲା ଦିନ୍ମାନକେ ନୂଆପଡ଼ା ଜିଲାର ମାରାଗୁଡ଼ା ଉଛବ୍ରେ ଇ କଳାକୁରତି ବିକି ହଜାର ହଜାର ଟଁକା କମେଇଥିଲୁଁ। ହେଲେ ସେଟା ବି ବଁଦ୍ ହେଇଗଲା, ଆମକୁ ଆର ବଜାର ସୁବିଧା ନାଇଁମିଲବାର ବଲି ସେମାନେ କହିଛନ୍। ଇଆଡ଼େ ଜିଲା ପରଶାସନ ତରଫୁ ତାଲିମ କି ପୋରଛାହନ୍ ନାଇଁ ମିଲବାର। ଯେନ୍ଥିରଲାଗି ଇ କଳା କାରିଗରୀ ଆଗ୍କେ ଆସି ନାଇଁପାରବାର ବଲି ସେମାନେ ଅଭିଯୋଗ କରିଛନ୍। ଇ କଳାକୁରତିର ପରଚାର ପରସାର, ବିକ୍ରିବଟା ଲାଗି ପରଶାସନ ଧିଆନଦେଲେ ଗଁାର ୫୦ରୁ ଅଧ୍କା ପରିବାର ରୁଜଗାର ପାଏତେ ଆର ଜିଲାର ନଁା ବି ସବୁଆଡ଼େ ପଡ଼ତା ବଲି ସେମାନେ କହିଛନ୍। ଇ ଦିଗେ ଜିଲା ପରଶାସନ ଦୁରୁଷ୍ଟି ଦେଇ ଇ କଳା କାରିଗରୀର ବଢ଼ତିର ଲାଗି ପୋରଛାହନ୍, ତାଲିମ, ବଜାର ବେବସ୍ତା କରବାକେ ଦାବି ହେଉଛେ।
