ଭୁବନେଶ୍ୱର, ୧୯ା୫(ବ୍ୟୁରୋ): ପ୍ରବାସୀ ଶ୍ରମିକମାନଙ୍କ ସକାଶେ ରାଜ୍ୟ ସରକାର ନୂଆ ଘୋଷଣା କରିଛନ୍ତି। ବାହାରୁ ଫେରିବାକୁ ଥିବା ଶ୍ରମିକମାନଙ୍କ ଟିକେଟ ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ସରକାରଙ୍କ ପକ୍ଷରୁ ସୂଚନା ଦିଆଯାଇଛି। ଏକ ବଡ ସଂଖ୍ୟାରେ ଶ୍ରମିକମାନେ ଶ୍ରମିକ ଏକ୍ସପ୍ରେସ୍ରେ ଓଡିଶା ଫେରୁଛନ୍ତି। ବିଭିନ୍ନ ରାଜ୍ୟରୁ ଶ୍ରମିକମାନେ ବର୍ତ୍ତମାନ ଫେରିବାରେ ଲାଗିଛନ୍ତି। ଯଦି ଶ୍ରମିକମାନେ ଆସୁଥିବା ରାଜ୍ୟ ସରକାର ଟିକେଟ ଖର୍ଚ୍ଚ ବହନ ନ କରନ୍ତି ତେବେ ଓଡିଶା ସରକାର ଏହି ଦାୟିତ୍ୱ ନେବେ। ମାତ୍ର ଶ୍ରମିକମାନେ ପ୍ରଥମେ ନିଜ ଖର୍ଚ୍ଚରେ ଓଡିଶା ଫେରିବେ। ଏହାପରେ ସେମାନଙ୍କ ଟିକେଟ ଖର୍ଚ୍ଚ ରାଜ୍ୟ ସରକାର ବହନ କରିବେ। ହେଲେ ଏହି ଅର୍ଥ ଶ୍ରମିକମାନଙ୍କ କ୍ୱାରାଣ୍ଟାଇନ ପାଉଣାରୁ କଟିବ ବୋଲି ଜଣାପଡ଼ିଛି। କ୍ୱାରାଣ୍ଟାଇନ ଶେଷରେ ୨ ହଜାର ଟଙ୍କା ଦେବାକୁ ସରକାର ଘୋଷଣା କରିଛନ୍ତି।
ସୂଚନାଯୋଗ୍ୟ ଯେ, ରାଜ୍ୟ ସରକାର ପ୍ରବାସୀ ଶ୍ରମିକମାନଙ୍କୁ ଫେରାଇ ଆଣିବା ଲାଗି ଅନୁମତି ଦେବାପରେ ବହୁ ସଂଖ୍ୟାରେ ଫେରିବାରେ ଲାଗିଛନ୍ତି। ପ୍ରଥମେ ଭିଟାମାଟିକୁ ଫେରିବାକୁ ବ୍ୟାକୁଳ ଥିବା ଶ୍ରମିକମାନେ ନିଜ ଅର୍ଥରେ ଗାଡି କରି ଫେରିବାକୁ ଲାଗିଲେ। ହେଲେ ସବୁ ଶ୍ରମିକମାନେ ଏଥିପାଇଁ ସକ୍ଷମ ହେଲେନାହିଁ। ପରବର୍ତ୍ତୀ ସମୟରେ କେନ୍ଦ୍ର ସରକାର ନିର୍ଦ୍ଦିଷ୍ଟ କେତୋଟି ଟ୍ରେନ୍ ଚଳାଇବା ପାଇଁ ଅନୁମତି ଦେଲେ। ଶ୍ରମିକମାନେ ଏଥିପାଇଁ ଅର୍ଥ ଭରଣା କରିବେ ନା ସରକାର ଦେବେ ଏଭଳି ଯୁକ୍ତି ମଧ୍ୟରେ କେନ୍ଦ୍ର ସରକାର ୮୫ ପ୍ରତିଶତ ଅର୍ଥ ଟ୍ରେନ୍ର ବହନ କରିବାକୁ କହିଥିଲେ। ବାକି ୧୫ପ୍ରତିଶତ ରାଜ୍ୟ ସରକାର ବହନ କରିବେ ବୋଲି କହିଥିଲେ। ମାତ୍ର କେତେଜଣ ଶ୍ରମିକ ଫେରିବାପରେ ସେମାନଙ୍କ ସହ ଯୋଗାଯୋଗ କରିବାରୁ ଜଣାପଡିଥିଲା ସମସ୍ତେ ନିଜ ଖର୍ଚ୍ଚରେ ଫେରୁଛନ୍ତି। ଏବେ ହଠାତ୍ ରାଜ୍ୟ ସରକାର ପ୍ରବାସୀଙ୍କ ଟିକେଟ ଅର୍ଥ ଭରଣା କରିବାକୁ ଘୋଷଣା କରିଛନ୍ତି। ସେହିପରି ଲକ୍ଡାଉନ ନିୟମ ମାନି ରାଜ୍ୟକୁ ଫେରୁଥିବା ଶ୍ରମିକମାନେ କ୍ୱାରାଣ୍ଟାଇନ୍ ସେଣ୍ଟରରେ ରହିଲେ ସେମାନଙ୍କୁ ୨ ହଜାର ଟଙ୍କା ଲେଖା ପ୍ରଦାନ କରାଯିବ ବୋଲି ରାଜ୍ୟ ସରକାର ସୂଚନା ଦେଇଥିଲେ। ବର୍ତ୍ତମାନ ଏହି ଅର୍ଥରୁ ଶ୍ରମିକଙ୍କ ଟିକେଟ ଅର୍ଥ ସରକାର କାଟିବେ ବୋଲି କୁହାଯାଇଛି। ଶ୍ରମିକ ଯଦି ଫେରୁଥିବା ରାଜ୍ୟର ସରକାର ଟିକେଟ ଅର୍ଥ ପ୍ରଦାନ କରନ୍ତି ତେବେ ସେକ୍ଷେତ୍ରରେ କଣ କରାଯିବ ସେନେଇ ରାଜ୍ୟ ସରକାର କିଛି ସ୍ପଷ୍ଟ କରିନାହାନ୍ତି।
