କୁଜଙ୍ଗ,୨୮ା୭(ସ୍ବ.ପ୍ର.): କୁଜଙ୍ଗ ବ୍ଲକର ବିଭିନ୍ନ ପଞ୍ଚାୟତରେ ଏବେ କୋଟି କୋଟି ଟଙ୍କାର ପାନୀୟଜଳ ପ୍ରକଳ୍ପ ଅଧାପନ୍ତରିଆ ହୋଇ ରହିଛି। ଫଳରେ ସମ୍ପୃକ୍ତ ଅଞ୍ଚଳର ଲୋକେ ବିଶୁଦ୍ଧ ପାନୀୟଜଳ ପାଇବାରୁ ବଞ୍ଚତ୍ତ ହେଉଛନ୍ତି। ଏପରି କି କେତେକ ପଞ୍ଚାୟତରେ ବର୍ଷ ବର୍ଷ ଧରି ଏହି ପ୍ରକଳ୍ପ କାମ ହୋଇପାରୁ ନ ଥିବାରୁ ବାଧ୍ୟହୋଇ ଲୋକେ କୂଅ, ପୋଖରୀର ଦୂଷିତ ପାଣିକୁ ପାନୀୟଜଳ ଭାବେ ବ୍ୟବହାର କରୁଛନ୍ତି। ପ୍ରକାଶ ଯେ, କୁଜଙ୍ଗ ବ୍ଲକ ହେଉଛି ଜଳକ୍ଲୀଷ୍ଟ ଅଞ୍ଚଳ। ଏହି ବ୍ଲକର ଅର୍ଦ୍ଧାଧିକ ପଞ୍ଚାୟତରେ ବିଶୁଦ୍ଧ ପାନୀୟଜଳ ଉପଲବ୍ଧ ହୋଇ ନ ଥାଏ। ତେଣୁ ଲୋକମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏହାକୁ ଦୃଷ୍ଟିରେ ରଖି ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ବ୍ଲକର ପୋତାନଈ ପଞ୍ଚାୟତର ଓକଲଠାରେ ୬୦ ଲକ୍ଷ, ନପଙ୍ଗଠାରେ ୮୫ ଲକ୍ଷ, ବଣିତୋଠାରେ ୫୯ ଲକ୍ଷ, ସିନିନ୍ଦାଠାରେ ୭୮ ଲକ୍ଷ, ଭରାଳୋଠାରେ ୬୦ ଲକ୍ଷ ଟଙ୍କାରେ ପାନୀୟଜଳ ପ୍ରକଳ୍ପ କାର୍ଯ୍ୟ ଶୁଭାରମ୍ଭ ହୋଇଥିଲା। ଏହି ସମସ୍ତ ସ୍ଥାନରେ ଏବେ ପ୍ରକଳ୍ପଗୁଡ଼ିକ ଅସମ୍ପୂର୍ଣ୍ଣ ଅବସ୍ଥାରେ ରହିଛି। ସମ୍ପୃକ୍ତ ଠିକାସଂସ୍ଥା ଉପରେ ବିଭାଗୀୟ ଯନ୍ତ୍ରୀଙ୍କ ନିୟନ୍ତ୍ରଣ ରହୁ ନ ଥିବାରୁ ମନଇଚ୍ଛା କାର୍ଯ୍ୟ ଚାଲିଥିବା ଓ ଅକାରଣରେ ବିଳମ୍ବ ହେଉଥିବା କୁହାଯାଉଛି। ଅନେକ ସ୍ଥାନରେ ଟାଙ୍କି ନିର୍ମାଣ ଶେଷ ହୋଇଥିବାବେଳେ ଅନ୍ୟ ଆନୁସଙ୍ଗିକ କାର୍ଯ୍ୟ ହୋଇପାରି ନାହିଁ। କେତେକ ସ୍ଥାନରେ ଭୂତଳ ପାଇପ ବିଛା ଯାଇଥିବାବେଳେ ଟାଙ୍କି ନିର୍ମାଣ ହୋଇ ନ ଥିବା ଜଣାପଡ଼ିଛି। ସେହିପରି କେତକ ପଞ୍ଚାୟତରେ ପମ୍ପ ହାଉସ ନିର୍ମାଣ ଶେଷ ହୋଇଥିବାବେଳେ ଓଭରହେଡ଼ ଟାଙ୍କି ନିର୍ମାଣ ଓ ମୁଖ୍ୟ ରାସ୍ତାରେ ପାଇପ୍ ବିଛା କାର୍ଯ୍ୟ ଚାଲୁ ରହିଛି। ଫଳରେ ଏହି ପଞ୍ଚାୟତର ଲୋକମାନେ ଦୂଷିତ ପୋଖରୀ ପାଣି ବ୍ୟବହାର କରୁଛନ୍ତି। ଏଥିପାଇଁ ସ୍ଥାନୀୟ ଅଞ୍ଚଳର ଯୁବ ସାମାଜିକ କର୍ମୀ ପ୍ରଦୀପ କୁମାର ମହାନ୍ତି ବିଭାଗୀୟ ସ୍ଥାଣୁତାକୁ ଦାୟୀ କରିଛନ୍ତି। ସରକାର କୋଟି କୋଟି ଟଙ୍କା ପ୍ରକଳ୍ପ ପାଇଁ ମଞ୍ଜୁର କରୁଥିବାବେଳେ ଠିକାଦାର କ’ଣ ପାଇଁ ପ୍ରକଳ୍ପ କାର୍ଯ୍ୟ ନିର୍ଦ୍ଧାରିତ ସମୟରେ ଶେଷ କରୁ ନାହାନ୍ତି ତାହାର ତଦାରଖ କରାଯିବା ଆବଶ୍ୟକ ବୋଲି ସ୍ଥାନୀୟ ଲୋକେ କହିଛନ୍ତି।
