ଖଣ୍ଡପଡ଼ା ଅଞ୍ଚଳରେ ଅବାଧ ବାର୍‌ହା ଶିକାର
7:37 amOctober 20, 2019 / 21

ଖଣ୍ଡପଡା,୨୦।୧୦(ସ୍ବ.ପ୍ର.)-ଖଣ୍ଡପଡ଼ା ବନାଞ୍ଚଳ ଅଧୀନ ସଂରକ୍ଷିତ ଜଙ୍ଗଲଗୁଡ଼ିକରେ ବାର୍‌ହାଙ୍କ ସଂଖ୍ୟା ଆଶାତୀତ ଭାବେ ବୃଦ୍ଧି ପାଇଛି। ଫଳରେ ବାର୍‌ହା ଗ୍ରାମଗୁଡିକରେ ପଶି ଫସଲ ଖାଇବା ସହ ନଷ୍ଟ କରୁଛନ୍ତି। ଅନ୍ୟପକ୍ଷେ ଶିକାରୀମାନେ ବିଦ୍ୟୁତ୍‌ ତାର ବିଛାଇ ଅବାଧରେ ବାର୍‌ହା ଶିକାର କରୁଥିବା ଅଭିଯୋଗ ହେଉଛି।
ନିର୍ବାଚନମଣ୍ଡଳି ଅନ୍ତର୍ଗତ ଜଗନ୍ନାଥ ପ୍ରସାଦ, କୋସକା, ସିଂହାପଡା, ବେଣାଗାଡିଆ, ଗୋପୀନାଥପୁର, ବାଣପୁର, ଘଣାଶାଳିଆ, ବଳରାମପ୍ରସାଦ, ପଥରଚକଡା, ମାଧପୁର, ହନୁମନ୍ତ ପ୍ରସାଦ, ବାଉଁଶବାଟି, ମହୁଲବେରଣା ଆଦି ବିଭିନ୍ନ ଅଞ୍ଚଳର ଚାଷ ଜମିରେ ସଞ୍ଜ ନଇଁଲେ ପଲ ପଲ ବାର୍‌ହା ପଶୁଛନ୍ତି। ସେମାନେ ବିଲରେ ପଶି ପନିପରିବା ସହିତ ଧାନ, ଆଖୁ ଓ ସାରୁ ଫସଲ ନଷ୍ଟ କରୁଛନ୍ତି। ଏପରି କି ବାର୍‌ହାଙ୍କୁ ଘଉଡ଼ାଇବା ଚାଷୀମାନଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି ା ଅପରପକ୍ଷରେ କୁସୁମୀ ନଦୀ ପାର୍ଶ୍ୱସ୍ଥ ଇଲାକାରେ ଆଖପାଖ ଅଞ୍ଚଳର ଲୋକମାନେ ପନିପରିବା ଚାଷ କରିଥିବା ବେଳେ ବାର୍‌ହା ପଲ ରାତିରେ ସେଠାକୁ ଆସି ଫସଲ ନଷ୍ଟ କରୁଛନ୍ତି। ଏହାର ସୁଯୋଗ ନେଇ କେତେକ ଲୋକ ଉଠାଜଳସେଚନ ପଏଣ୍ଟ ଓ ପାନୀୟ ଜଳ ଯୋଗାଣ ପ୍ରକଳ୍ପକୁ ସଂଯୋଗ ହୋଇଥିବା ଉଚ୍ଚ ଶକ୍ତିସମ୍ପନ୍ନ ବିଦ୍ୟୁତ ତାରରେ ବେଆଇନ ହୁକ ପକାଇ ବାର୍‌ହା ଶିକାର କରୁଥିବା ଅଭିଯୋଗ ହେଉଛି ା ଖଣ୍ଡପଡା ବ୍ଲକ ଅଧୀନ ବନମାଳୀପୁର, ରାଣୀଛେଲ୍ଲୀ, ବାହାଡା, ରାଣୀପଡା, ଯୋଗିଆପଲ୍ଲୀ, ସିଂଘାପଡା, କିଆଝର, ବୋଦସା, କୋସକା, ଗଡିଆସାହି ପ୍ରଭ୍‌ୃତି ଅଞ୍ଚଳରେ ବାର୍‌ହା ଶିକାର ଏବେ ଏକ ନିତିଦିନିଆ ଘଟଣାରେ ପରିଣତ ହୋଇଛି। ଏହା ପରିବେଶବିତ୍‌ମାନଙ୍କ ପାଇଁ ଘୋର ଉଦ୍‌ବେଗର କାରଣ ପାଲଟିଛି ା ଏ ନେଇ ବନ ବିଭାଗ ନିକଟରେ ଖବର ଥିଲେ ହେଁ ବିଭାଗୀୟ କର୍ତ୍ତୃପକ୍ଷ ଅବାଧରେ ଚାଲିଥିବା ବାର୍‌ହା ଶିକାର ରୋକିବାରେ ସମ୍ପୂର୍ଣ୍ଣ ବିଫଳ ହୋଇଥିବା ଅଭିଯୋଗ ହେଉଛି ା ଖଣ୍ଡପଡା ବନାଞ୍ଚଳ ଅଧିକାରୀ ଶ୍ରୀଧର ପଣ୍ଡାଙ୍କ ସହ ଯୋଗାଯୋଗ କରିବାରେ ଏ ଦିଗରେ ପଦକ୍ଷେପ ଗ୍ରହଣ କରିବା ସହ ସେ ଅନୁସନ୍ଧାନ କରିବେ ବୋଲି ସୂଚନା ଦେଇଛନ୍ତି । ଅନ୍ୟପକ୍ଷେ ବିଦ୍ୟୁତ୍‌ ହୁକ ପକାଇ ରାତିରେ ବାର୍‌ହା ଶିକାର ବେଳେ ବିଦ୍ୟୁତ ବିଭ୍ରାଟ ଦେଖାଦେଉଛି। ବିଦ୍ୟୁତ କର୍ମଚାରୀମାନେ ଲାଇନ କାହିଁକି କଟିଲା ବୋଲି ଅନୁସନ୍ଧାନରେ ଯିବା ସମୟରେ ଶିକାର କରୁଥିବା ଅସାମାଜିକ ବ୍ୟକ୍ତିମାନେ ସେମାନଙ୍କୁ ଦୂରରୁ ଦେଖି ହୁକ ଲାଇନ ବିଚ୍ଛିନ୍ନ କରି ଅନ୍ୟତ୍ର ଚାଲି ଯାଉଛନ୍ତି। ଫଳରେ ସେମାନଙ୍କୁ ଧରିବା ସମ୍ଭବ ହେଉ ନ ଥିବା ବିଦ୍ୟୁତ ବିଭାଗ କର୍ମଚାରୀ କହିଛନ୍ତି । ଖଣ୍ଡପଡା ଅଞ୍ଚଳର ବିଭିନ୍ନ ସ୍ଥାନରେ ଚୋରାରେ ବିଦ୍ୟୁତ୍‌ ତାର ବିଛାଇ ବାର୍‌ହା ଶିକାର କରୁଥିବା ଶିକାରୀ ତଥା ଅସାମାଜିକ ବ୍ୟକ୍ତିଙ୍କ କାର୍ଯ୍ୟକଳାପ ପ୍ରତି ଖଣ୍ଡପଡା ବନାଞ୍ଚଳ ଅଧିକାରୀ, ନୟାଗଡ ବନଖଣ୍ଡ ଅଧିକାରୀ ଓ ସ୍ଥାନୀୟ ପୋଲିସ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ା