ରତ୍ନଗିରି,୪ା୫(ଡି.ଏନ୍.ଏ.): ଯାଜପୁର ଜିଲା ବରୀ ବ୍ଲକରେ କଳାମାଟିଆ, ଉଦୟନାଥପୁର ଓ ବାଇଁଶିରିଆ ପଞ୍ଚାୟତରେ ୪ କରୋନା ପଜିଟିଭ୍ ଚିହ୍ନଟ ହେବା ପରେ ପ୍ରଶାସନ ପକ୍ଷରୁ ପଜିଟିଭ୍ ବ୍ୟକ୍ତିମାନଙ୍କ ସଂସ୍ପର୍ଶରେ ଆସିଥିବା ଲୋକମାନଙ୍କୁ ଚିହ୍ନଟ କରାଯାଇଥିଲା। ମାତ୍ର ସରକାରୀସ୍ତରରେ ରାଜ୍ୟ ତଥା ଜିଲା ବାହାରୁ ଆସିଥିବା ବ୍ୟକ୍ତିମାନଙ୍କୁ ଏହି ସବୁ ଅସ୍ଥାୟୀ କ୍ୱାରାଣ୍ଟାଇନ୍ ସେଣ୍ଟରରେ ରଖାଯିବାକୁ ସରକାର ନିର୍ଦ୍ଦେଶ ଦେଇଥିଲେ। କିନ୍ତୁ ରବିବାର କଳାମାଟିଆ ପଞ୍ଚାୟତର କ୍ରମିକ ଆକ୍ରାନ୍ତ ସଂଖ୍ୟା ୧୫୨ଙ୍କ ପ୍ରାଥମିକ ସଂସ୍ପର୍ଶରେ ଆସିଥିବା ବ୍ୟକ୍ତିମାନଙ୍କ ଜିଲା ଡାକ୍ତରୀ ଦଳ ଦ୍ୱାରା ସ୍ଥାନୀୟ କାଶୀନାଥ ମହାବିଦ୍ୟାଳୟଠାରେ ସ୍ବାବ୍ ସଂଗ୍ରହ କରାଯାଇଥିଲା। ସ୍ବାବ୍ସଂଗ୍ରହ କରି ଡାକ୍ତରୀ ଟିମ୍ ଫେରିଯିବା ପରେ ସନ୍ଦିଗ୍ଧମାନେ ଦୀର୍ଘ ତିନି ଘଣ୍ଟା ଭୋକ ଉପାସରେ ଅପେକ୍ଷା କରି ନିଜ ନିଜ ଘରକୁ ଫେରିଯାଇଥିଲେ । ଉକ୍ତ ଘଟଣା ସୋସିଆଲ ମିଡିଆରେ ଭାଇରାଲ ହେବା ପରେ ବରୀ ତହସିଲଦାର ସରୋଜକାନ୍ତ ନାୟକ ଓ ବରୀ ଥାନାଧିକାରୀ ମାର୍କଣ୍ଡ ଚନ୍ଦ୍ର ମିଶ୍ର କଳାମାଟିଆରେ ପହଞ୍ଚି ସେମାନଙ୍କୁ ବୁଝାସୁଝା କରି କ୍ୱାରାଣ୍ଟାଇନ୍ କେନ୍ଦ୍ରରେ ରହିବାକୁ ପରାମର୍ଶ ଦେଇଥିଲେ। ଏ ବିଷୟରେ ଅଧିକ ସୂଚନା ପାଇଁ ବରୀ ଥାନାଧିକାରୀ ମାର୍କଣ୍ଡ ଚନ୍ଦ୍ର ମିଶ୍ରଙ୍କୁ ପଚାରିବାରୁ ପୋଲିସର କାର୍ଯ୍ୟ ହେଉଛି ଆଇନ ଶୃଙ୍ଖଳା ପରିସ୍ଥିତି ରକ୍ଷା କରିବା। ସେହିପରି କଳାମାଟିଆ ସରପଞ୍ଚଙ୍କୁ ପଚାରିବାରୁ ସେ କୁହନ୍ତି, ମତେ ବଦନାମ କରାଯାଉଛି । ସନ୍ଧ୍ୟାରେ ବରୀ ତହସିଲଦାର ଓ ଥାନାଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରି କ୍ୱାରାଣ୍ଟାଇନ୍ ସେଣ୍ଟରରେ ଆଣି ରଖିଛନ୍ତି।
