କେନ୍ଦୁଝର ୧୫ା୯ (ସ୍ବ.ପ୍ର.)-କେନ୍ଦୁଝର ସହରରେ ରବିବାର ଅପରାହ୍ନରେ ମୂଷଳ ଧାରାରେ ବର୍ଷା ହେବା ଯୋଗୁ ସାରା ସହର ଜଳାର୍ଣ୍ଣବ ହୋଇପଡିଛି। ଅପରାହ୍ନ ୨ଟାରୁ ୪ଟା ମଧ୍ୟରେ ପ୍ରବଳତର ବର୍ଷା ହୋଇଥିଲା। ଚାହୁଁ ଚାହୁଁ ରାସ୍ତା ଘାଟରେ ବର୍ଷା ପାଣିର ସୁଅ ଛୁଟିଥିଲା। ସହରର ବିଭିନ୍ନ ଓ୍ବାର୍ଡରେ ବର୍ଷା ଜଳ ଲହଡ଼ି ଭାଙ୍ଗିଥିଲା। ଏଭଳି ଅଭୂତପୂର୍ବ ବର୍ଷା ପୂର୍ବରୁ କେବେ ହୋଇ ନ ଥିବା ସ୍ଥାନୀୟ ଲୋକ କହିଛନ୍ତି। କେହି କେହି ଏହାକୁ ବାଦଲଫଟା ବର୍ଷା ବୋଲି କହୁଛନ୍ତି। ପ୍ରଶାସନ ପକ୍ଷରୁ ଏହି ପ୍ରବଳ ବର୍ଷା ସମ୍ପର୍କରେ ଅଧିକ କିଛି ସୂଚନା ମିଳିନାହିଁ।
ଅପରାହ୍ନ ସମୟରେ ଆକାଶ ହଠାତ ମେଘାଚ୍ଛନ୍ନ ହୋଇ ବିଜୁଳି, ଘଡ଼ଘଡ଼ି ମାରି ବର୍ଷା ହୋଇଥିଲା। ଜୋରରେ ପବନ ବହିଥିଲା। ପ୍ରାୟ ଦୁଇ ଘଣ୍ଟା ଧରି ମୂଷଳ ଧାରାରେ ବର୍ଷା ହେବା ଯୋଗୁ ସହର ଚର୍ତୁପାଶ୍ୱ ବର୍ଷା ପାଣିରେ ଉବୁଟୁବୁ ହୋଇ ଉଠିଥିଲା। କେନ୍ଦୁଝର ସହରର ପଶ୍ଚିମ ପଟେ ଜୁଡ଼ିଆ ପାହାଡ଼ ଥିବାରୁ ବର୍ଷା ଋତୁରେ ଏଠାରେ କେବେକେବେ ପ୍ରବଳ ବର୍ଷା ହୋଇଥାଏ। କିନ୍ତୁ ରବିବାର ହୋଇଥିବା ବର୍ଷା ଅଞ୍ଚଳବାସୀଙ୍କୁ ସ୍ତମ୍ଭୀଭୂତ କରିଛି। ବର୍ଷାରେ ଜଳ ନିଷ୍କାସିତ ହୋଇ ନ ପାରି ବିଭିନ୍ନ ଓ୍ବାର୍ଡରେ ଘରେ ଓ ରାସ୍ତାଘାଟ ଜଳାର୍ଣ୍ଣବ ହୋଇପଡିଛି। ଫଳରେ ଜନଜୀବନ ବ୍ୟତିବ୍ୟସ୍ତ ହୋଇ ପଡିଥିବା ବେଳେ ଯାତାୟାତ ବ୍ୟାହତ ହୋଇଛି। ପବିତ୍ରଡିହା ସାହିରେ ରାସ୍ତାଘାଟ ଜଳାର୍ଣ୍ଣବ ହୋଇଯାଇଥିବା ବେଳେ ଜଳ ନିଷ୍କାସନ ହୋଇପାରୁ ନ ଥିବାରୁ ଲୋକଙ୍କ ଘରବାଡିରେ ପଶି କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି ା ଅଣ୍ଟାଏ ପାଣିରେ ଗାଡିରେ ଲୋକ ମାନେ ଯାତାୟାତ କରୁଥିବା ଦେଖିବାକୁ ମିଳିଛି ା ଚାରିଆଡେ ଘର ହୋଇଯାଇଥିବା ବେଳେ ଡ୍ରେନେଜ ବ୍ୟବସ୍ଥା ନ ଥିବା ଏବଂ ଥିବା ଡ୍ରେନ ଗୁଡିକ ସଫେଇ ହଉନଥିବାରୁ ବର୍ଷା ପାଣି ନିଷ୍କାସିତ ହୋଇ ନ ପାରି ଏଭଳି ପରିସ୍ଥିତି ଉପୁଜିଥିବା ସ୍ଥାନୀୟ ଲୋକ କହୁଛନ୍ତି। ସେହିପରି ପାର୍କଲାଇନ ରୋଡରେ ସେଟଲମେଣ୍ଟ କଲୋନୀରେ ହଠାତ ବର୍ଷା ପାଣି ନିଷ୍କାସିତ ହୋଇ ନ ପାରି ଘର ଭିତରେ ପାଣି ପଶି ଲହଡି ମାରୁଛି ା କର୍ମଚାରୀଙ୍କ ବିଭିନ୍ନ ସାମଗ୍ରୀ ପାଣିରେ ବୁଡି ଯାଇ ନଷ୍ଟ ହୋଇଯାଇଛି। ପାଣି ଘରେ ପଶିଥିବାରୁ ରହିବା ପାଇଁ ସ୍ଥାନ ନାହିଁ ା ତ୍ରୁଟିପୂର୍ଣ୍ଣ ଓ ଅସମ୍ପୂର୍ଣ୍ଣ ଡ୍ରେନ ଅନେକ ଅଞ୍ଚଳରେ ଏଭଳି ପରିସ୍ଥିତି ସୃଷ୍ଟି କରିଥିବା ବେଳେ ଡ୍ରେନ ସଫେଇ ହେଉ ନ ଥିବା ଏବଂ ନିମ୍ନ ମାନର କାମ ଯୋଗୁ ଭାଂଗିଯାଇଥିବା କାରଣରୁ ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି କୁହାଯାଉଛି ା ଜଳ ନିଷ୍କାସନ ପାଇଁ ପଦକ୍ଷେପ ନିଆଯାଉଥିବା ପୌରପାଳିକା ନିର୍ବାହୀ ଅଧିକାରୀ ନିରଞ୍ଜନ ଜେନା କହିଛନ୍ତି।
