ପଦ୍ମପୁର, ୨୮।୭ (ଡି.ଏନ.ଏ):ପଦ୍ମପୁର ଅଞ୍ଚଳର ଚାଷୀମାନଙ୍କୁ ବୀମା କମ୍ପାନୀ ଚଞ୍ଚକତା କରିଥିବାରୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି । ଏ ସମ୍ପର୍କରେ ପ୍ରଶାସନକୁ ବହୁବାର ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ । ବରଂ ଚାଷୀଙ୍କ ମନୋବଳ ଭାଙ୍ଗିବା ପାଇଁ ଚେଷ୍ଟା କରାଯାଉଛି। ପ୍ରଧାନମନ୍ତ୍ରୀ ଫସଲ ବୀମା ପ୍ରାପ୍ୟରେ ବୀମା କମ୍ପାନୀ ୪ଟି ବ୍ଲକକୁ ଏସିଏଫ ନାମରେ ୩୦ରୁ ୪୦ ପ୍ରତିଶତ ଅର୍ଥ କାଟ କରିଛନ୍ତି। ଫଳରେ ଚାଷୀମାନେ ବ୍ୟାପକ ଆର୍ଥିକ କ୍ଷତି ସହୁଛନ୍ତି । ତେଣୁ କୃଷିବୀମାରେ ଏସିଏଫକୁ ସମ୍ପୂର୍ଣ୍ଣ ଉଠାଇ ଦେବାକୁ ଚାଷୀମାନେ ଦାବି କରିଛନ୍ତି । ଏହି ପ୍ରସଙ୍ଗରେ ରାଜବୋଡାସମ୍ବର କୃଷକ ସଙ୍ଗଠନ ଓ ଜୟ କିସାନ ସଂଘର ମିଳିତ ଉଦ୍ୟମରେ ଚାଷୀମାନଙ୍କ ଅଧିକାର ପାଇଁ ଲଢ଼େଇ ଜାରି ରହିଛି । ୨୦୧୮ରେ ଏସିଏଫ ନାମରେ ବୀମା କମ୍ପାନୀ ମନମୁଖି ଭାବେ ପ୍ରାପ୍ୟ ଦେଇଥିବାରୁ ଏହାର ପ୍ରତିବାଦରେ ମହୁଲପାଲିଠାରେ ଶନିବାର ଏକ ଚାଷୀ ସମାବେଶ ଅନୁଷ୍ଠିତ ହୋଇଥିଲା । ଜୁଲାଇ ୩୦ତାରିଖରେ ଝାରବନ୍ଧଠାରେ ଚାଷୀମାନେ ଏସିଏଫ ନାମରେ ଠକେଇ କରୁଥିବା କମ୍ପାନୀ ବିରୁଦ୍ଧରେ ଆଇନ ଅମାନ୍ୟ ଆନ୍ଦୋଳନ କରିବେ ଏବଂ ସ୍ବାଧୀନତା ଦିବସରେ ଚାଷୀମାନଙ୍କ ସ୍ବାର୍ଥ ପ୍ରତି ଦୃଷ୍ଟି ନ ଦେଇ କମ୍ପାନୀ ଶୋଷଣ କରୁଥିବାରୁ ଏହି ଦିବସକୁ ପ୍ରତିବାଦ ଦିବସ ଭାବେ ପାଳନ କରାଯିବ ବୋଲି ନିଷ୍ପତ୍ତି ନିଆଯାଇଛି। ଶିବ ପ୍ରଧାନ, ରମେଶ ମହାପାତ୍ର, ସୁଶୀଲ ସାହୁ, ଅଶୋକ ସାହୁ, ବିଶ୍ୱନାଥ ରଣା, ପୀତାମ୍ବର ସାହୁ, ରୋହିତ ପ୍ରଧାନ, ପ୍ରଶାନ୍ତ ପ୍ରଧାନ, କୈଳାଶ ବାରିକ, ସୌକି ମେହେର, ସୁରେଶ ଗନ୍ଧ, ଡମ୍ବରୁଧର ସାହୁ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।
