ଝୁମ୍ପୁରା, ୨୨।୧ (ଡି.ଏନ.ଏ.)-କେନ୍ଦୁଝର ଜିଲା ବାଂଶପାଳ ବ୍ଲକ ଫୁଲଝର ପଞ୍ଚାୟତ ଅନ୍ତର୍ଗତ କେନ୍ଦୁଘାଟି ଗ୍ରାମବାସୀ ବୈତରଣୀ ନଦୀରେ ପୋଲ ନିର୍ମାଣ ଦାବି କରି ପୁଣି ଥରେ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ସୋମବାର ବାଂଶପାଳ ବ୍ଲକରେ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ପୋଲ ନିର୍ମାଣ ଦାବି ନେଇ କେନ୍ଦୁଘାଟି ଗ୍ରାମରେ ଥିବା ସ୍ବୟଂ ସହାୟିକା ଗୋଷ୍ଠୀ ମହିଳା ସଦସ୍ୟା ସୁଲୋଚନା ଦେହୁରୀ, ଝିଲି ଦେହୁରୀ, ସରସ୍ବତୀ ଗିରି ପ୍ରମୁଖ ଜିଲାପାଳଙ୍କୁ ଭେଟିଛନ୍ତି। ପୋଲ ନିର୍ମାଣ ନେଇ ବ୍ଲକ ସ୍ତରରୁ ଜିଲାପାଳଙ୍କ ଅଭିଯୋଗ ଶୁଣାଣି ପ୍ରକୋଷ୍ଠ ଯାଏଁ ବହୁବାର ଦୌଡିବା ପରେ ମଧ୍ୟ ତାଙ୍କ ସମସ୍ୟା ପ୍ରତି ଜିଲା ପ୍ରଶାସନ ଧ୍ୟାନ ଦେଉ ନ ଥିବା ମହିଳାମାନେ କହିଛନ୍ତି।
କେନ୍ଦୁଘାଟି ଗ୍ରାମ ଦୁର୍ଗମ ଅଞ୍ଚଳ ଭାବେ ପରିଚିତ। ଗ୍ରାମର ଲୋକ ସଂଖ୍ୟା ୯ଶହରୁ ଊର୍ଦ୍ଧ୍ୱ ହୋଇଥିବା ବେଳେ, ଭୋଟରଙ୍କ ସଂଖ୍ୟା ମଧ୍ୟ ୫ଶହରୁ ଊର୍ଦ୍ଧ୍ୱ ବୋଲି ଜଣା ପଡିଛି। ଏହି ଗ୍ରାମର ଭୌଗୋଳିକ ଦୃଷ୍ଟି କୋଣରୁ ୨ପାର୍ଶ୍ୱକୁ ଘେରିଛି ବୈତରଣୀ ଏବଂ ମଣନ୍ଦା ନଦୀ। ଅନ୍ୟପାର୍ଶ୍ୱରେ ରହିଛି ସୁବିସ୍ତୃତ ଘଞ୍ଚ ଜଙ୍ଗଲ ସାଙ୍ଗକୁ ମୟୁରନାଚୁଣୀ ପାହାଡ। ପୂର୍ବରୁ ଗ୍ରାମବାସୀଙ୍କର ଜୀବନଜୀବିକା ଦୟନୀୟ ଅବସ୍ଥାରେ ରହିଛି। ଫୁଲଝର ଗ୍ରାମ ପଞ୍ଚାୟତ ତଥା ବ୍ଲକ କିମ୍ବା ବଜାର ଜାଗାକୁ ଯିବାକୁ ହେଲେ ବୈତରଣୀ ନଦୀ ପାରି ହୋଇ ଝୁମ୍ପୁରା ବ୍ଲକ ଅନ୍ତର୍ଗତ କାଶିଆ ଗ୍ରାମକୁ ପ୍ରଥମେ ଆସିବାକୁ ପଡିଥାଏ। ଗ୍ରାମର ଅନ୍ୟପଟକୁ ରାସ୍ତା ନାହିଁ। କିନ୍ତୁ କାଶିଆ ଗ୍ରାମ ପଟକୁ ମଧ୍ୟ ସବୁଦିନିଆ ରାସ୍ତା ନ ଥିବା କହିଲେ ଅତ୍ୟୁକ୍ତି ହେବନାହିଁ। ବର୍ଷା ଦିନରେ ବୈତରଣୀ ନଦୀ ପାଣି ଫୁଲି ଉଠୁଥିବାରୁ ନଦୀ ସ୍ରୋତ କମିବା ପର୍ଯ୍ୟନ୍ତ କେନ୍ଦୁଘାଟି ବାହ୍ୟ ଜଗତରୁ ବିଚ୍ଛିନ୍ନ ରହିଥାଏ। ପାଣି କମିଲେ ହୁଲି ଡଙ୍ଗାରେ ଗ୍ରାମବାସୀ ବିପଦସଙ୍କୁଳ ଯାତାୟାତ କରିଥାନ୍ତି। ବିଗତ ଦିନରେ ନଦୀ ପାଣିରେ ଭାସିଯାଇ ଆହତ ମୃତ ହୋଇଥିବା ମଧ୍ୟ ନଜିର ରହିଛି। ପିଡିଏସ ସାମଗ୍ରୀ, ବଜାର ସଉଦା ନଦୀ ପାଣିରେ ଭାସିଯିବା ଏଠାରେ ସାଧାରଣ ଘଟଣା। ବର୍ଷା ସମୟରେ ସ୍ବାସ୍ଥ୍ୟ ସେବା ଏଠାରେ ଅପହଞ୍ଚ ହୋଇ ପଡୁଥିବାରୁ, ଗାଁ ଲୋକେ ବାଧ୍ୟ ହୋଇ ଦେଶୀ ଚିକିତ୍ସାକ ଆପଣେଇନେଇଛନ୍ତି। କୃଷି ସହିତ, ବନ୍ୟଜାତ ଦ୍ରବ୍ୟ ସଂଗ୍ରହ, ଶ୍ରମଜୀବୀ ଏଠାକାର ଗ୍ରାମବାସୀଙ୍କର ଜୀବନ ଜୀବିକା। ଗ୍ରାମରେ ଏକ ପ୍ରାଥମିକ ବିଦ୍ୟାଳୟ ଓ ଅଙ୍ଗନୱାଡି କେନ୍ଦ୍ର ରହିଛି। ତେବେ ନଦୀରେ ପୋଲ ନ ଥିବାରୁ ବର୍ଷର ଅଧିକାଂଶ ସମୟ ଏହି ବିଦ୍ୟାଳୟ ବନ୍ଦ ରହୁଛି। ସେହିପରି ଅଙ୍ଗନୱାଡି କେନ୍ଦ୍ରକୁ ମଧ୍ୟ ଅତ୍ୟାବଶ୍ୟକ ସାମଗ୍ରୀ ପହଞ୍ଚିପାରୁ ନାହିଁ। ଗ୍ରାମବାସୀ ବାରମ୍ବାର ଏନେଇ ଦାବି କରୁଥିଲେ ମଧ୍ୟ ଏଯାଏ ଦାବି ପୂରଣ ହୋଇପାରିନି। ଏସମ୍ପର୍କରେ କେନ୍ଦୁଝରସ୍ଥିତ ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ବେଣୁଧର ଲେଙ୍କା କହିଛନ୍ତି ଯେ, ମୋ ଜାଣିବାରେ ସେଠାରେ ଏକ ଝୁଲା ପୋଲ ନିର୍ମାଣ ପାଇଁ ୧ ବର୍ଷ ଆଗରୁ ଟେଣ୍ଡର ହୋଇଥିଲା। ତେବେ ଟେଣ୍ଡରଧାରୀଙ୍କ ମଧ୍ୟରେ ଗଣ୍ଡଗୋଳ ହୋଇ ହାଇକୋର୍ଟରେ କେଶ ଚାଲିଛି, ଏଣୁ ପୋଲ କାମ ଅଟକି ରହିଛି।
