ନୂଆପଡା ଅଫିସ/କୋମନା,୭ା୬- କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖ, ନିଆଁ ସିମାନକୁ ପକାଘର ଯୁଗେଇ ଦେବାର ଲାଗି ଅନେକ ପରକାର ଆବାସ ଯୋଜନା କାଯ୍କାରୀ କରୁଛନ୍। ହେଲେ ବିଭାଗୀୟ ଅଧ୍କାରୀମାନକର ଉଦାସୀନତା ଲାଗି ଅନେକ ଜାଗାରେ ହକ୍ଦାର ହିତାଧିକାରୀ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ନୂଆପଡ଼ା ଜିଲା କୋମନା ବ୍ଲକ ସଦର ମହକୁମାନୁ ୧ କି.ମି. ଦୂରେ ଥିବାର ସିଙ୍ଗାରୀ ଗଁାରେ। ଗଁାର ଗୁଟେ ପରିବାର ବଛର ବଛର ହେଲା ଭଂଗା ଘରେ ରହିଆସୁଥିଲେ। ଏନ୍ତାଥି ଦିନାକେତେ ତଲେ ହେଇଥିବାର ଖରାଦିନିଅଁା ଧୁକାଗରେଲ ପରିବାରଟାକେ ବାସହରା କରିଦେଇଛେ। ଏହେଦେ ଇ ଗରିବ୍ ପରିବାରଟା ଗଁାରେ ଭିନେ ଭିନେ ଲୁକ୍କର ପିଁଢ଼ାରେ ଦିନ୍ ବିତଉଛନ୍। ଇ ଦୁଖି ପରିବାରର ଦୁରଦଶା ଦେଖ୍ଲେ ଯେକେହି ସରକାରୀ ଯୋଜନାର ଗତି କେନ୍ଆଡ଼େ ଠହରେଇ ପାରବା।
ସୂଚନା ଅନ୍ସାରେ ସିଙ୍ଗାରୀ ଗଁାର ବରୁଣ ନାଏକକଁର ପରିବାର କହିଲେ ତାକର ମାଏକିନା ନୀଲାଙ୍କ ଆର ୫ ଝି’ପୁଓ। ବରୁଣକଁର ନଁାରେ ଜମିବାଡ଼ି ବଲି କିଛି ନାଇଁ, ପରିବାରଟା ଦରିଦିରିଆ ସୀମାରେଖା ତଲେ ରହିଛନ୍। ଏନ୍ତାଥି ଫେର ପରିବାଟା ସବୁପରକାର ସରକାରୀ ସୁବିଧା ସୁଯୋଗରୁ ବଁଚିତ ହେଇ ରହିଛନ୍। ଘର କହେଲେ ଗଁାମୁଡ଼େ ଥିବାର ଝାଟିମାଟିର କୁରିଆଟେ। ବରୁଣକଁର କହିବାର ହିସାବେ ଗଁାମୁଡୁ ଦେଖ୍ଲେ ବ୍ଲକ ଅଫିସ ଦିଶ୍ସି। ସବୁଦିନ ବଡ଼ବଡ଼ିଆ ଅଧ୍କାରୀମାନେ ସଖାଲୁ ବେଲବୁଡ଼ା ତକ୍ ଗଁାକେ ଟହଲି ଆସୁଛନ୍। ହେଲେ କାହାରି ଦୁରୁଷ୍ଟି ତାକର ଉପରେ ନାଇଁ ପଡ଼ବାର। ପରିବାର ଲୋକ ଅନେକ ଥର ନେତା, ଅଧ୍କାରୀକୁଁ ଗୁହାରୀ କରିଛନ୍। ହେଲେ ଆବାସ ଯୋଜନା ତାଲିକାରେ ଠାନ୍ ନାଇଁ ପାଇପାରବାର। ଏନ୍ତା ବିଷମ୍ ପରିସ୍ଥିତିରେ ଦିନାକେତେ ତଲେ ହେଇଥିବାର ଧୁକାଗରେଲ ତାକର କୁରିଆକେ ଖିନ୍ଭିନ୍ କରିଦେଇଛେ। ଏହେଦ୍କା ପରିବାରଟା ବାରଦୁଆର ବୁଲି ମୁଡ଼ ଗୁଁଜୁଛନ୍। ଆଗ୍କେ ବରଷା ଦିନ୍ ମାଡ଼ିଆସୁଛେ। ଏନ୍ତାଥି ପରିବାରଟା କେନ୍ଠାନେ ରହିବେ ଆର ସରକାରକଁର ତରଫୁ ଘରଖଁଡ଼େ ମିଲବା କି ନାଇଁ ସଁଧେରେ ରହିଛନ୍। ଇ ଗରିବ୍ ନିଅଁାସି ପରିବାର ଉପରେ ବ୍ଲକ ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଜନସାଧାରନରେ ମତ ପରକାଶ ପାଉଛେ। ବରୁଣ ନାଏକ ଗୁଟେ ଉଦାହରନ୍ ଆଏ। ହେଲେ ଏନ୍ତା କେତେ ଯେ ବରୁଣ ବାସହରା ହେଇ ପରମାଦ ଗନୁଛନ୍ ତାର କିଛି ଠିକ୍ଠିକାନା ନାଇଁ। ଜିଲାରେ ଗୁଟେ ସର୍ଭେ କରି ଏନ୍ତା ବାସହରାମାନକୁ ଚିନ୍ହଁଟ କରବାର ସଂଗେ ତାହାକୁ ସରକାରୀ ସୁବିଧା ସୁଯୋଗ ଯୁଗେଇ ଦେବାର ନିହାତି ଜରୁରି ବଲି ବୁଧିଜୀବୀ ମହଲରେ ଦାବି ହେଉଛେ।
